Showing posts with label Moze III. Show all posts
Showing posts with label Moze III. Show all posts

Soera Moze III Faza 27

I. Amachoita ba gamaboeʼoela li, na niha ba na oerifõ ba na omo ba na benoea. II. He lawisa ba zi aʼa ba waʼatoemboe ba ba nibeʼe salacha. III. Chõ Jehowa zi samboea niʼofoeloe andrõ, hadia ia.

1I. Ba hoemede Jehowa chõ Moze, imane: 2Hede ba Ndraono Gizeraëli, ba õmane chõra: Na so zanõrõ amaboeʼoela li chõ Jehowa, ba na niha, dali watõnia, (Moz. IV. 30, 3. Moz. V. 23, 21), 3ba fatõ ndra matoea si doea woeloe fache, irege õnõ ngafoeloe, ba lima woeloe roefia ba zaga niʼamoniʼõ andrõ; 4ba na ira alawe, ba tõloe ngafoeloe roefia watõnia. 5Ba na si melima fache, iroegi doea woeloe fache, ba fatõ nono matoea, ba doea woeloe roefia ba fatõ nono alawe, ba foeloe roefia. 6Ba na si sara waw̃a, iroegi melima fache, ba fatõ nono matoea, ba lima roefia, ba fatõ nono alawe, ba tõloe roefia. 7Ba na si õnõ ngafoeloe fache ba na si tõra, ba fatõ ndra matoea, ba felelima roefia, ba fatõ ndra alawe, ba foeloe roefia. 8Ba na no abõlõ noemana niha si manõ, na tebai itõrõ watõ andrõ, ba laʼohe chõ gere, ba jamoefatõ mbõlinia ere; jamoefaigi ere, ha waʼeboea zi tola ibeʼe samaboeʼoe andrõ. 9Ba na oerifõ, si tola labeʼe soemange Jehowa, ba niʼamoniʼõ law̃aʼõ fefoe nibeʼe chõ Jehowa. 10Lõ tola ifalalini ba lõ tola isalahini, wameʼe si sõchi salahi zi lõ sõchi, ba ma si lõ sõchi salahi zi sõchi; ba na ifalalini zoei goerifõ andrõ, ba faoma niʼamoniʼõ. 11Ba na oerifõ salacha, si tebai labeʼe soemange Jehowa, ba ndramoeʼohe chõ gere. 12Ba jamoefatõ mbõlinia ere, na si sõchi, ba na sambõ faʼasõchi; ba ba watõ andrõ, niw̃aʼõ gere, ahono. 13Ba na edona isanoe, ba samboea niʼolima watõ andrõ inõnõ. 14Ba na so zi amoniʼõ chõ Jehowa omonia, ba jamoefatõ mbõlinia ere, na si sõchi, ba na sambõ faʼasõchi, ba fatõ niw̃aʼõ gere mbõlinia. 15Ba na edõna ifoeli isanoe nomonia si amoniʼõ jaʼia mege, ba samboea niʼolima watõnia andrõ inõnõ, ba chõnia saʼae. 16Ba na so zi amoniʼõ chõ Jehowa benoea, fõfõ gondrõita namania mege, ba ba watõnia, ba balazi ha oega laoeroe tanõmõ; si 25 laoeroe tanõmõ, ba 50 roefia watõnia. 17Na ba ndrõfi waʼowoeawoea dõdõ andrõ iʼotarai weʼamoniʼõ benoeania andrõ, ba fatõnia itõrõ. 18Ba na no aefa ndrõfi waʼowoeawoea dõdõ na iʼamoniʼõ, ba jamoeʼerai chõnia mbõli ere, balazi ha me oega fache na, iroegi ndrõfi waʼowoeawoea dõdõ dania, ba lasõbi dania ndrohoendrohoe ba watõnia andrõ. 19Ba na edõna zoei isanoe mbenoea andrõ si amoniʼõ jaʼia, ba samboea niʼolima watõnia andrõ inõnõ; ba lõ teboelõ wa chõnia. 20Ba na lõ isanoe mbenoea andrõ, ba na iʼamawa zoei ba niha bõʼõ, ba tebai tefoeli tesanoe; 21benoea andrõ, na aefa dania, na dõfi waʼowoeawoea dõdõ andrõ, ba niʼamoniʼõ chõ Jehowa law̃aʼõ, si mane benoea nilachaʼõ; ochõta gere saʼae ia. 22Ba na so zi amoniʼõ chõ Jehowa benoea niʼõlinia, si tenga fõfõ mbenoea ondrõita namania mege, ba jamoeʼerai chõnia ere, 23he wisa fatõnia, irege dõfi waʼowoeawoea dõdõ andrõ, ba fatõ daʼõ, ba na loeo daʼõ ibeʼe, ameʼela niʼamoniʼõ chõ Jehowa. 24Ba na dõfi waʼowoeawoea dõdõ, ba mangawoeli ba niʼolinia jaʼia mbenoea andrõ, ba zochõ jaʼia mege ondrõita namania. 25Fefoe watõ, ba saga niʼamoniʼõ mbalazi; si samba sekeli [roefia] ba 20 gera. (Moz. II. 30, 13).
26II. Ba si aʼa nono goerifõ, si mõi chõ Jehowa, me no si aʼa, ba lõ tola laʼamoniʼõ; he saw̃i, ba he biribiri — chõ Jehowa ia saʼae. 27Ba na oerifõ salacha, ba nihõli, balazi watõ, ba samboea niʼolima mbõli inõnõ; ba na lõ lasanoe, ba niʼamawa, balazi watõ. 28Ba ba nilachaʼõ, niʼamoniʼõ niha chõ Jehowa, wolachaʼõ jaʼia, nitoejoe ba zi so chõnia fefoe, he niha, ba he oerifõ, ba he benoea, ondrõita mege, ba lõʼõ manõ tola laʼamawa ba lõ tola lasanoe; fefoe nilachaʼõ ba no niʼamoniʼõ sibai chõ Jehowa. 29Na so ha niha, niha nilachaʼõ, ba lõ tola lasanoe, niboenoe saʼae. (Sam. I. 15, 3).
30III. Samboea niʼofoeloe, fefoe, he benoea, ba he boea danõ, ba he boea geoe, ba chõ Jehowa, niʼamoniʼõ chõ Jehowa. 31Ba na so zomasi mananoe õsa niʼõfoeloe andrõ chõnia, ba samboea niʼolima mbõlinia inõnõ. 32Ba ba zi samboea niʼofoeloe zaw̃i ba biribiri, ba ba nifatõrõ siʼo [goebalo] fefoe, ba niʼerai, foeloefoeloe ngaʼeoe, ba sagesageoe niʼamoniʼõ chõ Jehowa. (Jer. 33, 13). 33Bõi lafaigi, na si sõchi, ba na si lõ sõchi, ba lõ tola lafalalini. Ba na so zamalalini zoei, ba faoma niʼamoniʼõ ira, ba lõ tola lasanoe. 34Daʼõ goroisa andrõ, niʼoroiʼõ Jehowa chõ Moze, ba hili Zinaʼi, ba Ndraono Gizeraëli.

Soera Moze III Faza 26

I. Famaboeʼoe howoehowoe. II. Famangaha fangelifi. III. Tefoeli tetema ira, na mangaloeloe ira.

1I. Lõ tola mifazõchi chõmi nadoe, ba ma famaedo, kara nitoto, ba bõi mitaroeʼõ chõmi harefa, ba he gowe niʼoniha, ba bõi mifataro ba danõmi, ba wangaloeloe chõnia, me no Jehowa ndraʼodo Lowalangimi. (Moz. II. 20, 4. Moz. V. 16, 22). 2Loeo wolombase andrõ chõgoe mitõngõni, ba miʼataʼoefi niʼamoniʼõ andrõ chõgoe; Jehowa ndraʼodo. 3Ba na miʼoʼõ nifachoigoe ba na mitõngõni goroisagoe, woloʼõ jaʼia, (F. 19, 30), 4ba oebeʼe deoe chõmi, ero na inõtõ, enaʼõ mowoea danõ, ba he eoe sowoea ba mbenoea, ba enaʼõ na mowoea. (Moz. V. 11, 14; 28, 1 b. t.). 5Ba iroegi dania wangozara boea nagoe famõbõrõ fache, ba chõmi ba fangozara boea nagoe andrõ, ba iroegi wanaroe, enaʼõ fahõna chõmi mbalazo, ba enaʼõ lõ hadia ia chõmi, ba danõ. 6Lõ fanoewõnoewõ oebeʼe, enaʼõ miʼila mõrõ lõ si keani jaʼami. Oeheta ba danõmi goetoe ndroeʼoe andrõ, ba lõ iroegi danõmi siʼõli oebeʼe. (Job. 11, 19). 7Emalimi, ba mitimba dania ba ichamõ ira siʼõlimi, ba woloira chõmi. 8Dalima ami, ba otoe migohi, ba otoe ami, ba foeloe ngahõnõ migohi, ba ichamõ nemalimi siʼõlimi, ba woloira chõmi. (Jos. 23, 10). 9Ba oeʼotahõgõ ami, ba tedooe ami oebeʼe, ato ami, ba aro wawoeʼoesa li andrõ chõda oebeʼe. 10Boea danõ me ndrõfia gõmi: ba tobali miheta zi tohõna, ba wamonaha si bohooe [moebasi]. 11Ba oeʼiagõ ba chõmi, lõ anoezoe dõdõgoe ami. (Moz. II. 29, 45). 12Oedõrõdõrõi ami, ba Lowalangimi ndraʼodo, ba banoeagoe ami. 13Jehowa ndraʼodo, Lowalangimi, si no mangeheta jaʼami ba danõ Miseraji, fa bõi saʼae sawoejoera ami; no oefatõ dõladõla galo mbagimi, ba miʼila mifaõga mbagimi oebeʼe.
14II. Ba na lõ mifondrondrongo chõgoe, na lõʼõ manõ miʼoʼõ goroisagoe, (Moz. V. 28, 15 b. t. Mal. 2, 2), 15na lõ ba dõdõmi nifachoigoe andrõ ba na anoezoe dõdõmi hoekoe andrõ chõgoe, na tobali lõʼõ manõ miʼoʼõ goroisagoe, wanoedoegõ fawoeʼoesa li andrõ chõgoe, 16ba oeʼohiaʼõ gõi daʼõ, wolaoe chõmi; sataʼoe ita oefatõrõ chõmi: fõchõ baõsi ba faʼaoechoe, sameʼe abõsi hõrõ ba ariri noso. Ba jatobali zajazaja gõlõ wanaroemi; emalimi saʼae zi manga jaʼia. 17Ba faʼoedoe ndraʼo chõmi, tobali teʼala ami ba nemalimi, ba labeʼe barõ mbawara ami si faʼoedoe chõmi, ba moloi ami, he gõi lõ solohi jaʼami. (Amaed. 28, 1). 18Ba na lõʼõ zoei na mifondrondrongo chõgoe dania, ba mewitoe oeʼabeʼõ wangotoeʼõ jaʼami, ba horõmi andrõ, 19ba oehõndrõgõ hochami andrõ, si no abeʼe, ba timba ziʼõli mbanoea jaw̃ami oebeʼe, ba timba dõla garamba danõmi [waʼabeʼe]. 20Ba tobali mifakao ami lõ boto: tanõ, ba lõ mowoea, ba he eoe sowoea ba danõ, ba si lõ boea. 21Ba na milaoe zi lõ faoedoe chõgoe, na lõ mifondrondrongo chõgoe, ba oetohoegõ oebago ami, mewitoe, loeomi ba horõmi. 22Ba oedoedoe chõmi goetoe ndroeʼoe andrõ, enaʼõ laʼoloiʼõ ndraonomi ba enaʼõ laboeboenoe goerifõmi, enaʼõ alõ waʼatomi labeʼe, enaʼõ lõ nihaniha ba lala chõmi misa. 23Ba na lõʼõ zoei faloechado ataʼoe ami ba daʼõ, na milaoe na zi lõ faoedoe chõgoe, 24ba oelaoe gõi zi lõ faoedoe chõmi, ba mewitoe oebago ami, ba horõmi andrõ. 25Ba itõrõ ami siʼõli oebeʼe, folaoe mbalõ, me no moedoedoegõ wawoeʼoesa li andrõ. Ba na miʼowoeloi dania ami jomo ba mbanoea, ba oefatõrõ chõmi wõchõ waba, ba tebeʼe ba danga nemali ami. 26Ba na oefatõ chõmi dendrotendro gõ, ba dafoeloe dania ndra alawe zamogõ roti chõmi, ha samboea mbowoa, ba lafoeli chõmi roti andrõ, nitoelo, ba manga ami, ba lõ aboeso. (Hos. 4, 10. Mich. 6, 14). 27Ba na lõʼõ zoei mifondrondrongo chõgoe, na milaoe na zi lõ faoedoe chõgoe, 28ba oelaoe gõi zi lõ faoedoe chõmi, ba wõnoegoe, ba mewitoe oeʼotoeʼõ ami, ba horõmi andrõ. 29Ba miʼā dania nõsi nonomi matoea ba õsi nonomi alawe miʼā. (Raz. II. 6, 28. Jer. 19, 9. Ngen. Jer. 4, 10). 30Ba oefoefoe hilihili andrõ chõmi, ba gowe loeo andrõ chõmi, ba oerasa, ba oeʼoroedoegõ ba mboto nadoemi mbotomi si mate, ba ogorodo ami. 31Banoeami, ba oebaliʼõ adoedoela, awõ niʼamoniʼõ andrõ chõmi, oedoedoegõ, ba lõʼõ saʼae oeʼago waʼamohoea zoemange andrõ chõmi, si no omasiõ enaʼõ. 32Jaʼodo andre zamaliʼõ tanõ si mate tanõ, enaʼõ tobali dõdõ nemalimi andrõ ba daʼõ, emalimi si mõi mowanoea ba danõ. 33Ba jaʼami, ba oefazawili ba niha baero, ba oesõbi ziʼõli moroi foerimi; ba jatobali tanõ si mate danõmi ba banoeami, ba jatobali adoedoela. 34Ba teʼali dania ba danõ ndrõfi wolombase andrõ chõnia, gõtõ tanõ si mate ia, fatoea ba danõ nemalimi so ami. Ba daʼõ dania molombase danõ, ba itõrõ ndrõfi wolombase andrõ chõnia. (Ngaʼõt. II. 36, 21). 35Gõtõ tanõ si mate ia molombase ia — folombase si lõ faloecha ia mege, na dõfi wolombase andrõ, niw̃aʼõ chõmi, me so ami ba danõ. 36Ba ha niha ami si tosai, ba lõ lala dõdõ oebeʼe, ba danõ nemalira, enaʼõ moloi ira ba weroeroe zi sagõrõ boeloe lehoe, enaʼõ moloi, si mane foloi na so ziʼõli, ba enaʼõ alaoe, he w̃aʼae lõ solohi. (Jes. 30, 17). 37Ba lalangõ nawõra waʼalaoe, si mane na so ziʼõli moroi foeri, he w̃aʼae lõ solohi; ba ja tebai milaw̃a nemalimi. 38Ba jatekiko ami ba niha baero andrõ, hana na iʼā ami tanõ nemalimi andrõ. 39Ba ha niha ami si tosai dania, ba hana na ariri ira ba danõ nemalimi, bõrõ horõra andrõ; ba bõrõ gõi golalõw̃a ndra toeara õsa, wa sariri ira, si mane daʼõ mege.
40III. Ba na latehe dania horõra, awõ horõ ndra toeara andrõ — wa no farõi ira chõgoe — awõ wa no lalaoe zi lõ faoedoe chõgoe, (Moz. V. 4, 30; 30, 2), 41bõrõ wa oelaoe gõi chõra si lõ faoedoe chõra, awõ wa no oeʼohe ira ba danõ nemalira — na mangaloeloe dania dõdõra andrõ, si lõ moeboto, ba na tesoelõni chõra horõra andrõ, 42ba itorõ tõdõgoe wawoeʼoesa li andrõ chõgoe chõ Jakobo ba fawoeʼoesa li chõ Gizaʼaki ba fawoeʼoesa li chõ Gaberahamo, ba itõrõ tõdõgoe, ba tanõ andrõ, ba itõrõ tõdõgoe. 43Ba saheta sa ira ba danõ, enaʼõ tetõrõ chõnia ndrõfi wolombase andrõ, fatoea tanõ si mate ia, na no aheta ira; ba chõrá, ba tesoelõni horõra andrõ, me no laʼositengagõ hoekoe andrõ chõgoe, ba me no anoezoe dõdõra nifachoigoe. 44Ba he ba daʼõ dania, na ba danõ nemalira so ira, ba lõ ogorodo ira, fa oehori ira enaʼõ, fa oedoedoegõ wawoeʼoesa li andrõ chõma, enaʼõ, me no Jehowa ndraʼodo, Lowalangimi. 45Ba itõrõ tõdõgoe — ba chõra andrõ — wawoeʼoesa li andrõ chõgoe chõ ndra toea, nihetagoe ba danõ Miseraji, ba zanehe niha baero, ba weʼamõi Lowalangira, jaʼodo andre, Jehowa. 46Daʼõ gamachoita andrõ ba hoekoe ba oroisa, nibeʼe Jehowa ba hili Zinaʼi andrõ, nifaʼema Moze, lala niw̃aʼõnia ba Ndraono Gizeraëli.

Soera Moze III Faza 25

I. Amachoita ba ndrõfi sabato. II. Dõfi waʼowoeawoea dõdõ. III. Jaʼia mbalazi ba wowõli hadia ia ba ba wananoe. IV. Fanenaw̃a famohare anaʼa. V. Oroisa he lawisa ba zawoejoe, Iraono Gizeraëli.

1I. Ba hoemede Jehowa chõ Moze ba hili Zinaʼi, imane: 2Hede ba Ndraono Gizeraëli ba õmane chõra: Na no miroegi dania danõ, nibeʼegoe chõmi, ba mosabato chõ Jehowa danõ. (Moz. II. 23, 11). 3Me õnõ fache waʼara õhalõhalõ danõ nowi ba õgoetigoeti nagoe chõoe, ba õʼozaragõ mboea. 4Ba ba ndrõfi si fitoe, ba mosabato danõ, sabato chõ Jehowa. Ba lõ tola õhalõ nowioe ba daʼõ ba lõ tola ogoetigoeti nagoe chõoe. 5Ba hadia zowoea manõ, aefa wamasioe mege, ba lõ tola õbasi, ba boea nagoe andrõ, si lõ moegoetigoeti, ba lõ tola õʼozaragõ, me dõfi sabato ba danõ. (Moz. V. 15, 1). 6Hadia mboea danõ gõtõ wolombase andrõ, ba õmi — õoe, ba õ zawoejoemõ, ono matoea ba ono alawe, ba õ genonioe, ba õ zi fatewoe chõoe, jomo chõoe. 7Ba õ goerifõoe gõi ba õ goetoe ndroeʼoe ba danõmi fefoe mboea danõ andrõ.
8II. Ba õʼerai ndrõfi sabato andrõ, fitoe — mewitoe wa fitoe fache, tobali õfa woeloe a siw̃a fache gõtõ ndrõfi sabato si fitoe. 9Ba ba daʼõ õfalaoeʼõ dorofe, ba zi mewoeloe ba mbaw̃a si fitoe; na baw̃a wangatoelõ andrõ, ba sagõrõ tanõ mifalaoeʼõ dorofe, 10ba miʼamoniʼõ ndrõfi si lima woeloe andrõ, mifarongogõ ba daʼõ waʼaefa, faʼaefa niha fefoe ba danõ. Dõfi waʼowoeawoea dõdõ miw̃aʼõ, ba dozi ami, ba mangawoeli chõmi gochõtami, ba mangawoeli ba niwara zamõsana. 11Dõfi waʼowoeawoea dõdõ ia, miw̃aʼõ, ndrõfi si lima woeloe andrõ. Ba lõ tola manaroe ami ba daʼõ, ba lõ tola mibasi zowoea manõ, ba he boea nagoe andrõ, si lõ moegoetigoeti, ba lõ tola miʼozaragõ. 12Me no dõfi waʼowoeawoea dõdõ, ba niʼamoniʼõ ia, miw̃aʼõ. Moroi ba danõ miʼā mboeania. 13Daʼõ ndrõfi waʼowoeawoea dõdõ andrõ, ba zangawoeli ba zamõsana ochõtania.
14III. Na so niʼamawaoe chõ nawõoe, ba ma na õʼõli hadia ia chõ nawõoe, ba faoma bõi mibeʼe teʼala nawõmi. 15Balazi ha me oega fache aefa ndrõfi waʼowoeawoea dõdõ, na õʼõli hadia ia chõ nawõoe, ba balazi ha me oega fache mamasi na, na iʼamawa chõoe. 16Na oja na ndrofi, ba õʼeboeaʼõ chõnia mbõli, ba na ambõ faʼoja, ba õʼambõsi nibeʼe; ha me oega famasi sa iʼamawa chõoe. 17Bõi jamoebeʼe teʼala nawõnia zamõsana; ataʼoefi Lowalangioe, me no Jehowa ndraʼodo Lowalangimi. 18Andrõ miʼoʼõ nifachoigoe, mitõngõni hoekoe andrõ chõgoe ba miʼoʼõ, enaʼõ lõ hadia ia chõmi ba danõ. 19Ba mowoea dania danõ, enaʼõ aboeso ami ba enaʼõ lõ hadia ia chõmi ba danõ. 20Ba na miw̃aʼõ enaʼõ: Hadia gõma ba ndrõfi si fitoe andrõ, na lõ manaroega ba na lõ tola maʼozaragõ mboea danõ? 21ba na dõfi si õnõ andrõ, ba oebeʼe li ba howoehowoe andrõ chõgoe, enaʼõ ndrohoendrohoe ba zi medõloe fache misõndra chõnia, ibeʼe. 22Ba na manaroe ami, na dõfi si w̃aloe, ba miʼagaʼaga mboea danõ mege; iroegi ba ndrõfi si siw̃a — tobali miʼagaʼaga zi tohõna, irege so zi bohooe. 23Tanõ, ba lõ tola miʼamawa tenga sanoetõ, me no chõgoe danṍ, niha bõʼõ sa ami ba si fatewoe chõgoe. 24Andrõ mitehe wananoe benoea, fefoe gofoe heza ba danõ andrõ, si no mõi tanõmi. 25Na tobali noemana dalifoesõoe, ba na iʼamawa osa mbenoeania, ba jamõi sananoe, salahinia, wondrege zahatõ chõnia, jamoesanoe niʼamawa dalifoesõnia andrõ. (Roet. 4, 4. Jer. 32, 7). 26Ba na so zi lõ sananoe, ba na iʼila iʼaloei ndrohoendrohoe wananoe, 27ba jamoesõbi ndrõfi andrõ aefa wamawa, ba hadia zi tosai, ba jamoefoeli ba niʼamawania jaʼia, enaʼõ mangawoeli chõnia gochõtania. 28Ba na lõ isõndra zogoena fananoe, ba lõ teboelõ chõ zowõli niʼamawania andrõ, irege dõfi waʼowoeawoea dõdõ andrõ; ba daʼõ dania aefa, tobali mangawoeli chõnia gochõtania andrõ. 29Ba na so zamawa omo, bacha barõ gõli mbanoea, ba tola ifoeli isanoe na barõ ndrõfi andrõ, niʼamawania jaʼia; irege daʼõ lafonoso ia, ba wananoe. 30Ba na lõ moesanoe irege aloea ndrõfi; ba tetoetoe danõ ba zowõli andrõ ba ba ngaʼõtõnia, ba nomo andrõ, bacha barõ gõli mbanoea, ba lõʼõ saʼae mangawoeli ba ndrõfi waʼowoeawoea dõdõ andrõ. 31Ba omo ba mbanoea sideʼide, si lõ moefasoei õli, ba si fabõbõ ba mbenoea miw̃aʼõ; tola nisanoe, ba mangawoeli na dõfi waʼowoeawoea dõdõ andrõ. 32Ba ba nomo nono Lewi andrõ — omo ba mbanoea misa, chõra — ba tetehe ba nono Lewi wananoe, gofoe ha waʼara. 33Ba na so nono Lewi si lõ mananoe jaʼia, ba mangawoeli chõnia nomo andrõ, niʼamawania, na dõfi waʼowoeawoea dõdõ andrõ, ba mbanoea si so ochõtania; omo andrõ sa, ba mbanoea nono Lewi, ba si lõ teboelõ chõra, ba hoenõ Ndraono Gizeraëli. 34Ba benoea andrõ ba zinga mbanoea chõra, ba lõ tola teʼamawa, me no chõrachõra, gõtõgõtõ waʼara, ochõta si lõ teboelõ.
35IV. Ba na tobali noemana dalifoesõoe, na awoewoe ia ba ngaioe, ba õtolo ia, amaedola niha bõʼõ, amaedola zi fatewoe, enaʼõ isõndra mbalazonia ba ngaimõ. 36Lõ tola õfohare ganaʼaoe chõnia, bõi fabali chõnia, õʼataʼoefi Lowalangioe, enaʼõ isõndra mbõli gõnia talifoesõoe, ba ngaimõ. (Moz. II. 22, 25). 37Anaʼaoe, ba lõ tola õfohare chõnia, ba õnia, nibeʼeoe, ba bõi fabali. 38Jehowa ndraʼodo, Lowalangimi, si no mangeheta jaʼami ba danõ Miseraji, ba wameʼe chõmi tanõ Ganaʼana, ba weʼamõi Lowalangimi.
39V. Ba na tobali noemana dalifoesõoe ba ngaioe ba na iʼamawa ia chõoe, ba bõi fohalõw̃õ ia halõw̃õ zawoejoe. (Moz. II. 21, 2). 40Amaedola enoni ia chõoe õbeʼe, ba amaedola zi fatewoe, jamõi ngoningonioe, irege dõfi waʼowoeawoea dõdõ andrõ. 41Ba daʼõ dania õʼefaʼõ ia, awõ ndraononia, ba ifoeli ia ba niwara, ba mangawoeli chõnia gondrõita namania. 42Enonigoe sa ira, nihetagoe, ba danõ Miseraji; lõ tola laʼamawa sawoejoe ira. 43Bõi faitoisi wamatõrõ jaʼia, õʼataʼoefi Lowalangioe. (Efes. 6, 9. Kol. 4, 1). 44Ba na omasiʼõ zawoejoe ono matoea ba sawoejoe ono alawe, ba ba niha baero, si tefasoei jaʼami — ba chõra mihõli zawoejoe ono matoea ba sawoejoe ono alawe. 45Ba he iraono zi fatewoe andrõ, ba chõmi, ba hana na mihõli õsa, awõ ngaʼõtõra andrõ, ba chõmi, si toemboe ba danõmi; hana na chõmi daʼõ. 46Ba hana na mifaʼema ba ndraonomi foerimi, ondrõita, enaʼõ ochõtara, ba hana na lõ teboelõ sawoejoemi ira. Ba ba dalifoesõmi andrõ, Iraono Gizeraëli — ba faoma bõi mifaitoisi, wamatõrõ awõmi. (Raz. I. 9, 22). 47Ba na faloecha niha bõʼõ, ba ma si fatewoe, õnaʼõna so chõnia ba ngaioe, ba na tobali noemana dalifoesõoe ba ngainia, ba na iʼamawa ia ba niha bõʼõ, ba ma ba zi fatewoe, ba ma ba ngaʼõtõ niha bõʼõ ba ngaimõ, 48ba nitehe chõnia wananoe, na no iʼamawa ia; hana na talifoesõnia zananoe jaʼia; 49ma tána mamania ba ma ono dána namania zananoe jaʼia, ba ma ha niha zabõlõ ahatõ chõnia, iwara, zananoe jaʼia, ba ma zoei, na isõndra ganaʼa, ba hana na jaʼia zananoe jaʼia. 50Ba iʼerai chõ zowõli jaʼia, iʼotarai ndrõfi, me iʼamawa ia, iroegi ndrõfi waʼowoeawoea dõdõ andrõ. Ba ba mbõli, ba balazi ha me oega fache, me iʼamawa ia; amaedola genoni ia, gõtõ weʼasonia chõnia. 51Ba na oja na ndrõfi si tosai, ba iʼerai ba wamoeli õsa, bõlinia, ba wananoe jaʼia. 52Ba na ambõ faʼoja ndrõfi si tosai, irege dõfi waʼowoeawoea dõdõ andrõ, ba iʼerai chõnia; balazi ha me oega fache ia chõnia, ha waʼeboea ifoeli, ba wananoe jaʼia. 53Amaedola zi manga gazi, dõfidõfi, ia chõnia; lõ tola õfaigi manõ lõ hedehede, na ifaitoisi wamatõrõ jaʼia. 54Ba na lõ faloecha ia wananoe si manõ, ba ba ndrõfi waʼowoeawoea dõdõ andrõ dania aefa ia, awõ ndraononia. 55Chõgoe sa Ndraono Gizeraëli, enonigoe; enonigoe, nihetagoe ba danõ Miseraji, jaʼodo andre, Jehowa, Lowalangimi.

Soera Moze III Faza 24

I. Fangehao fandroe ba famazõchi roti andrõ, nifaigifaigi. II. Fangoehoekoe sangoʼaja Lowalangi. III. Oroisa ba wolaoe balõ.

1I. Ba hoemede Jehowa chõ Moze, imane: 2W̃aʼõ ba Ndraono Gizeraëli, ndramoeʼohe chõoe zi ndroehoe wanicha mboea zai nifoefoe, fanicha wandroe andrõ, enaʼõ bõi matemate wandroe. (Moz. II. 27, 20). 3Baero mbaʼabaʼa, fombaʼa zoera goroisa, ba nose wamaʼeleʼõ, ibeʼe Aʼaroni, bõi teboelõ fõna Jehowa, iʼotarai na bongi, iroegi moloeo. Amachoita si lõ teboelõ daʼõ, gõtõgõtõ waʼara dania, nitõngõnimi, gõtõgõtõ waʼara. 4Ba naha wandroe andrõ, si ndroehoe mbalaki, ibeʼe wandroe andrõ, si lõ teboelõ fõna Jehowa. 5Ba õhalõ hamo si sõchi ba õbaliʼõ koee, felendroea ngaʼõrõ — domboea niʼofoeloe zagõrõ koee — 6ba õbahogõ ba meza si ndroehoe mbalaki andrõ, fõna Jehowa, domboea baho, õnõʼõnõ ngaʼõrõ zamboea baho. 7Ba samboesamboea baho, ba õfao zi ndroehoe goemõjõ, samoboea daʼõ, awõ roti andrõ, amaedola zoemange nifatõrõ ba galitõ, nibeʼe chõ Jehowa. 8Ero na loeo sabato ibahogõ fõna Jehowa, bõi mamalõmalõ, õmõ Ndraono Gizeraëli, si lõ teboelõ, gõtõgõtõ waʼara dania. 9Ba õ ndra Aʼaroni iraononia dania enaʼõ ba naha niʼamoniʼõ laʼā; tána chõnia sa, niʼamoniʼõ sibai, fõfõ zoemange andrõ, nifatõrõ ba galitõ; hoekoe si lõ teboelõ, gõtõgõtõ waʼara dania. (Moz. II. 29, 32. Sam. I. 21, 6. Mat. 12, 4).
10II. Ba mõi ba Ndraono Gizeraëli nono Ndraono Gizeraëli ira alawe — Dawa Miseraji namania — ba fasoso daʼõ ba Ndraono Gizeraëli bõʼõ samõsa. 11Ba iʼoʼaja dõi Jehowa ono Ndraono Gizeraëli ira alawe andrõ ba mangelifi; ba laʼohe ia chõ Moze (tõi ninania, ba Selomita, ono Dibiri, mado Dano). 12Ba lakoeroe ia, irege larongo lala, niw̃aʼõ Jehowa. 13Ba hoemede Jehowa chõ Moze, imane: 14Faʼoheʼõ baero golombasew̃a zangelifi andrõ, ba dozi samondrongo mege, ba latoefa hõgõnia tangara, ba awena laboenoe ia, lateboe kara sato fefoe. 15Ba ba Ndraono Gizeraëli, ba õmane: Ha niha zangelifi chõ Lowalanginia, ba iloeʼi horõnia. 16Ba sangoʼaja tõi Jehowa, ba hoekoe mate hoekoenia; lõʼõ sa tola lõ lateboe kara ia sato fefoe. He si fatewoe, ba he niha ba danõ na iʼoʼaja dõi Jehowa, ba niboenoe.
17III. Na so zamoenoe niha, ba hoekoe mate hoekoenia. (Moz. II. 21, 12). 18Na so zamoenoe oerifõ zageoe, ba iʼali — noso wangali noso. 19Na so zamesocho awõnia, ba nisoelõni chõnia nilaoenia: 20Safatõ wangali zafatõ, hõrõ wangali hõrõ, boha wangali mboha; nilaoenia chõ nawõnia, daʼõ nilaoe chõnia. 21Samoenoe oerifõ [sageoe], ba iʼali; ba samoenoe niha, ba niboenoe gõi. 22Ha sara hoekoe nibeʼe ba chõmi, he ba zi fatewoe, ba he ba niha ba danõ; Jehowa sa ndraʼodo, Lowalangimi. 23Ba hoemede Moze ba Ndraono Gizeraëli; ba laʼohe baero golombasew̃a zangelifi no mege ba lateboe kara. Laʼoʼõ Iraono Gizeraëli niʼoroiʼõ Jehowa chõ Moze.

Soera Moze III Faza 23

I. Oroisa ba loeo sabato. II. Owasa fasa. III. Owasa ba wamasi. IV. Owasa nilaoe torofe. V. Owasa fangatoelõ. VI. Owasa nose daha geoe.

1I. Ba hoemede Jehowa chõ Moze, imane: 2Hede ba Ndraono Gizeraëli, ba õmane chõra: Ba mbaw̃a gowasa andrõ chõ Jehowa, niw̃aʼõmi owoeloa ba gowasa ba niʼamoniʼõ — ba daʼõ mbaw̃a gowasa andrõ chõgoe: 3Õnõ ngaloeo waʼara, ba tola tehalõhalõ halõw̃õ; ba loeo si fitoe andrõ, ba baw̃a wolombase manõ, ba owoeloa ba niʼamoniʼõ andrõ; sambalõ lõ tola mihalõ halõw̃õ ba daʼõ, ba nahiami fefoe, — bawa wolombase ia chõ Jehowa. (Moz. II. 20, 10; 23, 12).
4II. Daʼõ mbaw̃a gowasa chõ Jehowa, baw̃a gowoeloa ba niʼamoniʼõ, nifarongogõmi, na no iroegi inõtõ: 5Ba mbaw̃a si fõfõna, ba zi meweleõfa, na tánõ owi, ba fasa chõ Jehowa. (Moz. II. 12, 18. 43. Moz. IV. 28, 16. Moz. V. 16, 1). 6Ba ba zi mewelelima ba mbaw̃a daʼõ, ba owasa roti si lõ moeʼaisõni chõ Jehowa; fitoe bongi waʼara miʼā roti si lõ moeʼaisõni. 7Ba mbõrõta mbaw̃a daʼõ, ba owoeloa chõmi ba niʼamoniʼõ, ba lõ tola mihalõ hadia ia halõw̃õ, na loeo daʼõ. 8Ba fitoe bongi waʼara mibeʼebeʼe zoemange Jehowa, nifatõrõ ba galitõ; ba na loeo si fitoe, ba owoeloa zoei ba niʼamoniʼõ andrõ; ba sambalõ lõ tola mihalõ halõw̃õ na loeo daʼõ. 9Ba hoemede Jehowa chõ Mose, imane: 10Hede ba Ndraono Gizeraëli, ba õmane chõra: Na no miroegi danõ andrõ, nibeʼegoe chõmi dania, ba na mamasi ami ba daʼõ, ba sambõbõ miʼohe chõ gere, si aʼa nibasi, ba ihahae ngambõbõ andrõ, 11fõna Jehowa, enaʼõ omasiõ ami ibeʼe; sara wongi aefa sabato ihahae ere. 12Ba na loeo ihahae ngambõbõ andrõ, ba mibeʼe nono mbiribiri si lõ sala, si dõfi faʼeboea, soemange nitoenoe, chõ Jehowa, 13ba samboea niʼofoeloe hamo si sõchi, nifaroeka fanicha, soemange niʼā, soemange nifatõrõ ba galitõ, samohoea chõ Jehowa, awõ zoemange nibadoe, samba selefe agoe. 14Ba roti ba bõra nifakõë ba he nifoefoe, ba lõ tola miʼā, irege loeo daʼõ, irege no mibeʼe zoemange andrõ chõ Lowalangimi. Amachoita si lõ teboelõ daʼõ, gõtõgõtõ waʼara dania, nitõrõmi, gõtõgõtõ waʼara mitooe, ba nahiami fefoe.
15III. Ba miʼerai dania mbongi, iʼotarai loeo andrõ na aefa zabato andrõ, ba nibeʼemi ngambõbõ nihahae andrõ, aloʼo fitoe migoe, (Moz. V. 16, 9), 16irege loeo aefa loeo sabato si fitoe miʼerai, 50 wongi, ba mibeʼe chõ Jehowa zoemange niʼā, fache si bohooe andrõ. 17Samba omo ami, ba domboea mibeʼe roti nihahae; roti si domboea niʼofoeloe hamo si sõchi mege, ba nibeʼe tanõmõ roti ba wamogõ jaʼia, si aʼa zoemange chõ Jehowa. 18Ba awõ roti andrõ, ba mibeʼe: fitoe rozi nono mbiribiri si lõ sala, si dõfi faʼeboea, ba sageoe nono zaw̃i si matoea, ba doea geoe mbiribiri si matoea, niʼohe soemange nitoenoe chõ Jehowa daʼõ, awõ zoemange niʼā andrõ ba soemange nibadoe, si fabõbõ ba daʼõ, soemange nifatõrõ ba galitõ, samohoea chõ Jehowa. 19Ba awõ daʼõ ba sageoe mibeʼe nambi si matoea, soemange fameta horõ, ba doea rozi nono mbiribiri, si dõfi faʼeboea, soemange fangorifi. 20Ba ihahae ere, awõ zi aʼa roti andrõ, soemange nihahae fõna Jehowa, awõ nono mbiribiri andrõ, zi doea rozi; niʼamoniʼõ chõ Jehowa daʼõ, ba tána chõ gere. 21Ba na loeo daʼõ mifarongogõ — milaoe gowoeloa ba niʼamoniʼõ; ba sambalõ lõ tola mihalõ halõw̃õ na loeo daʼõ. Amachoita si lõ teboelõ daʼõ, gõtõgõtõ waʼara dania, nitõngõnimi ba nahiami fefoe, gõtõgõtõ waʼara. 22Ba na mibasi mboea danõ, ba bõi õbasi nowi irege hinõloe ba bõi õʼozaragõ nalõw̃a, na no aefa wamasioe: faoma õloeloe ba zi noemana ba ba zi fatewoe; Jehowa ndraʼodo, Lowalangimi. (F. 19, 9).
23IV. Ba hoemede Jehowa chõ Moze, imane: 24Hede ba Ndraono Gizeraëli, õmane: Ba mbaw̃a si fitoe, ba loeo wolombase chõmi ba wasoelõna; milaoe dorofe, famasoegi ba dõdõ, ba owoeloa ba niʼamoniʼõ. (Moz. IV. 29, 1). 25Sambalõ lõ tola mihalõ halõw̃õ na loeo daʼõ, ba mibeʼe chõ Jehowa zoemange nifatõrõ ba galitõ.
26V. Ba hoemede Jehowa chõ Moze, imane: 27Ba si mewoeloe ba mbaw̃a si fitoe andrõ, ba baw̃a wangatoelõ; milaoe gowoeloa ba niʼamoniʼõ na loeo daʼõ, ba mangaloeloe ami, ba mibeʼe chõ Jehowa zoemange nifatõrõ ba galitõ. (F. 16, 29. Moz. IV. 29, 7). 28Ba na loeo daʼõ, ba sambalõ lõ tola mihalõ halõw̃õ, me baw̃a wangatoelõ, enaʼõ lafaigi chõmi wameta sala chõ Jehowa, Lowalangimi. 29Ha niha sa zi lõ mangaloeloe, na loeo daʼõ, ba niseʼe ba niwara. 30Ba ha niha zangai hadia ia halõw̃õ, na loeo daʼõ, ba oehori ba hoenõ niwara. 31Lõ tola mihalõ hadia ia halõw̃õ, na loeo daʼõ; amachoita si lõ teboelõ daʼõ, gõtõgõtõ waʼara dania, ba ngaʼõngaʼõtõ mitooe, ba nahiami fefoe. 32Baw̃a wolombase manõ miw̃aʼõ ba mangaloeloe ami. Bongibongi ba zi meziw̃a ba mbaw̃a daʼõ — iʼotarai na bongibongi, iroegi bongibongi mahemoloe — ba mitõngõni wolombase andrõ niw̃aʼõ.
33VI. Ba hoemede Jehowa chõ Moze, imane: 34Hede ba Ndraono Gizeraëli, õmane: Ba zi mewelelima ba mbaw̃a si fitoe andrõ, ba lalaoe gowasa nose daha geoe andrõ chõ Jehowa, fitoe ngaloeo waʼara. (Moz. II. 23, 16. Moz. IV. 29, 12. Moz. V. 16, 13). 35Ba mbõrõta ngaloeo daʼõ, ba owoeloa ba niʼamoniʼõ; sambalõ lõ tola mihalõ halõwõ, na loeo daʼõ. 36Fitoe bongi waʼara ba mibeʼebeʼe zoemange Jehowa, nifatõrõ ba galitõ; ba na loeo si w̃aloe, ba milaoe gowoeloa ba niʼamoniʼõ ba mibeʼe zoemange Jehowa, nifatõrõ ba galitõ — owoeloa na loeo daʼõ, ba lõ tola mihalõ hadia ia halõw̃õ. (Joh. 7, 37). 37Daʼõ ginõtõ gowasa andrõ, nifarongogõmi owoeloa ba niʼamoniʼõ, enaʼõ labeʼe zoemange Jehowa, nifatõrõ ba galitõ — soemange nitoenoe ba soemange niʼā ba soemange nitaba ba soemange nibadoe, balazi mbaw̃a nibeʼe jaʼia, 38lõ lai zabato andrõ chõ Jehowa ba lõ lai gameʼelami andrõ ba he soemange amaboeʼoela li chõmi, fefoe, ba he ameʼelami saoha gõlõ, fefoe, nibeʼemi chõ Jehowa. 39Ba ba zi mewelelima ba mbaw̃a si fitoe andrõ, na mibasi mboea danõ, ba fitoe ngaloeo milaoe gowasa andrõ chõ Jehowa; loeo si fõfõna, ba loeo wolombase ba si manõ gõi loeo si w̃aloe. 40Ba na loeo si fõfõna andrõ, ba mihalõ chõmi mboea geoe si sõchi ba boeloe nohi ba daha geoe sarege boeloe ba daha mbooe ba fitoe bongi waʼara omoeso dõdõmi fõna Lowalangimi Jehowa, 41ba ero rõfi milaoe ia, owasa chõ Jehowa, fitoefitoe bongi waʼara; amachoita si lõ teboelõ daʼõ, gõtõgõtõ waʼara dania, nitõngõnimi gõtõgõtõ waʼara: ba mbaw̃a si fitoe milaoe ia. 42Ba nose daha geoe sosó ami ba daʼõ, fitoe bongi waʼara; dozi niha ba danõ, Iraono Gizeraëli, ba baose sosó, 43enaʼõ aboto ba dõdõ ngaʼõtõmi dania, wa no baose oefaʼaso Ndraono Gizeraëli, me oeheta ira ba danõ Miseraji, jaʼodo andre, Jehowa, Lowalangimi. 44Ba iʼombachaʼõ ba Ndraono Gizeraëli ginõtõ gowasa andrõ chõ Jehowa Moze.

Soera Moze III Faza 22

I. Bõi lababaja niʼamoniʼõ ere, na raʼiõ ira. II. Ha niha zi lõ tola manga niʼamoniʼõ andrõ. III. Hadia zi tola soemange.

1I. Ba hoemede Jehowa chõ Moze, imane: 2W̃aʼõ chõ ndra Aʼaroni iraononia, ndramoeʼonangegõ ba gameʼela Ndraono Gizeraëli andrõ, niʼamoniʼõ, niʼamoniʼõra chõgoe, fa bõi laʼoʼaja dõigoe andrõ niʼamoniʼõ; Jehowa ndraʼodo. 3Õmane chõra: Na so ha niha ba ngaʼõtõmi fefoe, he gõtõ iadaʼe, ba he ba gõtõ dania, zi hatõʼõ jaʼia ba gameʼela niʼamoniʼõ andrõ, niʼamoniʼõ Ndraono Gizeraëli chõ Jehowa, fatoea raʼiõ ia, ba niseʼe ba doedoema hõrõgoe zi manõ; Jehowa ndraʼodo. 4Ha niha ba ngaʼõtõ Gaʼaroni zobooe aoeri ba ha niha zi so si hoelõ zonana no, ba lõ tola iʼā wõfõ gameʼela niʼamoniʼõ andrõ, irege ifoeli aheta chõnia waʼaraʼiõnia andrõ. Na so zi no mombambaja si no raʼiõ ba zi mate, ba ma si no ahele oela, (F. 15, 16), 5ba ma si no mombambaja koeõkoeõ, fangaraʼiõnia, ba ma niha, fangaraʼiõnia, na so hadia ia waʼaraʼiõ ba niha andrõ, 6ha niha zombambaja si mane daʼõ, ba si raʼiõ, irege bongi, ba lõ tola iʼā wõfõ gameʼela niʼamoniʼõ andrõ, na lõ mondri ia oea. 7Ba ha siʼai aechoe loeo, ba lõʼõ saʼae faʼaraʼiõ; awena tola iʼā wõfõ gameʼela andrõ niʼamoniʼõ, õnia sa atṍ daʼõ. 8Amatela ba nisasawi [goetoe ndroeʼoe], ba lõ tola iʼā, fa ihalõ faʼaraʼiõnia; Jehowa ndraʼodo. (Moz. II. 22, 31). 9Ba laʼoʼõ saʼae nifachoigoe andrõ, fa bõi lahareʼõ chõra horõ ba daʼõ, ba fa bõi mõi famoenoera, na lalaoe zalacha chõnia; Jehowa ndraʼodo, sameʼe niʼamoniʼõ jaʼira.
10II. Niha bõʼõ, ba lõ tola iʼā niʼamoniʼõ, samõsa lõʼõ; si fatewoe chõ gere ba enoninia, ba lõ tola laʼā niʼamoniʼõ. 11Ba na ihõli zawoejoe ere, ba tola iʼā wõfõ daʼõ; si manõ gõi zi toemboe jomo chõnia — jaʼira zi tola manga wõfõ gõnia. 12Ono gere alawe, nihalõ niha bõʼõ, ba lõ tola iʼā wegero andrõ, nihalõ ba gameʼela andrõ niʼamoniʼõ. 13Ba ono gere alawe, si no mate ira matoea, ba ma na nitiboʼõ ia, ba si lõ ono, sangawoeli chõ ndra amania, si mane me iraono ia, ba tola iʼā wõfõ gõ namania; ba niha bõʼõ, ba lõʼõ manõ tola iʼā daʼõ. 14Ba na so zi manga niʼamoniʼõ si tenga niʼodõdõgõ, ba samboea niʼolima inõnõ, ba ifoeli chõ gere, awõ niʼamoniʼõ andrõ. 15Ba jaʼira andrõ [ere], ba bõi lalaoe zalacha ba gameʼela Ndraono Gizeraëli andrõ niʼamoniʼõ — nihalõra si no amaedola wegero chõ Jehowa —, 16fa bõi lahareʼõ chõra horõ ba lalõra andrõ, na laʼā gameʼelara andrõ, niʼamoniʼõ; Jehowa sa ndraʼodo, sameʼe niʼamoniʼõ jaʼira.
17III. Ba hoemede Jehowa chõ Mose, imane: 18Hede chõ ndra Aʼaroni iraononia ba ba Ndraono Gizeraëli fefoe, ba õmane chõra: Na so maʼoewoe Gizeraëli, ba ma niha bõʼõ, si so ba chõra, sameʼe soemange — ameʼela amaboeʼoela li hadia ia, ba ma saoha gõlõ, nibeʼera chõ Jehowa soemange nitoenoe —, 19ba [mifaigi] enaʼõ niʼomasiʼõ ami ibeʼe: oerifõ si lõ sala, si matoea, saw̃i, ba ma ono mbiribiri, ba ma nambi. 20Si so si sala hadia ia, ba lõ tola mibeʼe; lõʼõ sa ibeʼe omasiõ ami enaʼõ. (Mal. 1, 8). 21Ba na so zameʼe chõ Jehowa soemange fangorifi, saw̃i, ba ma biribiri, he ba wanõrõ amaboeʼoela li, ba he na saoha gõlõ, ba si lõ sala nibeʼe, enaʼõ omasiõ ia ibeʼe; lõ tola so hadia ia zi sala ba chõnia. 22Si lõ hõrõ ba si no afatõ ndrotondroto zara ba si no mesocho ba sofaosa ba si so gigimõ hadia ia, ba lõ tola mibeʼe chõ Jehowa zi manõ, ba lõ tola mibeʼe ba naha wameʼe soemange, soemange Jehowa, nifatõrõ ba galitõ. (Moz. V. 15, 21). 23Ba saw̃i, ba ma biribiri si tõra faʼanaoe gahe, ba ma si tõra faʼadogodogo ba tola õbeʼe saoha gõlõ; ba na mibeʼe soemange amaboeʼoela li enaʼõ, ba lõ ibeʼe omasiõ ami. 24Ba he si no aboto bazili; ba ma si no moerasa, ba ma si no moeʼetoeʼõ, ba ma si no moefõlõ, ba lõ tola mibeʼe chõ Jehowa. Lõ tola mibaliʼõ si manõ hadia ia, ba danõmi, 25ba lõʼõ gõi tola mihalõ ba niha bõʼõ, nibeʼe õ Lowalangimi; noa sa molemba chõra zi sala — sambõ zolemba chõra — andrõ wa lõ labeʼe omasiõ ami. 26Ba hoemede Jehowa chõ Moze, imane: 27Na so zi toemboe, ma ono zaw̃i, ba ma ono mbiribiri, ba ma ono nambi, ba fitoe bongi labeʼe nifaenoe ninania, ba na no aefa zi fitoe bongi ba na ara moroi andrõ, ba omasiõ na tebeʼe soemange Lowalangi, nifatõrõ ba galitõ. 28Saw̃i ba biribiri, ba lõ tola miʼendrongagõ chõ nononia wanaba jaʼia, si ha maʼṍchõ. 29Ba na mibeʼe chõ Jehowa zoemange fangandrõ saoha gõlõ, ba mifaigi, enaʼõ omasiõ ami ibeʼe. 30Na loeo daʼõ teʼā ia; lõ tola misaigõ hadia ia, irege mahemoloe mbanoea; Jehowa ndraʼodo. 31Ba mitõngõni saʼae goroisagoe andrõ, ba miʼoʼõ; Jehowa ndraʼodo. 32Ba bõi miʼoʼaja dõigoe andrõ, niʼamoniʼõ, enaʼõ niʼamoniʼõ ndraʼo ba hoenõ Ndraono Gizeraëli; Jehowa ndraʼodo, sameʼe niʼamoniʼõ jaʼami, 33si no mangeheta jaʼami ba danõ Miseraji, ba weʼamõi Lowalangimi — jaʼodo andre, Jehowa.

Soera Moze III Faza 21

I. He lawisa ere andrõ. II. Ba he wisa ere seboea. III. Ha niha zi tebai mõi ere.

1I. Ba imane Jehowa chõ Moze: Beʼe li ba gere andrõ, iraono Gaʼaroni, õmane chõra: Lõ tola ihalõ faʼaraʼiõnia mboto zi mate ba niwara ere. 2Ha sahatõ chõnia, fondrege zahatõ, inania ba amania ba ononia matoea ba ononia alawe ba talifoesõnia matoea, 3ba talifoesõnia alawe, sahatõ chõnia, ono alawe, si lõ moehalõ na — ha daʼõ zi tola ihalõ faʼaraʼiõnia. 4Lõ tola ibeʼe raʼiõ ia ba niwara, wanõrõ salacha chõnia. 5Lõ tola latõwõ galizoezoera ba lõ tola lafaloʼo gambira ba he fogoi õsira, ba lõ tola. (F. 19, 27. 28). 6Niʼamoniʼõ chõ Lowalangira irá, ba bõi laʼoʼaja dõi Lowalangira, me sameʼe soemange Jehowa ira, soemange nifatõrõ ba galitõ, õ Lowalangira, andrõ wa niʼamoniʼõ ira. 7Sohorõhorõ ba si no moehorõni, ba tebai laʼowaloe, ba he ira alawe nitiboʼõ ndra matoea, ba lõ tola lahalõ, me no niʼamoniʼõ chõ Lowalanginia gere. (Hez. 44, 22). 8Andrõ wa niʼamoniʼõ ia chõoe, me jaʼia zameʼe gõ Lowalangioe; niʼamoniʼõ ia õw̃aʼõ; me no niʼamoniʼõ ndraʼo, jaʼodo andre, Jehowa, sameʼe niʼamoniʼõ jaʼami. 9Ba na ibõrõtaigõ mohorõ nono gere alawe, ba salacha namania ibeʼe, nitoenoe aoeri ia.
10II. Ba si no ere seboea ba dalifoesõnia, si no moelaoe ba hõgõ fanicha famajoini andrõ, si no moefoʼõsi tanga ba si no moefonoecha noecha [niʼamoniʼõ] andrõ, ba lõ tola ifehombo mboenia ba lõ tola itika noechania. (Moz. II. 28, 41). 11Lõ tola mõi ia jomo si so si mate; amania naʼi ba inania, ba lõ tola ibeʼe faʼaraʼiõnia. 12Lõ tola irõi niʼamoniʼõ andrõ, fa bõi ifatõrõ zalacha ba niʼamoniõ andrõ chõ Lowalanginia; noa sa tohare chõnia weʼamoniʼõ andrõ ba wanicha famajoini andrõ chõ Lowalanginia; Jehowa ndraʼodo. (Moz. II. 28, 38). 13Si ndroehoe nono alawe ihalõ foʼomonia, 14lacha ba nitiboʼõ ba si no moehorõni ba sohorõhorõ, ba lõ tola ihalõ; ha ono alawe iwara, zi tola ihalõ foʼomonia, 15fa bõi salacha ngaʼõtõnia ba niwara ibeʼe; Jehowa sa ndraʼodo, sameʼe niʼamoniʼõ jaʼia.
16III. Ba hoemede Jehowa chõ Moze, imane: 17Hede chõ Gaʼaroni, õmane: Na so ba ngaʼõtõoe zi so sala ba nõsinia, he gõtõ iadaʼe, ba he ba gõtõ dania, ba lõ tola mõi ia, ba wameʼe gõ Lowalanginia andrõ. 18Ha niha sa zi so hadia ia zi sala ba nõsinia, ba lõ tola mõi, he saoeʼa, ba he somboejoemboejoe tõla ba he si so sabõda, ba he sanaoe ndrotondroto, zara, 19ba he safatõ ahe, 20ba he safatõ taʼio, ba he saʼeboe, ba he si no afoeofoeo, ba he si bidõjõ, ba he sobõni, ba he si so gigimõ bõʼõ, ba he sabao bazili. 21Samõsa lõʼõ si tola mõi, ngaʼõtõ Gaʼaroni, si so si sala ba nõsinia, ba wameʼe soemange Jehowa andrõ, nifatõrõ ba galitõ; na so zi sala ba nõsinia, ba lõ tola mõi ia, ba wameʼe gõ Lowalanginia. (Heb. 7, 26). 22Ba tola sa iʼā wõfõ gõ Lowalanginia, he niʼamoniʼõ sibai andrõ, ba he ameʼela andrõ niʼamoniʼõ. 23Ha fa lõ tola mõi ia bacha barõ mbaʼabaʼa andrõ, ba lõ tola ihatõʼõ ia ba naha wameʼe soemange, me no so zi sala, ba nõsinia; fa bõi ifatõrõ zalacha ba niʼamoniʼõ andrõ chõgoe; me no Jehowa ndraʼodo, sameʼe niʼamoniʼõ jaʼia. 24Ba iw̃aʼõ daʼõ Moze chõ Gaʼaroni ba ba ndraononia ba ba Ndraono Gizeraëli fefoe.

Soera Moze III Faza 20

I. Fotoe na mameʼe adoe ba na mohorõ. II. Bõi oroedoe ira ba niha baero.

1I. Ba hoemede Jehowa chõ Moze, imane: 2Õw̃aʼõ ba Ndraono Gizeraëli: Dozi Iraono Gizeraëli, awõ niha bõʼõ si so ba chõra, na so zameʼe ba Molocho andrõ ononia, ba hoekoe mate hoekoenia; lateboe kara ia niha ba danõ. (F. 18, 21). 3Ba oedoenia ndraʼodo, ba oeseʼe ia ba niwania, bõrõ me no ibeʼe ba Molocho andrõ nononia, ba wameʼe raʼiõ niʼamoniʼõ andrõ chõgoe, ba ba wangoʼaja tõigoe andrõ, niʼamoniʼõ. 4Ba na laʼosilõmilagõ enaʼõ niha ba danõ nilaoe niha si manõ, na ibeʼe ba Molocho andrõ nononia, fa lõ laboenoe ia, 5ba oedoenia sa atṍ ndraʼodo ba oedoe ngaʼõtõnia, ba oeseʼe ia ba niwara, fabaja dozi loloʼõ chõnia, ba wameʼe adoe andrõ, wamosoemange Molocho andrõ. 6Ba ha niha zi mõi ba zogawi bechoe ba ba zi faeta, si no amaedola zohorõ chõra, ba oedoenia ndraʼodo ba oeseʼe ia ba hoenõ niwara. (F. 19, 31). 7Ba miʼamoniʼõ ami, enaʼõ niʼamoniʼõ ami; Jehowa sa ndraʼodo, Lowalangimi. 8Andrõ mitõngõni nifachoigoe andrõ, ba miʼoʼõ; Jehowa ndraʼodo, sameʼe niʼamoniʼõ jaʼami. 9Dozi, ha niha zangelifi amania ba inania, ba hoekoe mate hoekoenia; noa sa iʼelifi namania ba inania — horõ fangeʼe zi no tohare chõnia. (Moz. II. 21, 17). 10Ba na so zohorõni donga zodonga, ha niha zohorõni donga nawõnia, ba hoekoe mate hoekoera, he sohorõ, ba he nihorõni andrõ. (F. 18, 20. Joh. 8, 5). 11Ba na so zoroedoe chõ woʼomo namania, ba no iheta mbaloebaloe zaila namania ba hoekoe mate hoekoera, faoma daroea ira; amaedola horõ fangeʼe zi no tohare chõra. (F. 18, 8). 12Ba na so zohorõni oemõnõnia, ba hoekoe mate hoekoera, faoma daroea ira; no horõ seboea nifazõchira, amaedola horõ fangeʼe zi no tohare chõra. (F. 18, 10). 13Ba na so zoroedoe ba ndra matoea, si mane faʼoroedoe ba ndra alawe, ba no horõ seboea nifazõchira, faoma daroea ira, ba hoekoe mate hoekoera, no amaedola horõ fangeʼe zi no tohare chõra. (F. 18, 22). 14Ba na so zangai ira alawe ba na ihalõ gõi nina, ba horõ seboea daʼõ; nitoenoe aoeri ia, awõ ndra alawe andrõ, fa bõi mamaha ba chõmi horõ. (F. 18, 17). 15Na so zohorõni saliw̃aliw̃a ba danõ ba hoekoe mate hoekoenia, ba saliw̃aliw̃a ba danõ andrõ gõi, ba miboenoe. (F. 18, 23). 16Ba na ihatõʼõ ia ba zaliw̃aliw̃a ba danõ ira alawe, enaʼõ oroedoe chõnia, ba õboenoe ndra alawe andrõ, awõ zaliw̃aliw̃a ba danõ andrõ; hoekoe mate hoekoera, no amaedola horõ fangeʼe zi no tohare chõra. 17Ba na so zangai talifoesõnia, ono namania, ba ma ono ninania, na tobali iʼila zaila ia ba na iʼila gõi daʼõ zaila ndra matoea, ba no salacha, ba nihori ira, ba zanehe niwara; no iheta mbaloebaloe zaila dalifoesõnia ba no tohare chõnia horõ ibeʼe. (F. 18, 9). 18Ba na so zoroedoe ba ndra alawe gõtõ waʼafõchõ daloenia, na iheta mbaloebaloe zaila ia, baloebaloe goemboe andrõ chõnia, ba na jaʼia gõi zangeheta baloebaloe goemboe ndro andrõ chõnia, ba nihori ira ba hoenõ niwara, faoma daroea ira. (F. 18, 19). 19Saila dalifoesõ ninaoe ba saila dalifoesõ namaoe, ba tebai õheta mbaloebaloe; sangeheta baloebaloe wondrege zahatõ chõnia zi manõ, ba no tohare chõra horõ labeʼe. (F. 18, 12). 20Ba na so zoroedoe chõ woʼomo dalifoesõ namania, ba no iheta zaila dána namania, ba no tohare chõra horõ labeʼe — si mate lõ ono ira. (F. 18, 14). 21Ba na so zangai foʼomo dalifoesõnia, ba salacha daʼõ; no sangeheta saila dalifoesõnia ia — si mate lõ ono ira. (F. 18, 16).
22II. Ba mitõngõni saʼae nifachoigoe andrõ, fefoe, awõ hoekoe andrõ chõgoe, fefoe, ba miʼoʼõ, fa bõi iʼoetaʼõ ami tanõ, ba niʼohegoe jaʼami dania, enaʼõ mowanoea ami ba daʼõ. 23Bõi miʼoʼõ hoekoe niha andrõ, nitimbagoe fõnami, me no lalaoe daʼõ fefoe, irege ogorodo ira. (F. 18, 28). 24Andrõ wa oemane chõmi: Chõmi dania danõra, oebeʼe ochõtami — tanõ si falawoe soesoe ba w̃e w̃ani, jaʼodo andre, Jehowa, Lowalangimi, si no mangoniagõ jaʼami ba niha baero. 25Ba mifaehoesi saʼae ira zi õfa ahe salacha zi tenga salacha, ba he fofo salacha ba si tenga salacha, ba bõi mibeʼe niʼogorofi ami ba zi õfa ahe, ba ma ba wofo, ba ma ba ngawalõ hadia ia, saliw̃aliw̃a ba danõ, niʼoniagõgoe, enaʼõ salacha ia miw̃aʼõ. 26Ba niʼamoniʼõ ami chõgoe, me no niʼamoniʼõ ndraʼo, jaʼodo andre Jehowa, ba no oeʼoniagõ ami ba niha baero, enaʼõ tána chõgoe ami. 27Ba na so ndra matoea, ba ma ira alawe si so bechoe ba wogawi bechoe bõʼõ, ba ma si so bechoe waetasa, ba hoekoe mate hoekoera, niteboe kara; no horõ fangeʼe, si tohare chõra.

Soera Moze III Faza 19

I. Oroisa: enaʼõ laʼamõniʼõ ira chõ Jehowa Iraono Gizeraëli. II. Amachoita ba wangomasiʼõ awõ. III. Ama hoita bõʼõ: ba danõ ba ba hoekoe niha baero, ba ba zi fatewoe ba ba zoeʼasoeʼa ba ba zaga.

1I. Ba hoemede Jehowa chõ Moze, imane: 2Hede ba mbanoea Ndraono Gizeraëli fefoe, ba õmane chõra: Janiʼamoniʼõ ami, me no niʼamoniʼõ ndraʼodo, jaʼodo andre, Jehowa, Lowalangimi. (Moz. II. 22, 31). 3Ja moeʼataʼoefi ninania, awõ namania zamõsana ba mitõngõni loeo wolombase andrõ chõgoe; Jehowa ndraʼodo, Lowalangimi. (Moz. II. 20, 12; 31, 13). 4Bõi miʼotahõgõ nadoe ba bõi mifazõchi chõmi Lowalangi nifahele, jaʼodo Jehowa, Lowalangimi. (Moz. II. 34, 17). 5Ba na mitaba zoemange fangorifi chõ Jehowa, ba mifaigi wameʼe, enaʼõ omasi ia ami. 6Na loeo wameʼemi jaʼia teʼā ia, ba mahemoloe õ; ba hadia zi tosai irege ba zi doea wongi, ba nitoenoe. (F. 7, 15). 7Ba na teʼā zoei ba zi doea wongi, ba no amaedola zobooe, ba tenga omasiõ. 8Ha niha zi manga, ba ihalõ horõnia; noa sa ilaoe zalacha ba niʼamoniʼõ chõ Jehowa, ba niseʼe ba niwara niha si manõ.
9II. Na mibasi mboea danõ chõmi, ba bõi basi irege hinõloe ba bõi ozaragõ nalõw̃a, na no aefa wamasioe. 10Ba he woʼoewoʼoe ba kaboe nagoe chõoe ba he boea satoroe ba danõ ba kaboe nagoe chõoe, ba bõi ozaragõ: õloeloe ba zi noemana ba ba zi fatewoe; jaʼodo Jehowa, Lowalangimi. 11Bõi managõ ami ba bõi mofaja ba bõi falimo, (Moz. II. 20, 15. Efes. 4, 25. Kol. 3, 9. Tes. I. 4, 6). 12Bõi mõi ba hõloe, ba dõigoe, na faja, wangoʼaja tõi Lowalangimõ; Jehowa ndraʼodo. (Moz. II. 20, 7. Mat. 5, 33). 13Bõi limo nawõoe ba bõi osindraʼoei hadia ia chõnia; loeo genoni, ba lõ tola õtaha irege mahemoloe mbanoea. (Moz. V. 24, 15. Jak. 5, 4). 14Bõi elifi zafiso ba bõi baʼa lala zaoeʼa; õʼataʼoefi Lowalangioe; Jehowa ndraʼodo. (Moz. V. 27, 18). 15Bõi mifoejoeʼõ hoekoe, na tefatoenõ hoehoeo; bõi õʼawõgõ zi noemana ba bõi faigifaigi mbawa zalaw̃a, õʼatoelõʼõ wangefoeʼõ hoekoe chõ nawõoe. (Moz. V. 1, 17; 16, 19). 16Bõi samõbõgõ si lõ doehoe ndraʼoegõ ba niwamõ ba bõi āndrõ wamoenoe awõoe; Jehowa ndraʼodo. (Moz. II. 23, 1). 17Bõi so ba dõdõoe watioesa chõ dalifoesõoe; õfahede nawõoe, bõi aiwõʼõ; bõi õfaloeʼigõ chõoe horõ, bõrõ ia. (Joh. I. 2, 11; 3, 15. Mat. 18, 15). 18Bõi omasi ndraʼoegõ wolaoe balõ, ba bõi beʼe boeʼoe dõdõ ba niwaoe hadia ia. Õʼomasiʼõ nawõoe, si mane fangomasiʼõmõ jaʼoegõ; Jehowa ndraʼodo. (Mat. 5, 39. Rom. 12, 19. Tes. I. 5, 15. Jak. 2, 8). 19Nifachoigoe, ba mitõngõni: lõ tola õʼoroedoegõ zi doea balõ oerifõoe, ba wamoʼono, ba lõ tola õfachõjõ zi doea balõ sinanõ ba nowioe, ba lõ tola õʼobaroe mbaroe, si doea balõ bana mege ba wanoso jaʼia. (Moz. V. 22, 9). 20Na so zoroedoe ba ndra alawe, si no sawoejoe niha bõʼõ, si lõ moehõli, si lõ moeʼefaʼõ, ba nichaoe ira; ba tenga sa niboenoe, me no tenga niʼefaʼõ ia. 21Ba iʼohe chõ Jehowa, ba zinga mbawandroehõ nose wamaʼeleʼõ, ogaoetania mbiribiri si matoea, soemange fameta horõ. 22Ba ifaigi chõnia wameta sala chõ Jehowa ere ba mbiribiri andrõ, soemange fameta horõ, ba horõ andrõ, nifazõchinia; ba tebeʼe aefa chõnia horõ andrõ, nifazõchinia.
23II. Na miroegi dania danõ, ba na mitanõ ngawalõ geoe sowoea, ba bõi miteoe gamaedola ”goeli” andrõ — si aʼa mboea —. Medõloe fache waʼara, ba si lõ moeboto miw̃aʼõ, ba lõ tola teʼā mboea. 24Ba ba ndrõfi fanete zi medõloe fache, ba niʼamoniʼõ mboeania fefoe, fangandrõ saoha gõlõ. 25Ba ba ndrõfi fanete zi mendrõfa, ba tola miʼā mboea, enaʼõ tedooe mboeania chõmi; Jehowa ndraʼodo, Lowalangimi. 26Bõi miʼā hadia ia fabaja do. Bõi faeta ami ba bõi fakelemoe. (F. 3, 17. Moz. V. 18, 10). 27Bõi miʼogaolo wanõwõ boemi, ba bõi mifaloʼo gambimi. (F. 21, 5. Hez. 44, 20). 28Bõi michoi nõsimi, na so zi mate, ba bõi misoea goelimi; Jehowa ndraʼodo. 29Bõi beʼe ba zalacha nonooe alawe, wamarooe jaʼia ba wohorõ, enaʼõ bõi mohorõ danõ ba enaʼõ bõi anõnõ horõ. 30Loeo wolombase andrõ chõgoe, ba mitõngõni, ba miʼataʼoefi niʼamoniʼõ andrõ chõgoe; Jehowa ndraʼodo. 31Bõi miʼae ba zogawi bechoe ba ba zi faeta; bõi misofoe chõra hadia ia, fa bõi raʼiõ ami ba chõra mibeʼe; Jehowa ndraʼodo, Lowalangimi. (F. 20, 6. Sam. I. 28, 8). 32Na so zi no tohare hoewa, ba maoso ndraʼoegõ ba õfosoemange zatoea ba õʼataʼoefi Lowalangimõ; Jehowa ndraʼodo.
33III. Ba na so zi fatewoe chõoe, ba danõmi, ba bõi mifakao ia. 34Ja si mane awõmi niha ba danõ niha bõʼõ andrõ, si so ba chõmi, miw̃aʼõ, õʼomasiʼõ ia, si mane fangomasiʼõmõ jaʼoegõ, noa sa si fatewoe gõi ami ba danõ Miseraji no; Jehowa ndraʼodo Lowalangimi. 35Bõi mifoejoeʼõ hoekoe, na tefatoenõ hoehoeo, ba bõi falimo ba helo, ba ma ba zaga, ba ma ba laoeroe. (Moz. V. 25, 15). 36Faliëra satoelõ ba saga satoelõ ba laoeroe satoelõ ba toemba satoelõ mifake; Jehowa ndraʼodo, Lowalangimi, si no mangeheta jaʼami ba danõ Miseraji. 37Mitõngõni saʼae nifachoigoe andrõ, fefoe, awõ hoekoe andrõ chõgoe, fefoe, ba miʼoʼõ; Jehowa ndraʼodo.

Soera Moze III Faza 18

I. Bõi laʼoʼõ hoekoe niha baero. II. Bõi oroedoe ira ba ndra alawe sahatõ chõra ba bõi lahalõ. III. Fanenaw̃a fohorõni donga zodonga ba horõ bõʼõ ba hadia ia na zi lõ sõchi ba niha baero.

1I. Ba hoemede Jehowa chõ Moze, imane: 2Hede ba Ndraono Gizeraëli ba õmane chõra: Jaʼodo Jehowa, Lowalangimi. 3Bõi miʼoʼõ wolaoe ba danõ Miseraji, ba zi so ami mege, ba bõi gõi miʼoʼõ wolaoe ba danõ Ganaʼana, ba niʼohegoe jaʼami dania; bõi mitõrõ hoekoe chõra. 4Hoekoe chõgoe miʼoʼõ ba nifachoigoe mitõngõni ba mitõrõ; no jaʼodo Jehowa, Lowalangimi. 5Andrõ mitõngõni nifachoigoe, awõ hoekoe chõgoe: ba zoloʼõ jaʼia mõi fangorifi ia; Jehowa ndraʼodo. (Hez. 20, 11. Rom. 10, 5. Gal. 3, 12).
6II. Bõi jamoehatõʼõ ia ha niha ba ndra alawe sabõlõ ahatõ chõnia, bõi jamoeheta mbaloebaloe zaila ia; Jehowa ndraʼodo. 7Saila namaoe ba saila ninaoe, ba tebai õheta mbaloebaloe; no inaoe, lõ tola õheta mbaloebaloe zaila ia. (Moz. I. 19, 33). 8Saila woʼomo namaoe, ba lõ tola õheta mbaloebaloe, no saila namaoe. (F. 20, 11. Moz. V. 27, 20). 9Saila nachioe, ono namaoe, ba ma ono ninaoe, he ono jomo, ba he baero mege toemboe ia — lõ tola õheta mbaloebaloe zaila ia. (Moz. V. 27, 22. Sam. II. 13, 14). 10Saila nono nonooe matoea ba saila nono nonooe alawe — lõ tola õheta mbaloebaloe zaila ia; noa sa saila ndraʼoegõ. 11Saila nono woʼomo namaoe, ono namaoe — lõ tola õheta mbaloebaloe zaila ia; no talifoesõoe. 12Saila dalifoesõ namaoe alawe, ba lõ tola õheta mbaloebaloe; no fondrege zahatõ chõ namaoe. (F. 20, 19). 13Saila dalifoesõ ninaoe alawe, ba tebai õheta mbaloebaloe, noa sa fondrege zahatõ chõ ninaoe. 14Saila dalifoesõ namaoe matoea, ba tebai õheta mbaloebaloe, lõ tola õhatõʼõgõ chõ woʼomonia; no inaoe. (F. 20, 20). 15Saila noemõnõoe, ba tebai õheta mbaloebaloe: no foʼomo nonooe, tebai õheta mbaloebaloe zaila ia. (Moz. I. 38, 18. Hez. 22, 11). 16Saila woʼomo dalifoesõoe, ba tebai õheta mbaloebaloe, no saila dalifoesõoe. (Mat. 14, 4). 17Saila ndra alawe ba saila nononia alawe, ba tebai faoma õheta mbaloebaloe; ono nononia matoea ba ono nononia alawe, ba lõ tõla õhalõ, wameta baloebaloe zaila ia; no fondrege zahatõ chõoe ira — horõ seboea daʼõ. (F. 20, 14). 18Ba lõʼõ gõi tola õfakaeroea zi fatalifoesõ, wamobõrõ faʼoedoesa, na õheta zaila ia, ba ngai zi samboea, fatoea aoeri ia. (Moz. I. 29, 27).
19III. Lõ tola õhatõʼõgõ ba ndra alawe, ba wameta baloebaloe zaila ia, gõtõ waʼaraʼiõnia andrõ. (F. 20, 18. Hez. 22, 10). 20Lõ tola oroedoe ndraʼoegõ chõ woʼomo nawõoe, wangai faʼaraʼiõ chõoe. (F. 20, 10. Sam. II. 11, 4). 21Lõ tola õbeʼe nonooe, ba wameʼe soemange Molocho andrõ jaʼia, fa bõi õʼoʼaja dõi Lowalangioe; Jehowa ndraʼodo. (F. 20, 2. Raz. II. 17, 17). 22Lõ tola oroedoeʼõ ba ndra matoea, lala waʼoroedoe ba ndra alawe; sogoro ita zi manõ. (Moz. I. 19, 5. F. 20, 13. Rom. 1, 27). 23Ba zaliw̃aliw̃a ba danõ, ba lõ tola oroedoeʼõ, wangai faʼaraʼiõ chõoe; ba ira alawe, ba lõ tola iʼedogõ ia ba zaliw̃aliw̃a ba danõ, enaʼõ oeroedoe chõnia; horõ seboea zi manõ. (Moz. V. 27, 21). 24Ba daʼõ fefoe, ba bõi mihalõ waʼaraʼiõ chõmi; noa sa daʼõ fefoe mbõrõ waʼaraʼiõ niha baero, nitimbagoe fõnami. (Raz. II. 17, 15). 25Ba daʼõ raʼiõ danõ, ba ba chõnia oehoekoe golalõw̃ania, tobali iʼoetaʼõ zowanoea ba chõnia tanõ. 26Ba mitõngõni saʼae nifachoigoe andrõ, awõ hoekoe andrõ chõgoe, ba sambalõ bõi milaoe zogoro ita andrõ, he niha ba danõ, ba he niha bõʼõ, si so ba chõmi. 27Noa sa lafazõchi horõ andrõ fefoe niha ba danõ, fõnami, ba no raʼiõ danõ; 28fa bõi iʼoetaʼõ ami tanõ, na raʼiõ ami, mibeʼe, si mane fangoetaʼõnia soi niha andrõ fõnami. 29Ha niha sa zolaoe sambalõ andrõ, sogoro ita — ba niseʼe ba niwara zolaoe jaʼia. 30Ba miʼoʼõ nifachoigoe andrõ, fa bõi miʼohiaʼõ hoekoe andrõ, sihocha mboeda, nilaoe fõnami, wangai faʼaraʼiõ chõmi; Jehowa ndraʼodo, Lowalangimi.