Showing posts with label Moze IV. Show all posts
Showing posts with label Moze IV. Show all posts

Soera Moze IV Faza 36

I. He wisa wameʼe nihalõ ono alawe andrõ sanema ondrõita. II. Ono Zelofadi andrõ.

1I. Ba so zatoea ngaʼõtõ ndraono Gileadi andrõ, ono Machiro ono Manase, ngaʼõtõ ndraono Josefo andrõ; so niw̃aʼõra chõ Moze ba ba zalaw̃a, satoea mado Ndraono Gizeraëli, lamane: 2No iw̃aʼõ chõoe Jehowa, jaʼoegõ Toea, dahõdahõ mbalazi ba wameʼe ba Ndraono Gizeraëli tána chõra tanõ; ba noa gõi õtema goroisa chõ Jehowa, jaʼoegõ Toea, ondrõita niwama Selofadi andrõ, ba õbeʼe ba nononia alawe. (F. 27, 7. Jos. 17, 4). 3Ba na mado Ndraono Gizeraëli bõʼõ zangai jaʼira, ba tobali aefa ba dána chõ niwama dána chõra tanõ andrõ, ba mõi ba dána ba mado andrõ sangai jaʼira, ba teʼambõsi dána chõma andrõ. 4Ba iroegi dania dõfi waʼowoeawoea dõdõ andrõ, ba tobali tefabõbõ ba dána ba mado andrõ, sangai jaʼira, dána chõra, ba aheta ba dána niwama. 5Ba ibeʼe li ba Ndraono Gizeraëli Moze, dali niw̃aʼõ Jehowa, imane: Si ndroehoe niw̃aʼõ ngaʼõtõ ndraono Josefo andrõ. 6Daʼõ niʼoroiʼõ Jehowa, ba ndraono Zelofadi andrõ: Hana na heza zomasi ira mõi nihalõ irá, asala iwara zangai jaʼira, 7fa bõi tefa ema ba mado bõʼõ chõra dána ba Ndraono Gizeraëli tanõ; dozi Iraono Gizeraëli, ba bõi labõhõli dána ba niwara. 8Ba dozi ono alawe sanema ondrõita ba mado Ndraono Gizeraëli heza, ba ba niwara mõi nihalõ ira, fa bõi aefa ba Ndraono Gizeraëli fefoe gondrõita ndra amara; 9ba bõi tefaʼema ba mado si samboea dána ba zi samboea; dozi mado Ndraono Gizeraëli, ba bõi ndra moebõhõli dána chõra andrõ.
10II. Ba ono Zelofadi andrõ, ba laʼoʼõ niw̃aʼõ Jehowa chõ Moze, 11Mala andrõ ba Tirisa ba Hogela ba Milika ba Noa, ba si fasamba ama chõra zangai. 12Ngaʼõtõ ndraono Manase andrõ, ono Josefo, zangai jaʼira, tobali lõ teboelõ ba madora dána chõra tanõ, ba mado ndra amara. 13Daʼõ goroisa Jehowa, ba daʼõ nifachoinia ba zaloʼo tanõ Ndraono Moabi andrõ, ba ndraso Joridano, ba gamaoedoe Jericho, nifaw̃aʼõgõnia chõ Moze.

Soera Moze IV Faza 35

I. Banoea Nono Lewi andrõ. II. Banoea fangorifi. III. He lawisa ba zangeʼe.

1I. Ba hoemede Jehowa chõ Moze, ba zaloʼo tanõ Ndraono Moabi andrõ, ba ndraso Joridano, ba gamaoedoe Jericho, imane: 2Beʼe li ba Ndraono Gizeraëli, enaʼõ latehe banoea Nono Lewi, nahiara, mbanoea tána chõra õsa; ba ba mbanoea andrõ ba Nono Lewi, ba mifao mbenoea si tefasoei jaʼira, nidoedoera oerifõ. (Jos. 21, 2). 3Ba banoea andrõ, ba nahiara, ba benoea, ba ba goerifõra sonoro ba ba ngawalõ goerifõra bõʼõ. 4Ba benoea andrõ ba zinga mbanoea, nitehemi ba Nono Lewi, ba hõnõ hela waʼebolo, iʼotarai gõli mbanoea fasoei, mibeʼe. 5Ba misoeʼa baero mbanoea, tánõ ba gatoemboecha, ba 2000 hela, ba si manõ gõi tánõ raja, 2000 hela, ba tánõ ba gaechoela loeo 2000 hela ba tánõ jõoe 2000 hela, ba daloe bacha so mbanoea. Daʼõ mbenoea chõra, ba zinga mbanoea, nidoedoera oerifõra. 6Ba ba mbanoea adrõ nitehemi ba Nono Lewi, ba õnõ mitehe banoea fangorifi, enaʼõ ba daʼõ isaw̃a woloi si no mamoenoe niha; ba 42 na baero õ mitehe chõra. 7Faʼoja mbanoea fefoe, nitehemi ba Nono Lewi, ba 48 mbanoea, awõ mbenoea andrõ, nifao ba daʼõ. 8Mado Ndraono Gizeraëli sato niha, ba oja latehe banoea tána chõra, ba sambõ faʼato, ba faʼonaigõ; balazi waʼebolo danõ, nibeʼe chõra, tána chõra, ba wamaigi ha oega mbanoea, nitehe zi samboea mado ba Nono Lewi.
9II. Ba hoemede Jehowa chõ Moze, imane: 10Hede ba Ndraono Gizeraëli ba õmane chõra: Na no miʼõtõ Joridano, na no miroegi danõ Ganaʼana, 11ba miw̃aʼõ mbanoea si gõna, enaʼõ banoea fangorifi chõmi; ba daʼõ jamoesaw̃a si no mangeʼe, si no manoenoe niha, si lõ moeʼodõdõgõ. (Moz. II. 21, 13). 12Saw̃atõ chõmi mbanoea andrõ, ba zolaoe balõ, fa bõi laboenoe zangeʼe andrõ, lõ moeʼetoeʼõ hoekoe ba waloechata mbanoea. 13Ba banoea fangorifi andrõ, nitehemi, ba õnõ. 14Tõloe mitehe banoea jefo Joridano ba tõloe gõi ba danõ Ganaʼana. Banoea fangorifi dania. (Moz. V. 4, 41. Jos. 20, 7). 15Saw̃atõ mbanoea andrõ, si õnõ, he ba Ndraono Gizeraëli, ba he ba niha bõʼõ, ba zi fatewoe gana ba chõmi, enaʼõ ba daʼõ lasaw̃a dozi si no mamoenoe niha, si lõ moeʼodõdõgõ.
16III. Ba na fakake siʼõli wamõzinia jaʼia, wamoenoe jaʼia, ba no sangeʼe ia, ba sangeʼe, ba niboenoe gõi. (Moz. II. 21, 12). 17Ba na no igõnaisi kara, wamoenoe jaʼia, kara si so ba dangania mege, sichamõ famoenoe niha, ba no sangeʼe, ba niboenoe gõi. 18Ba na no ibõzi fakake eoe, wamoenoe jaʼia, fakake si so ba dangania mege, sichamõ famoenoe niha, ba no sangeʼe ia, ba sangeʼe, ba niboenoe gõi. 19Ba solaoe balõ zamoenoe sangeʼe andrõ; na fachamõ ia chõnia, ba jamoeboenoe. 20Ba na no itoeliʼõ bõrõ ba watioesa, ba ma na no ihaloeni hadia ia, niʼodõdõgõ, wamoenoe jaʼia, (Moz. V. 19, 11), 21ba ma na igoechoei, bõrõ ba watioesa, wamoenoe jaʼia, ba niboenoe gõi zogoechoei jaʼia; no sangeʼe; solaoe balõ zamoenoe sangeʼe andrõ, na fachamõ ia chõnia. 22Ba na no itoeliʼõ lõ moeʼõdõdõgõ, lõ fatioesa, ba ma na no ihaloeni hadia ia, lõ moeʼodõdõgõ, ma kara, 23sichamõ famoenoe niha, igõnaisi, wamoenoe jaʼia, ba na lõ si fatioe dõdõnia chõnia, na tenga tõdõnia wolaoe chõnia si lõ sõchi, 24ba banoea zamatoenõ hoehoeora sangeʼe solaoe balõ, 25ba ndramoeʼorifi zangeʼe andrõ banoea, ba zolaoe balõ andrõ; lafaʼoheʼõ mangawoeli ia ba mbanoea andrõ, nisaw̃ania woloi, ba wangorifi jaʼia, ba jamoeʼiagõ daʼõ, irege mate gere seboea andrõ, nibajoini fanicha niʼamoniʼõ. 26Ba na iheta ia ba danõ mbanoea andrõ, nisaw̃ania, 27saoeri ia, ba na fachamõ chõnia zolaoe balõ, baero danõ mbanoea andrõ, saw̃atõnia, ba na iboenoe dania zangeʼe andrõ solaoe balõ, ba lõ horõnia. 28Sangiagõ banoea andrõ saw̃atõnia sa zangeʼe andrõ, irege mate gere seboea, ba na no mate gere seboea, ba tola mangawoeli ba dána chõnia zangeʼe andrõ. 29Daʼõ hoekoe ba chõmi dania, gotõgõtõ waʼara dania, ba mbanoeami fefoe. 30Na so zamoenoe niha, ba niboenoe zangeʼe andrõ, balazi hadia niw̃aʼõ zi so ba mbõrõ; ba tebai teboenoe niha, na ha samõsa zi so ba mbõrõ. (Moz. V. 19, 15). 31Ba lõ tõla mitema hõli nosonia ba zangeʼe, niboenoe enaʼõ; niboenoe saʼae ia. 32Ba lõʼõ gõi tola mitema hõli, fa alacha lõ isaw̃a mbanoea andrõ, saoeari ia, fa tola mangawoeli ia, fa tola iʼiagõ heza ba danõ, fatoea lõ si mate gere seboea. 33Ba bõi mibeʼe raiʼõ danõ andrõ si so ami; do andrõ, ba raʼiõ danõ ibeʼe, ba lõʼõ sa aheta ba danõ zala andrõ, ba ndro andrõ, na tenga ba ndro niha andrõ, sameʼe adoewa jaʼia. 34Ba bõi mibeʼe raʼiõ danõ andrõ, si so ami, si so jaʼodo gõi: ba hoenõ Ndraono Gizeraëli sa so ndraʼo, jaʼodo andre, Jehowa.

Soera Moze IV Faza 34

I. Ola danõ Ganaʼana. II. He wisa wamaosa tanõ.

1I. Ba hoemede Jehowa chõ Moze, imane: 2Beʼe li ba Ndraono Gizeraëli, õmane chõra: Na miroegi danõ Ganaʼana andrõ, ba tanõmi dania daʼõ, si mõi chõmi ba ba ngaʼõtõmi mitooe: tanõ Ganaʼana andrõ, maʼasagõrõ. 3Ola tánõ raja, ba iʼotarai danõ si mate Sini mibeʼe, sangehene tanõ Ndraono Gedomo; bõrõta nola raja tánõ ba gatoemboecha loeo, ba balõ ziloeaʼasi nasio. 4Ba itõrõ raja Akerabi olami andrõ, isaw̃a misa Zini, ba tetohoegõ, iroegi mbalõnia, raja Gadesi Mbarenea. Ba noemalõ ba Hasara Adara, ba misa ba Asemona. 5Ba moroi ba Asemona, ba itoetoeroe mbombo Miseraji andrõ, irege ba mbewe nasi aetoe. 6Ba ola tánõ ba gaechoela loeo chõmi, ba asi seboea andrõ; daʼõ nolami tánõ ba gaechoela. 7Ba olami tánõ jõoe, ba iʼotarai nasi seboea, noemalõ ba hili Hori mibeʼe ia; 8ba iʼotarai hili Hori, ba miroegi lala ba Hamata, ba balõ nola, ba Sedadi. 9Ba itõrõ Ziferono, ba iroegi Hasara Enana, balõnia. Daʼõ nolami tánõ jõoe. 10Ba ola tánõ ba gatoemboecha loeo nibeʼemi, ba iʼotarai Hasara Enana ba isaw̃a Zefama. 11Ba iʼotarai Zefama, ba noemalõ mitooe ba Haribela, tánõ ba gatoemboecha, iʼotarai Gaʼini; ba noemalõ mitooe na ba ihene mboto hili andrõ, tánõ ba gatoemboecha iʼotarai mbaw̃a Kinereti. 12Ba noemalõ mitooe ba mbewe Joridano nola, iroegi ziloeaʼasi nasio, balõnia. Daʼõ nola danõmi, fasoei. 13Ba ibeʼe li ba Ndraono Gizeraëli Moze, imane: Daʼõ danõ andrõ, nifosasi chõmi, tána chõmi, balazi dahõdahõ, niw̃aʼõ Jehowa, nibeʼe ba zi siw̃a mado a matonga andrõ. 14Ba mado Roebeno andrõ, fatalifoesõta andrõ chõra, ba mado Gado, fatalifoesõta andrõ chõra, ba si matonga mado Manase, ba no latema dána chõra. 15Si domboea mado a motonga, ba jefo Joridano tánõ ba gatoemboecha, ba gamaoedoe Jericho no latema dána chõra.
16II. Ba hoemede Jehowa chõ Moze, imane: 17Daʼõ dõi zamaosa tanõ chõmi: Eleazari ere andrõ ba Josoea, ono Noeni. 18Ba samõsamõsa zamboesamboea mado miw̃aʼõ awõra, salaw̃a, ba wamaosa tanõ andrõ. 19Ba daʼõ dõi daʼõ: Ba mado Joeda, ba Kalebi andrõ, ono Jefoene. 20Ba ba mado Zimeoni, ba Samoeeli, ono Gamihoedi. 21Ba ba mado Mbenijami, ba Elidado, ono Giselono. 22Ba salaw̃a ba mado Dano, ba Boeki, ono Jogelisi. 23Ba ba ndraono Josefo andrõ: salaw̃a ba mado Manase, ba Haniëli, ono Gefodi. 24Ba salaw̃a ba mado Geferaji, ba Kemoeëli, ono Zifetano. 25Ba salaw̃a ba mado Zeboeloni, ba Elisafa, ono Waranachi. 26Ba salaw̃a ba mado Isasari, ba Falatiëli, ono Gasana. 27Ba salaw̃a ba mado Gaseri, ba Ahihoedi, ono Zelomi. 28Ba salaw̃a ba mado Nafetali, ba Fedaheli, ono Gamihoedi. 29Daʼõ ira, ba niw̃aʼõ Jehowa famaosa ba Ndraono Gizeraëli tána chõra ba danõ Ganaʼana andrõ.

Soera Moze IV Faza 33

I. Olombasew̃a Ndraono Gizeraëli. II. Oroisa ba wangai chõra tanõ Ganaʼana, ba wanimba Dawa Ganaʼana.

1I. Daʼe dõrõw̃a Ndraono Gizeraëli, nitõrõra, me laʼotarai danõ Miseraji, me solohe ndra Moze Aʼaroni. 2Ba itanõ ba zoera Moze mbanoea andrõ si otaʼotarai ira wofanõfanõ, iʼoʼõ niw̃aʼõ Jehowa; ba daʼe dõrow̃ara iʼotaʼotarai nahia si samboea, noemalõ ba zi samboea. 3Ba Ramesi laʼotarai wofanõ, me toeli ba mbaw̃a si fõfõna. Sara wongi aefa wasa mangefa Ndraono Gizeraëli; no mangaró, ba zanehe Ndrawa Miseraji fefoe, (Moz. II. 12, 37), 4me lakoʼokoʼo Dawa Miseraji ndraono si aʼa andrõ fefoe, niboenoe Jehowa chõra; noa sa iʼoromaʼõ ba Lowalangira waʼabõlõnia Jehowa. 5Ba mangefa Ndraono Gizeraëli ba Ramesi, ba ba Zoekota molombase. 6Ba laheta ira ba Zoekota ba ba Getama molombase, ba zinga danõ si mate (Moz. II. 13, 20). 7Ba laheta ira ba Getama ba lasaw̃a Wi-Hahiroti, tánõ ba gatoemboecha loeo iʼotarai Mbaʼali Zefono, ba ba Migidola molombase. (Moz. II. 14, 2). 8Ba laheta ira ba Wi-Hahiroti, ba laʼõtõ nasi andrõ, mijefo ba danõ si mate, ba tõloe ngaloeo fofanõ mowaõwaõ ba danõ si mate ba Getama, ba ba Mara molombase. (Moz. II. 15, 23). 9Ba laheta ira ba Mara, ba laroegi Gelima; ba ba Gelima andrõ, ba felendroea goemboe nidanõ ba fitoe ngafoeloe ngaʼeoe dõla chorema, ba molombase ira ba daʼõ. (Moz. II. 15, 27). 10Ba laheta ira ba Gelima, ba ba mbewe nasi zoechoe molombase. 11Ba laheta ira ba mbewe nasi zoechoe, ba ba danõ si mate Sini molombase. (Moz. II. 16, 1). 12Ba laheta ira ba danõ si mate Sini, ba ba Dofeka molombase. 13Ba laheta ira ba Dofeka, ba ba Galoesi molombase. 14Ba laheta ira ba Galoesi, ba ba Rafidi molombase; ba lõ õ zato idanõ ba daʼõ. (Moz. II. 17, 1). 15Ba laheta ira ba Rafidi, ba ba danõ si mate ba gahe hili Zinaʼi molombase. 16Ba laheta ira ba danõ si mate ba gahe hili Zinaʼi, ba ba nikoʼo soloeʼaloeʼa andrõ molombase. (F. 11, 34). 17Ba laheta ira ba nikoʼo soloeʼaloeʼa, ba ba Haseroti molombase. 18Ba laheta ira ba Haseroti, ba ba Ritima molombase. 19Ba laheta ira ba Ritima, ba ba Rimo Waresi molombase. 20Ba laheta ira ba Rimo Waresi, ba ba Libena molombase. 21Ba laheta ira ba Libena, ba ba Risa molombase. 22Ba laheta ira ba Risa ba ba Gehelata molombase. 23Ba laheta ira ba Gehelata, ba ba gahe hili Zaferi molombase. 24Ba laheta ira ba gahe hili Zaferi, ba ba Harada molombase. 25Ba laheta ira ba Harada, ba ba Makeloti molombase. 26Ba laheta ira ba Makeloti, ba ba Dahata molombase. 27Ba laheta ira ba Dahata, ba ba Dara molombase. 28Ba laheta ira ba Dara, ba ba Mitika molombase. 29Ba laheta ira ba Mitika, ba ba Hasimona molombase. 30Ba laheta ira ba Hasimona, ba ba Mozeroti molombase. 31Ba laheta ira ba Mozeroti, ba ba Mbene Jaʼaka molombase. (Moz. V. 10, 6). 32Ba laheta ira ba Mbene Jaʼaka, ba ba Hori Hagidigada molombase. 33Ba laheta ira ba Hori Hagidigada, ba ba Jotabata molombase. 34Ba laheta ira ba Jotabata, ba ba Gaberona molombase. 35Ba laheta ira ba Gaberona, ba ba Gesionogeberi molombase. 36Ba laheta ira ba Gesionogeberi, ba ba danõ si mate Sini molombase, jaʼia ba Gadesi andrõ. (F. 20, 1). 37Ba laheta ira ba Gadesi, ba ba gahe hili Hori molombase, ba nola danõ Ndraono Gedomo. 38Ba mõi mijaw̃a ba hili Hori andrõ Gaʼaroni ere, niw̃aʼõ Jehowa, ba mate ia ba daʼõ, õfa woeloe fache dania aefa waʼaheta Ndraono Gizeraëli ba danõ Miseraji; me tesaʼa lõ faoro ba mbaw̃a si lima (F. 20, 25). 39No otoe a doea woeloe a tõloe fache Gaʼaroni, me mate ia ba hili Hori andrõ. 40Ba irongo so moroi sa Ndraono Gizeraëli Dawa Ganaʼana andrõ, razo Garadi, ba danõ Ganaʼana tánõ raja. (F. 21, 1). 41Ba laheta ira ba gahe hili Hori, ba ba Zalomona molombase. 42Ba laheta ira ba Zalomona, ba ba Woeno molombase. 43Ba laheta ira ba Woeno, ba ba Gobota molombase. 44Ba laheta ira ba Gobota, ba ba Ije Abari molombase, ba danõ Ndraono Moabi. 45Ba laheta ira, ba Ije Abari, ba ba Dibona Gado molombase. 46Ba laheta ira ba Dibona Gado, ba ba Galimona Dibelataʼi molombase. 47Ba laheta ira ba Galimona Dibelataʼi ba ba gahe hili Gabari molombase, tánõ ba gatoemboecha, iʼotarai Nebo. 48Ba laheta ira ba gahe hili Gabari, ba ba zaloʼo tanõ Ndraono Moabi molombase, ba ndraso Joridano, ba gamaoedoe Jericho. 49Ba ndraso Joridano molombase ira, iʼotarai Mbeti Hajezimota, iroegi Habeli Hasili, ba zaloʼo tánõ Ndraono Moabi andrõ.
50II. Ba hoemede Jehowa chõ Moze ba zaloʼo tanõ Ndraono Moabi andrõ, ba ndraso Joridano ba gamaoedoe Jericho, imane: 51Hede ba Ndraono Gizeraëli, ba õmane chõra: Na no miʼõtõ Joridano, na no miroegi danõ Ganaʼana, 52ba mitimba fõnami fefoe niha ba danõ, ba adoera, ba ahori mifoefoe: adoera nifahele gõi fefoe mirasa, ba hilihili andrõ chõra fefoe, ba midoedoegõ. (Moz. V. 7, 5). 53Ba miʼochõgõ danõra ba ba daʼõ so ami: noa sa oebeʼe chõmi danõ andrõ, enaʼõ jaʼami zochõ. 54Ba fadahõdahõsa wamaosa tanõ, samboesamboea mado; ba zato niha, ba ebolo labeʼe tána chõ tanõ, ba ba zambõ niha, ba si õnaʼõna labeʼe. Heza zi gõna dahõdahõ chõnia, daʼõ tána ba zamõsana; ba zi samboesamboea mado tebeʼe tána chõ danõ. (Jos. 14, 2). 55Ba na lõ mitimba fõnami niha ba danõ andrõ, ba tobali doi ba hõrõmi nisaigõmi andrõ ba zoezoemõ ba ngaimi, ba lafakao dania ami ba danõ andrõ, ba zi so ami, (Sangoehoek. 2, 3), 56ba chõmi dania oefatõrõ zi so ba dõdõgoe, nifatõrõgoe chõra menaʼõ.

Soera Moze IV Faza 32

I. Laʼandrõ chõra danõ jefo Joridano mado Roebeno ba mado Gado. Fanimba Moze. II. Na latolo oea nawõra, ba latehe chõra ba ba zi matonga mado Manase danõ andrõ. Lahalõ chõra.

1I. Ba ba mado Roebeno ba ba mado Gado, ba no oja sibai goerifo, no fahõna. Ba me no lafaigi danõ Jaʼezeri andrõ ba tanõ Gileadi, ba laʼila, sõchi sibai tanõ zoja oerifõ danõ andrõ. 2Ba so ira, mado Gado ba mado Roebeno, lamane chõ ndra Moze Eleazari ere ba ba zatoea mbanoea: 3Ataroto andrõ ba Dibona ba Jaʼezeri ba Nimera ba Eleale ba Sebama ba Nebo ba Beono, 4tanõ andrõ, nitolo Jehowa Iraono Gizeraëli, ba wameʼe barõ mbawara, ba no sõchi sibai tanõ zoja oerifõ, ba no soja oerifõ zawoejoemõ andre. 5Ba lamane na: Na no atṍ faloecha ndraʼaga waʼeboea dõdõoe, ba he wisa na tetehe ba zawoejoemõ andre danõ daʼõ, chõra ba ba ngaʼõtõra mitooe; bõi faʼõtõ ba Joridano ndraʼaga! 6Ba imane Moze ba mado Gado andrõ ba ba mado Roebeno: Hana, si mõi manoewõ dalifoesõmi, ba si iagõ daʼe ami? 7Hana wa mibeʼe ataʼoe dalifoesõmi, weʼamõi mijefo ba danõ andrõ, nibeʼe Jehowa chõra? 8Si manõ sibai wolaoe ndra amami mege, me oefatenge ira no, iʼotarai Gadesi Mbarenea, ba wamaigi tanõ andrõ. 9Me no laroegi ndraso Esikoli, ba lafetaʼoe Ndraono Gizeraëli, tobali lõ edõna mõi ira ba danõ andrõ, nibeʼe Jehowa chõra. (F. 13, 24). 10Ba me loeo daʼõ, ba mofõnoe Jehowa, ba fahõloe ia, imane: 11Niha andrõ, si otarai danõ Miseraji, si no doea woeloe fache ba si aʼa moroi andrõ, ba bõi jalaʼila danõ andrõ, nifaboeʼoegoe chõ ndra Aberahamo, Izaʼaki, Jakobo, fahõloesa, me no lõ niʼoigõra tõdõra woloʼõ chõgoe, 12baero Galebi andrõ, ono Jefoene, maʼoewoe Geni andrõ, ba Josoea, ono Noeni, me no jaʼira zoloʼõ sibai chõgoe. (Jos. 15, 17). 13Ba mofõnoe Jehowa ba Ndraono Gizeraëli; ba ifangõrõngõrõ ira ba danõ si mate, õfa woeloe fache waʼara, erege noahori mate zi sagõtõ niha andrõ, si no mosala chõ Jehowa. 14Ba iadaʼe, ba no maoso ami, fangali ndra namami, madooe zamazõchi horõ, ba wondrooeʼõ na fõnoe Jehowa andrõ ba Ndraono Gizeraëli, si no toʼoea abõlõbõlõ. 15Ba na miʼerogõ ia, ba iradõ na ira ba danõ si mate, ba mibeʼe tekiko ira fefoe. 16Ba laʼondrasi ia, ba lamane: Damafazõchi kandra mbiribiri ba daʼe, nahia goerifõma andrõ, ba mataroeʼõ mbanoea nahia [woʼomoma ba nahia], ndraono soewoejoe chõma; 17ba jaʼaga, ba maʼaroʼõ ndraʼaga, ba fõna Ndraono Gizeraëli soga, irege no maʼohe ira ba nahara; ba ba mbanoea saro laʼiagõ [foʼomoma ba] iraono sawoejoe chõma, bõrõ niha ba danõ andrõ, [si faʼemali chõda]. 18Lõ mangawoeliga ba nahiama, irege no mõi ba Ndraono Gizeraëli fefoe dána chõra andrõ, tanõ. 19Lõʼõ sa manema ndraʼaga tána chõma, awõra, jefo Joridano, no tána chõma danõ tánõ ba gatoemboecha loeo, iʼotarai Joridano.
20II. Ba imane chõra Moze: Na mimanõ, na miʼaroʼõ ami, fõna Jehowa, ba wanoewõ, (Jos. 1, 12), 21ba na miʼõtõ Joridano, fõna Jehowa, dozi ami, si no mangaro, irege no itimba fõnania zi faʼoedoe chõnia, ba na awena dania mifoeli ami, 22na no ibeʼe barõ mbawania danõ Jehowa, ba aefa ami ba chõ Jehowa ba ba Ndraono Gizeraëli, ba taná chõmi dania danõ andre, dali zomasi Jehowa. 23Ba na tenga si manõ wolaoemi, ba mosala ami ba daʼõ chõ Jehowa, ba miʼila dania hadia zi gõna ami, ba lalõmi andrõ. 24Mitaroeʼõ chõmi mbanoea, nahia [woʼomomi ba nahia] ndraono sawoejoe chõmi, ba mifazõchi kandra mbiribirimi ba miʼoʼõ niw̃aʼõgoe chõmi. 25Ba latema li Moze mado Gado ba mado Roebeno, lamane: Laʼaʼõ niw̃aʼõoe sawoejoemõ, jaʼoegõ Toea! 26Iraono sawoejoe chõma ba foʼomoma, ba oerifõma, noemalõ oerifõma sonora fefoe, ba hana na torõi foeri ba daʼe, ba mbanoea Gileadi andre. 27Ba jaʼaga sawoejoemõ andre, ba maʼõtõ Joridano fõna Jehowa, ba wanoewõ, ha waʼato ndraʼaga, si no mangarõ, si mane niw̃aʼõoe, jaʼoegõ Toea. 28Ba ibeʼe li Moze chõ Geleazari ere ba chõ Josoea, ono Noeni ba ba zatoea mado Ndraono Gizeraëli, ba chõra andrõ; imane chõra Moze: 29Na no mõi mijefo Joridano mado Gado ba mado Roebeno, awõmi, fõna Jehowa, ba wanoewõ, ha waʼato ira, si no mangaró, ba na no moebeʼe barõ mbawami danõ, ba mibeʼe chõra danõ Gileadi, tána chõra ba ba ngaʼõtõra mitooe. 30Ba na lõ fao ira chõmi mijefo, si no mangaró ba wanoewõ, ba ba danõ Ganaʼana tefataro ira, ba ngaimi. 31Ba lamane mado Gado ba mado Roebeno: Hadia niw̃aʼõ Jehowa ba chõma, jaʼaga, sawoejoemõ andre, ba maʼoʼõ. 32Mangaró ndraʼaga ba mõiga mijefo ba danõ Ganaʼana, fõna Jehowa, enaʼõ lõ teboelõ chõma dána chõma ba zi tambai Joridano. 33Ba ibeʼe chõra Moze –– ba mado Gado ba ba mado Roebeno ba ba zi matonga mado Manase, ono Josefo — ibeʼe chõra, ba amatõrõw̃a Zihona andrõ, razo Ndraono Gamori, awõ gamatõrõw̃a Ogi andrõ, razo Mbazana, tanõ andrõ, fabaja banoea ba danõ, awõ mbenoeara, banoea ba danõ misa. (Moz. V. 3, 12). 34Ba mado Gado andrõ, ba lafoeli lataroeʼõ Dibona ba Ataroto ba Aroëri, 35ba Ateroti Zofana ba Jaʼezeri ba Jogebeha, 36ba Beti Nimera ba Beti Harana, banoea saró, awõ kandra mbiribiri. 37Ba mado Roebeno, ba lafoeli lataroeʼõ Hesibona ba Eleale ba Kiriataʼi, 38ba Nebo ba Baʼali Meono, nifalalini tõi, ba Sibema; ba banoea andrõ nifoelira fanaroeʼõ, ba lafotõi si bohooe. 39Ba iraono Machiro andrõ, ono Manase, ba ba Gileadi mõi, ba lahalõ chõra, latimba Ndraono Gamori, banoea si tohõna andrõ. 40Ba itehe chõ Machiro, ono Manase, Gileadi andrõ Mose, ba ibaliʼõ banoeania. 41Ba Jaʼiro andrõ, ono Machiro, ba mõi moeʼochõgõ halama soja chõra, ba ibeʼe tõinia halama soja chõ Jaʼiro. 42Ba Noba andrõ, ba mõi moeʼochõgõ Genata, fabaja halama soja chõra, ba tõinia Noba andrõ ibeʼe tõi.

Soera Moze IV Faza 31

I. Lalaoe mbalõra ba Ndraono Midiano Iraono Gizeraëli. II. Lasalaʼõ ira si mõi manoewõ mege ba lasalaʼõ gõi gahoeloea. III. Lafaosa gahoeloea. IV. Labeʼe zoemange Jehowa salaw̃a.

1I. Ba hoemede Jehowa chõ Moze, imane: 2Laoe mbalõ Ndraono Gizeraëli ba Ndraono Midiano andrõ; ba na aefa daʼõ, ba niʼoroedoegõ chõ ndra toeaoe ndraʼoegõ. (F. 25, 17). 3Ba hoemede Moze ba zato, imane: Miʼaʼaroʼõ niha, banoeami ba wanoewõ, enaʼõ lasoewõ Ndraono Midiano andrõ, ba wolaoe balõ Jehowa ba Ndraono Midiano. 4Dozi mado Ndraono Gizeraëli, ba hõnõhõnõ zamboesamboea mado mifatenge ba wanoewõ andrõ. 5Ba latoetoejoe ba ngahõnõ Ndraono Gizeraëli hõnõhõnõ zamboesamboea mado, niʼaʼaroʼõ ba wanoewõ andrõ, felendroea ngahõnõ fefoe. 6Ba ifatenge ira ba wanoewõ Moze, hõnõhõnõ zamboesamboea mado; ba ifao chõra Wineha andrõ, ono Geleazari andrõ, ba wanoewõ; solohe fakake niʼamoniʼõ andrõ daʼõ, ba torofe fangechoegõ niha. 7Ba mõi ira manoewõ Iraono Midiano, dali niw̃aʼõ Jehowa chõ Moze, ba laboenoe fefoe motõi matoea. 8Ba he razo ba Ndraono Midiano ba laboeboenoe, awõ niʼõʼõtõra andrõ, jaʼia Ewi andrõ ba Dekemi ba Soeri ba Hoeri ba Reba, razo Ndraono Midiano, si dalima; ba he Bileamo andrõ, ono Mbeori, ba laboenoe bawa ziʼõli. (Jos. 13, 21). 9Ba laraʼoe ndra alawe Ndraono Midiano Iraono Gizeraëli, fabaja iraono sawoejoe chõra, ba laʼohe, ba oerifõra sonoro fefoe ba oerifõra bõʼõ fefoe, awõ nibajabajara fefoe, ba laʼohe, ahoeloeara. 10Ba banoeara ba nahiara fefoe, ba osera fefoe, ba latoenoe. 11Ba lahalõ fefoe nihalõra andrõ, ahoeloea andrõ fefoe, he niha, ba he oerifõ, 12ba laʼohe chõ Moze niha andrõ, niraʼoera ba ahoeloea bõʼõ, awõ nibajabaja andrõ, nihalõra, ba chõ Geleazari ere ba ba Ndraono Gizeraëli sato, ba golombasew̃a ba zaloʼo tanõ Ndraono Moabi ba ndraso Joridano, ba gamaoedoe Jericho.
13II. Ba lafaondragõ ira ira Moze Eleazari ere ba satoea mbanoea fefoe, baero golombasew̃a. 14Ba mofõnoe Moze ba zolohe sanoewõ, ba goemandra zi hõnõ ba ba goemandra zi otoe, si oroi, manoewõ. 15Imane chõra Moze: Hadia, no ahori miʼorifi ndra alawe? 16No jaʼirá mbõrõ wangerogõ Ndraono Gizeraëli Jehowa, me no iw̃aʼõ chõra Bileamo andrõ, ba Weoro andrõ, tobali itõrõ mbanoea Jehowa famakao. (F. 25, 1. Fet. II. 2, 15. Fam. 2, 14). 17Ba miboenoe fefoe motõi matoea ba ndraono andrõ, ba dozi ira alawe ba zi no oroedoe ira matoea, ba miboenoe; (Sangoehoek. 21, 11); 18ba dozi ono alawe ba zi lõ irai oroedoe ira matoea, ba miʼorifi chõmi. 19Ba jaʼami, ba fitoe bongi miʼiagõ baero golombasew̃a; dozi ami si no mamoenoe niha ba si no mombambaja niboenoe, ba na loeo si tõloe ba na loeo si fitoe, ba misalaʼõ ami, fabaja niʼohemi andrõ, niraboe. (F. 19, 11). 20Ba si manõ gõi noecha fefoe ba gamagama oeli zaw̃i ba gamagama boe mbiribiri fefoe ba fakake eoe fefoe, misalaʼõ. 21Ba imane Eleazari ere ba zabõlõ andrõ, si no mõi manoewõ mege: Daʼõ goroisa andrõ, niʼoroiʼõ Jehowa chõ Moze. 22Ba anaʼa ba firõ ba tõla ba siʼõli ba simo mbanoea ba simo itõ, 23fefoe hadia ia zanaha ba galitõ, ba mifatõrõ ba galitõ, ba aheta waʼaraʼiõnia; hatṍ fanasa jaʼia ba nidanõ fangehao andrõ. Ba fefoe hadia ia zi lõ manaha ba galitõ, ba ba nidanõ mifatõrõ. 24Ba na no mibabago noechami, na loeo si fitoe andrõ, ba no aheta waʼaraʼiõmi, ba tola saʼae mifoeli ami ba golombasew̃a.
25III. Ba hoemede Jehowa chõ Moze, imane: 26Ofaja fefoe ha waʼoja gahoeloea andrõ, nihalõ, he niha, ba he oerifõ, jaʼoegõ ba Eleazari ere ba satoea mbanoea. 27Ba si matonga, ba õbeʼe ba zi no fao ba wanoewõ, si no mõi mege, ba si matonga, ba ba zato. (Sam. I. 30, 24). 28Ba ba zanoewõ andrõ, si no mõi mege, ba õhalõ mbeo, chõ Jehowa, samboea ba zi 500, he niha ba he saw̃i ba he kalide ba he biribiri. 29Ba zi matonga tána chõra mihalõ ba mibeʼe ba danga Geleazari ere, soemange fegero chõ Jehowa. 30Ba ba zi matonga ba Ndraono Gizeraëli, ba samboesamboea õtoetoejoe ba zi limalima woeloe, he niha ba he saw̃i ba he kalide ba he biribiri — oerifõ andrõ fefoe —, ba õbeʼe ba danga nono Lewi, sangaingai halõw̃õ andrõ ba nose Jehowa. 31Ba laʼoʼõ niw̃aʼõ Jehowa chõ Moze ira Moze Eleazari ere. 32Ba faʼoja gahoeloea andrõ, si tosai ahoeloea zanoewõ andrõ, ba no 675,000 ngaʼeoe mbiribiri,
33ba 72,000 zaw̃i,
34ba 61,000 galide:
35ba ba niha, ba faʼato nono alawe andrõ, ba zi lõ irai oroedoe ira matoea, ba no 32,000 niha. 36Ba si matongania andrõ, tána ba zi no mõi manoewõ, ba 337,500 mbiribiri, 37ba beo chõ Jehowa, biribiri andrõ, ba no 675 ngaʼeoe, ba 36,000 zaw̃i, 38ba beo daʼõ chõ Jehowa, ba 72 ngaʼeoe, ba 30,500 galide, 39ba beo daʼõ chõ Jehowa, ba 61 ngaʼeoe; 40ba 16,000 niha ba beo daʼõ chõ Jehowa, ba 32 niha. 41Ba beo andrõ, nibeʼe soemange fegero chõ Jehowa, ba ibeʼe ba danga Geleazari ere Moze, dali niw̃aʼõ Jehowa chõ Moze. 42Ba ba zi matongania andrõ, tána ba Ndraono Gizeraëli, niʼoniagõ Moze ba dána ba zanoewõ andrõ, 43(ba dána ba zato, si matonga andrõ, ba no 337,500 mbiribiri,
44ba 36,000 zaw̃i,
45ba 30,500 galide,
46ba 16,000 niha), —
47ba zi matonga andrõ, tána ba Ndraono Gizeraëli, ba itoetoejoe Moze, samboesamboea ba zi limalima woeloe, he niha, ba he oerifõ, ba ibeʼe ba danga nono Lewi, sangaingai halõw̃õ andrõ ba nose Jehowa, dali niw̃aʼõ Jehowa chõ Moze.
48IV. Ba laʼondrasi Moze koemandra nghahõngahõnõ zanoewõ andrõ, koemandra zi hõnõ ba koemandra zi otoe, lamane chõ Moze: 49No laʼofaja waʼato zanoewõ andrõ niʼohema, enonimõ, ba samõsa lõ nirongoma si lõʼõ; 50andrõ mabeʼe zoemange Jehowa, fangandrõ nosoma chõ Jehowa, hadia nihalõ zamõsana ahoeloea gamagama anaʼa ba kõla ba tõla gasa ba laedoeroe ba saeroe dalinga ba aja bõʼõ. 51Ba lahalõ chõra ganaʼa andrõ ira Moze Eleazari ere — hadia ia ngawalõ naja —. 52Ba faʼeboea ganaʼa andrõ, nibeʼera soemange si no amaedola wegero chõ Jehowa, ba no 16,750 sekeli; nibeʼe goemandra zi hõnõ ba koemandra zi otoe. 53Ba sanoewõ sato, ba no oi zara moraboe gõi: 54Ba lahalõ ganaʼa andrõ chõ goemandra zi hõnõ ba chõ goemandra zi otoe ira Moze Eleazari ere, ba labeʼe ba nose wamaʼeleʼõ, enaʼõ itõrõtõrõ tõdõ Jehowa Ndraono Gizeraëli.

Soera Moze IV Faza 30

I. Amachoita ba gamaboeʼoela li ndra matoea. II. Ba gamaboeʼoela li nono alawe ba ba gamaboeʼoela li zi no moehalõ. III. Ba gamaboeʼoela li lacha mbanoea ba ba gamaboeʼoela li nitiboʼõ ndra matoea.

1I. Ba ibeʼe li ba Ndraono Gizeraëli Moze, dali manõ niw̃aʼõ Jehowa chõ Moze. 2Ba hoemede Moze ba zatoea mado Ndraono Gizeraëli, imane: Daʼõ ia, niʼoroiʼõ Jehowa. 3Na so zamaboeʼoe linia chõ Jehowa, ma na mõi ba hõloe, wamaboeʼoe famoni hadia ia, ba lõ tola ifoeli linia, jamoetõrõ sibai niw̃aʼõnia andrõ. (Moz. III. 27, 2. Moz. V. 23, 21. Sin. 50, 14).
4II. Ba na ono alawe zamaboeʼoe linia chõ Jehowa, na ifaboeʼoe wamoni hadia ia, fatoea ono alawe na ia baomo namania, 5ba na irongo amania gamaboeʼoela linia ba famoni andrõ, nifaboeʼoenia, ba na lõ hedehedenia, ba tebai awoeʼa gamaboeʼoela linia fefoe, ba famoninia fefoe, nifaboeʼoenia, ba tebai awoeʼa. 6Ba na itenaw̃a ia amania, na loeo irongo, ba si lõʼõ gamaboeʼoelania fefoe, awõ wamoni andrõ, nifaboeʼoenia; ba ibeʼe aefa zalania Jehowa, me no amania zanenaw̃a jaʼia. 7Ba na lahalõ ia lõ moetõrõ gamaboeʼoela li, ba ma hadia niw̃aʼõnia, si lõ moeʼodõdõgõ sibai, wamaboeʼoe hadia ia, 8ba na irongo sangai jaʼia, ba na lõ hedehedenia ba daʼõ, na loeo irongo, ba lõ awoeʼa gamaboeʼoela linia, ba famoninia andrõ, nifaboeʼoenia, ba lõ awoeʼa. 9Ba na itenaw̃a ia foʼomonia, na loeo irongo, ba amaedola zi lõʼõ gamaboeʼoela li andrõ, si lõ moetõrõ na, ibeʼe, awõ niw̃aʼõnia andrõ, si lõ moeʼodõdõgõ sibai, wamaboeʼoe hadia ia, ba ibeʼe aefa zalania Jehowa.
10III. Ba amaboeʼoela li zi no mate donga ba amaboeʼoela li ndra alawe nitiboʼõ, fefoe nifaboeʼoera, ba lõ awoeʼa chõra. 11Ba na baomo woʼomonia ifaboeʼoe linia, ma si mõi ba hõloe, wamaboeʼoe hadia ia wamoni, ba na irongo foʼomonia, 12ba na lõ hedehedenia ba daʼõ, ba na lõ itenaw̃a ia, ba tebai awoeʼa gamaboeʼoela linia fefoe, ba famoni andrõ fefoe, nifaboeʼoenia, ba tebai awoeʼa. 13Ba na awoeʼa ibeʼe foʼomonia, na loeo irongo nifaboeʼoe andrõ, ba amaedola zi lõʼõ fefoe niw̃aʼõnia, he na amaboeʼoela li, ba he na famoni nifaboeʼoenia; no si lõʼõ ibeʼe foʼomonia, andrõ wa ibeʼe aefa zalania Jehowa. 14Fefoe gamaboeʼoela linia ba fefoe wamaboeʼoenia famoni, ba wamakao jaʼia, si no mõi ba hõloe ia, ba foʼomonia zangila mameʼe aró, ba faʼomonia gõi zangila mameʼe si lõʼõ. 15Na lõ hedehede woʼomonia ba daʼõ, ha oega bongi, ba tebai awoeʼa ibeʼe gamaboeʼoela linia fefoe, si lõ moetõrõ na, ba he famoninia fefoe; bõrõ wa lõ hedehedenia, me loeo irongo; ba daʼõ tebai awoeʼa. 16Ba na amaedola zi lõʼõ ibeʼe, na no irongo mege, ba ihalõ horõnia horõ ndra alawe andrõ ba daʼõ. 17Daʼõ gamachoita, niw̃aʼõ Jehowa chõ Moze, amachoita ba ndra matoea ba chõ woʼomonia, ba amachoita chõ nama ba chõ nononia alawe, si lõ moehalõ, si so baomo namania na.

Soera Moze IV Faza 29

I. Soemange na owasa nilaoe torofe. II. Na owasa fangatoelõ. III. Na owasa nose daha geoe.

1I. Ba na tesaʼa lõ faoro, na baw̃a si fitoe, ba owoelo ami ba niʼamoniʼõ, ba lõ tola mihalõ hadia ia halõw̃õ ba daʼõ, baw̃a wolaoe torofe fangechoegõ niha ia chõmi, miw̃aʼõ. (Moz. III. 23, 24). 2Ba soemange nitoenoe, samohoea, nibeʼemi chõ Jehowa ba daʼõ, ba sara nono zaw̃i, si matoea, ba sageoe mbiribiri, si matoea ba fitoe rozi nono mbiribiri, si dõfi faʼeboea, si lõ sala. 3Ba nifao ba daʼõ, soemange niʼā, hamo si sõchi, nifaroeka fanicha, ba doea doemba ba nono zaw̃i andrõ, ba tõloe hinaoja ba mbiribiri si matoea andrõ, 4ba sarasara ono mbiribiri andrõ si fitoe, ba tõloetõloe kata. 5Ba baero õ, ba sageoe nambi si matoea, soemange fameta horõ, ba wameta salami, 6baero zoemange nitoenoe andrõ na fasoelõna, awõ zoemange niʼā, nifao ba daʼõ, ba baero zoemange nitoenoe andrõ sero maʼṍchõ ba soemange niʼā andrõ, ba soemange nibadoe, nifao, nifachoi andrõ — samohoea, soemange nifatõrõ ba galitõ, nibeʼe chõ Jehowa.
7II. Ba ba zi mewoeloe, ba mbaw̃a si fitoe andrõ, ba owoelo ami ba niʼamoniʼõ ba mangaloeloe ami; hadia ia halõw̃õ, ba lõ tola mihalõ ba daʼõ. (Moz. III. 23, 27). 8Ba soemange nitoenoe, nibeʼemi chõ Jehowa, samohoea, ba sara nono zaw̃i, si matoea, ba sageoe mbiribiri si matoea ba fitoe rozi nono mbiribiri si dõfi faʼeboea; si lõ sala mibeʼe. 9Ba nifao ba daʼõ, soemange niʼā, ba hamo si sõchi nifaroeka fanicha, doea doemba ba nono zaw̃i andrõ, ba tõloe hinaoja ba mbiribiri si matoea, 10ba sarasara ono mbiribiri andrõ, ba tõloetõloe kata. 11Ba baero õ, ba sageoe nambi si matoea, soemange fameta horõ, lõ lai zoemange fameta horõ andrõ, ba wameta salami, ba lõ lai zoemange nitoenoe andrõ, sero maʼṍchõ ba soemange niʼā ba soemange nibadoe, nifao ba daʼõ.
12III. Ba ba doeli ba mbaw̃a si fitoe andrõ gõi, ba owoelo ami ba niʼamoniʼõ; ba lõ tola mihalõ hadia ia halõw̃õ ba daʼõ; owasa nilaoe chõ Jehowa, fitoe bongi waʼara. (Moz. III. 23, 34). 13Ba soemange nitoenoe nibeʼemi soemange nifatõrõ ba galitõ, samohoea chõ Jehowa, ba feledõloe nono zaw̃i, si matoea, ba doea geoe mbiribiri si matoea, ba feleõfa nono mbiribiri, si dõfi faʼeboea; ba si lõ sala. 14Ba nifao ba daʼõ, soemange niʼā, ba hamo si sõchi, nifaroeka fanicha, sarasara ono zaw̃i andrõ, si feledõloe, ba doeadoea doemba, ba sagesageoe biribiri si matoea, ba tõloetõloe hinaoja, 15ba sarasara ono mbiribiri andrõ, si feleõfa, ba tõloetõloe kata. 16Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ ba soemange niʼā ba soemange nibadoe, nifao ba daʼõ. 17Ba mahemoloe õ, ba felendroea rozi nono zaw̃i, si matoea, ba doea geoe mbiribiri si matoea, ba feleõfa rozi nono mbiribiri, si dõfi faʼeboea, si lõ sala, 18awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 19Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ ba soemange niʼā andrõ ba soemange nibadoe, nifao ba daʼõ. 20Ba mahemoloe õ, ba felezara rozi nono zaw̃i, ba doea geoe mbiribiri si matoea, ba feleõfa nono mbiribiri si lõ sala, 21si dõfi faʼeboea, awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 22Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ, ba soemange niʼā andrõ ba soemange nibadoe, nifao ba daʼõ. 23Ba mahemoloe õ, ba foeloe rozi nono zaw̃i, ba doea geoe mbiribiri si matoea ba feleõfa rozi nono mbiribiri, si lõ sala, si dõfi faʼeboea, 24awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 25Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ ba soemange niʼā andrõ ba soemange nibadoe, nifao ba daʼõ. 26Ba mahemoloe õ, ba siw̃a rozi nono zaw̃i, ba doea geoe mbiribiri si matoea ba feleõfa rozi nono mbiribiri, si lõ sala, si dõfi faʼeboea, 27awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 28Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ, ba soemange niʼā andrõ ba soemange nibadoe, nifao ba daʼõ. 29Ba mahemoloe õ, ba w̃aloe rozi nono zaw̃i ba doea geoe mbiribiri si matoea ba feleõfa rozi nono mbiribiri, si lõ sala ba si dõfi faʼeboea, 30awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 31Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ, ba soemange niʼā andrõ ba soemange nibadoe, nifao ba daʼõ. 32Ba mahemoloe õ, ba fitoe rozi nono zaw̃i ba doea geoe mbiribiri si matoea ba feleõfa nono mbiribiri, si lõ sala, si dõfi faʼeboea, 33awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 34Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ, ba soemange niʼā andrõ ba soemange nibadoe, nifao ba daʼõ. 35Ba na loeo si w̃aloe, ba owoelo ami; ba lõ tola mihalõ hadia ia halõw̃õ ba daʼõ. (Moz. III. 23, 36). 36Ba soemange nitoenoe, nibeʼemi soemange nifatõrõ ba galitõ, samohoea chõ Jehowa, ba sara nono zaw̃i ba sageoe mbiribiri si matoea, ba fitoe rozi nono mbiribiri, si lõ sala, si dõfi faʼeboea, 37awõ zoemange niʼā andrõ ba soemange nibadoe, nifao ba daʼõ, ba nono zaw̃i andrõ ba ba mbiribiri si matoea ba ba nono mbiribiri andrõ, dali waʼoja, balazi nifachoi andrõ. 38Ba baero õ, ba sageoe nambi si matoea, soemange fameta horõ, lõ lai zoemange nitoenoe andrõ, sero maʼṍchõ, ba soemange niʼā andrõ ba soemange nibadoe, nifao ba daʼõ. 39Daʼõ zoemange nibeʼemi chõ Jehowa, na baw̃a gowasa andrõ chõmi, baero nibeʼemi soemange nitoenoe ba soemange niʼā ba soemange nibadoe ba soemange fangorifi, he na ba wanõrõ amaboeʼoela li, ba he na saoha gõlõ.

Soera Moze IV Faza 28

Amachoita ba zoemange, hadia ia: I. Soemange sero maʼõchṍ. II. Soemange na loeo sabato. III. Soemange na fasoelõna mbaw̃a. IV. Soemange fasa. V. Soemange na loeo wendrakose.

1I. Ba hoemede Jehowa chõ Moze, imane: 2Beʼe li ba Ndraono Gizeraëli, õmane chõra: Bõi olifoe ami wameʼe ameʼela soemange andrõ chõgoe na inõtõ, õgoe, soemange nifatõrõ ba galitõ, nihonogõi chõgoe, samohoea chõgoe. (Moz. III. 3, 11; 21, 6). 3Õmane na chõra: Daʼõ zoemange nifatõrõ ba galitṍ, nibeʼemi chõ Jehowa: Sero maʼṍchõ, ba doea rozi nono mbiribiri, si lõ sala, soemange nitoenoe, si lõ aefaʼaefa. (Moz. II. 29, 38). 4Ono mbiribiri si sara, ba na mahemoloe mbanoea õbeʼe, ba si sara, ba na tánõ owī, ba tõloe kata hamo si sõchi, 5ninifachõjõ fanicha mboea zai nifoefoe, samba kata, soemange niʼā. (F. 15, 4). 6Daʼõ zoemange nitoenoe andrõ, si lõ aefaʼaefa, nibeʼe no, ba gahe hili Zinaʼi, samohoea, nibeʼe chõ Jehowa, soemange nifatõrõ ba galitõ. 7Ba nifao ba zi sarasara ono mbiribiri, soemange nibadoe, ba sambasamba kata. Ba niʼamoniʼõ labeʼe chõ Jehowa zoemange nibadoe andrõ, agoe nilaoe famasa. 8Ba ono mbiribiri si sara, ba na tánõ owī õbeʼe; ba nifao zoemange niʼā, si mane ba zangoehoelõ wongi mege, awõ zoemange nibadoe andrõ, nifao chõnia, soemange nifatõrõ ba galitõ, nibeʼe chõ Jehowa, samohoea.
9II. Ba na loeo sabato, ba doea rozi nono mbiribiri si dõfi faʼeboea, si lõ sala, ba tõloe hinaoja hamo si sõchi nifaroeka fanicha, soemange niʼā, ba soemange nibadoe andrõ, nifao ba daʼõ. 10Daʼõ zoemange nitoenoe andrõ, ero na loeo sabato, baero zoemange nitoenoe andrõ, si lõ aefaʼaefa, ba soemange nibadoe andrõ, nifao ba daʼõ.
11III. Ba ero na fasoelõna mbaw̃a chõmi, ba mibeʼe soemange Jehowa, ba doea rozi nono zaw̃i, si matoea ba sageoe mbiribiri si matoea ba fitoe rozi nono mbiribiri, si dõfi faʼeboea, si lõ sala; 12ba sarasara ono zaw̃i, ba doeadoea doemba nifao hamo si sõchi nifaroeka fanicha, soemange niʼā, ba sagesageoe biribiri si matoea, ba tõloetõloe hinaoja hamo si sõchi, nifaroeka fanicha, soemange niʼā, 13ba sarasara ono mbiribiri, ba tõloetõloe kata hamo si sõchi, nifaroeka fanicha, soemange niʼā, — soemange nitoenoe, samohoea, soemange nifatõrõ ba galitõ, nibeʼe chõ Jehowa. 14Ba ba zoemange nibadoe andrõ, nifao ba daʼõ, ba sarasara ono zaw̃i, ba sambasamba hinaoja nagoe ba sagesageoe biribiri si matoea, ba sambasamba kata a matonga, ba sarasara ono mbiribiri, ba sambasamba kata. Daʼõ zoemange nitoenoe andrõ nibeʼe, ero na fasoelõna, dõfi fasoei manõ. 15Ba baero õ, ba sageoe nambi si matoea, soemange fameta horõ, nibeʼe chõ Jehowa; baero zoemange nitoenoe andrõ, si lõ aefaʼaefa, ba baero zoemange nibadoe andrõ, nifao ba daʼõ, wameʼe daʼõ.
16IV. Ba ba zi meweleõfa ba mbaw̃a si fõfõna, ba telaoe wasa andrõ, chõ Jehowa. (Moz. II. 12, 18. 21. Moz. III. 23, 5). 17Ba ba zi mewelelima ba mbaw̃a daʼõ, ba aechoe ba danõ gowasa andrõ. Fitoe bongi waʼara teʼā roti si lõ moeʼaisõni. 18Na loeo si fõfõna andrõ, ba owoelo ba niʼamoniʼõ ba lõ tola mihalõ hadia ia halõw̃õ ba daʼõ. (Moz. III. 23, 7). 19Ba nibeʼe chõ Jehowa soemange nifatõrõ ba galitõ, soemange nitoenoe, ba doea rozi nono zaw̃i, si matoea, ba sageoe mbiribiri si matoea ba fitoe rozi nono mbiribiri; si lõ sala, mibeʼe. 20Ba nifao ba daʼõ, soemange niʼā, ba hamo si sõchi, nifaroeka fanicha, doea doemba zi fao ba nono zaw̃i, ba tõloe hinaoja ba mbiribiri si matoea andrõ; 21ba sarasara ono mbiribiri si fitoe andrõ, ba tõloetõloe kata mifao. 22Ba baero õ, ba sageoe nambi si matoea, soemange fameta horõ, ba wameta salami andrõ. 23Daʼõ [fefoe] mibeʼe, lõ lai zoemange nitoenoe andrõ ba zangoehoelõ wongi, nibeʼe soemange nitoenoe si lõ aefaʼaefa. 24Soemange daʼõ nibeʼe chõ Jehowa, õ soemange nifatõrõ ba galitõ, samohoea, ero maʼṍchõ, fitoe bongi waʼara; baero zoemange nitoenoe andrõ si lõ aefaʼaefa andrõ, ba baero zoemange nibadoe andrõ, nifao ba daʼõ wameʼe jaʼia. 25Ba na loeo si fitoe, ba owoelo ami ba niʼamoniʼõ, ba lõ tola mihalõ hadia ia halõw̃õ ba daʼõ.
26V. Ba na baw̃a wamasi sahoelõ, na mibeʼe zoemange Jehowa, soemange niʼā, fõfõ mboea zahoelõ, na owasa wendrakose chõmi, ba owoelo ami ba niʼamoniʼõ; ba lõ tola mihalõ hadia ia halõw̃õ ba daʼõ. (Moz. III. 23, 15). 27Ba soemange nitoenoe, samohoea, nibeʼemi chõ Jehowa, ba doea rozi nono zaw̃i ba sageoe mbiribiri si matoea ba fitoe rozi nono mbiribiri. 28Ba nifao ba daʼõ soemange niʼā, ba hamo si sõchi nifaroeka fanicha, sarasara ono zaw̃i ba doeadoea doemba, ba ba mbiribiri si matoea andrõ, 29ba tõloe hinaoja, ba sarasara ono mbiribiri si fitoe andrõ, ba tõloetõloe kata; 30ba sageoe nambi si matoea, ba wameta salami. 31Baero zoemange nitoenoe andrõ, si lõ aefaʼaefa andrõ, ba baero zoemange niʼā ba soemange nibadoe, nifao ba daʼõ, wameʼemi jaʼia; si lõ sala mibeʼe.

Soera Moze IV Faza 27

I. Amachoita ba nono alawe sanema ondrõita. II. Iʼombachaʼõ waʼamate Moze Jehowa ba iw̃aʼõ wamataro Josoea, fangali Moze.

1I. Ba so nono Zelofadi alawe, Selofadi ono Heferi ono Gileadi ono Machiro ono Manase, ngaʼõtõ Manase andrõ, ono Josefo, ba tõi nononia andrõ, ba Mala ba Noa ba Hogela ba Milika ba Tirisa. 2Laʼondrasi ndra Moze Eleazari ere andrõ ba satoea ba sato fefoe, ba golajama nose wamaʼeleʼõ, lamane: 3Amama, ba no mate ba danõ si mate, tenga awõ zi fao chõ Gora no, si maoso no, solaw̃a Jehowa; ba horõnia [samõsa jaʼia] mate ia. Ba lõ ono matoea chõnia. 4Ba hana wa labeʼe taja dõi namama ba ngaʼõtõ andrõ chõra, me no lõ ono matoea chõnia; Chõma mibeʼe dána chõma tanõ, ba ngai dalifoesõ namama! 5Ba iʼohe chõ Jehowa hoehoeora andrõ Moze. 6Ba imane Jehowa chõ Moze: 7Si ndroehoe niw̃aʼõ nono Zelofadi andrõ. Õbeʼe saʼae chõra dána chõra, ba ngai dalifoesõ namara, tána chõ namara enaʼõ, ba chõra mõi õbeʼe. (F. 36, 2). 8Ba õmane ba Ndraono Gizeraëli: Na so zi mate lõ ono matoea, ba chõ nononia alawe mõi dána chõnia tanõ mibeʼe. 9Ba na lõʼõ gõi ono alawe chõnia, ba ba dalifoesõnia mitehe dána chõnia andrõ. 10Ba na lõʼõ gõi talifoesõnia, ba ba dalifoesõ namania mitehe. 11Ba na lõʼõ gõi talifoesõ namania, ba ba zabõlõ ahatõ chõnia ba ngaʼõtõra andrõ mõi mibeʼe; daʼõ saʼae zochõ. Daʼõ dania hoekoe ba Ndraono Gizeraëli, dali niw̃aʼõ Jehowa chõ Moze.
12II. Ba imane Jehowa chõ Moze: Ae mijaw̃a ba hili Gabari andrõ, ba faigi danõ andrõ, nibeʼegoe ba Ndraono Gizeraëli. (Moz. V. 32, 49). 13Ba na no õfaigi, ba laʼoroedoegõ gõi ndraʼoegõ chõ ndra toeaoe, si mane gaʼaoe Aʼaroni, si no moeʼoroedoegõ, (F. 20, 28), 14me no lõ nifondrondrongomi niw̃aʼõgoe andrõ, ba danõ si mate Sini, me fasoso zato, me mifolachõmi menaʼõ ndraʼodo ba zanehe ira, ba nidanõ andrõ (Idanõ wasosota andrõ daʼõ ba Gadesi, ba danõ si mate Sini). (F. 20, 12). 15Ba hoemede Moze chõ Jehowa, imane: 16Enaʼõ na ifataro zamõsa solohe sato Jehowa andrõ, Soʼaja noso ba mboto niha fefoe, (F. 16, 22), 17solohe jaʼira na mofanõ ba na mangawoeli, solohe jaʼira na mõi, heza, ba na lafoeli ira baose, fa bõi hoelõ mbiribiri si lõ koebalo mbanoea Jehowa andrõ. (Mat. 9, 36). 18Ba imane Jehowa chõ Moze: Halõ chõoe Josoea andrõ, ono Noeni, niha si so Eheha, toefa hõgõnia tangaoe, (Moz. V. 1, 38), 19ba ohe chõ Geleazari ere andrõ ba ba zato fefoe, ba wamataro jaʼia ba zanehe ira; 20ba õhareʼõ chõnia õsa lachõmimõ andrõ, enaʼõ lafondrondrongo linia Iraono Gizeraëli sato, fefoe. 21Jamõi chõ Geleazari ere, enaʼõ idõni ba doena Oerimi andrõ, chõ Jehowa; balazi dania niw̃aʼõnia na mofanõ ira, ba na molombase, jaʼia ba Iraono Gizeraëli fefoe, sato fefoe. (Moz. II. 28, 30). 22Ba iʼoʼõ Moze niw̃aʼõ Jehowa chõnia: ihalõ Josoea andrõ ba iʼohe chõ Geleazari ere ba ba zato fefoe. 23Ba itoefa hõgõnia tanga, ifataro ia, dali niw̃aʼõ Jehowa, nifaʼema Moze.

Soera Moze IV Faza 26

I. Lafoeli laʼofaja niha. II. Tefachoi wamaosa tanõ. Iraono Lewi.

1I. Ba me no dõhõ wamakao andrõ, ba imane Jehowa chõ Moze, ba chõ Geleazari, ono Gaʼaroni ere: 2Miʼofaja Ndraono Gizeraëli fefoe, si 20 fache ba si aʼa moroi andrõ, samboesamboea mado, dozi solohe baloese ba Ndraono Gizeraëli. (F. 1, 2). 3Ba law̃aʼõ li ira Moze Eleazari chõra, ba zaloʼo tanõ Ndraono Moabi, ba gamaoedoe Jericho, 4chõra si 20 fache ba si aʼa moroi andrõ, dali niw̃aʼõ Jehowa chõ Moze. Ba daʼe Ndraono Gizeraëli, si otarai danõ Miseraji: 5Roebeno, si aʼa Ndraono Gizeraëli. Ba iraono Roebeno, ba Hanochi, toea ngaʼõtõ Hanochi andrõ; ba Waloe, toea ngaʼõtõ Waloe andrõ. (Moz. I. 46, 8 b. t.) 6Ba Heseroni, toea ngaʼõtõ Heseroni andrõ; ba Karemi, toea ngaʼõtõ Garemi andrõ. 7Daʼõ ngaʼõtõ Roebeno andrõ. Ba faʼato niʼofaja jaʼira, ba no 43,730. 8Ba ono Waloe andrõ, ba Eliabi. 9Ba iraono Geliabi, ba Nemoeëli ba Datano ba Abiramo. Daʼõ zalaw̃a rafe andrõ, Datano ba Abiramo, si fao chõ Gora no, me fasoso ira chõ Jehowa, (F. 16, 1 b. t.), 10me ifaboka mbawania tanõ, me itõlõ ira, awõ Gora, me tekiko zi fao andrõ, me iʼā alitõ zi 250 niha, me tobali tandra [famangelama] ira. 11Ba lõ si tekiko ndraono Gora. (Sin. 42, 1). 12Ba ba ngaʼõtõ ndraono Zimeoni, ba Nemoeëli, toea ngaʼõtõ Nemoeëli andrõ, ba Jamini, toea ngaʼõtõ Jamini andrõ, ba Jachino, toea ngaʼõtõ Jachino andrõ, 13ba Sera, toea ngaʼõtõ Zera andrõ, ba Saoelo, toea ngaʼõtõ Zaoelo andrõ; 14daʼõ ngaʼõtõ Zimeoni andrõ, no 22,200. 15Ba ba ngaʼõtõ ndraono Gado andrõ, ba Sefono, toea ngaʼõtõ Zefono andrõ, ba Hagi, toea ngaʼõtõ Hagi andrõ, ba Soeni, toea ngaʼõtõ Zoeni andrõ, 16ba Osini, toea ngaʼõtõ Gosini andrõ, ba Eri, 17toea ngaʼõtõ Geri andrõ, ba Arodi, toea ngaʼõtõ Garodi andrõ, ba Areli, toea ngaʼõtõ Gareli andrõ. 18Daʼõ ngaʼõtõ ndraono Gado andrõ, ha waʼato ira, niʼofaja, no 40,500. 19Ba ono Joeda, ba Eri ba Onani, ba Eri andrõ ba Onani, ba si mate ba danõ Ganaʼana. (Moz. I. 38, 3. 4). 20Ba ba ngaʼõtõ ndraono Joeda andrõ, ba Sela, toea ngaʼõtõ Zela andrõ, ba Faresi, toea ngaʼõtõ Waresi andrõ, ba Sera, toea ngaʼõtõ Zera andrõ. 21Ba ba ndraono Waresi andrõ, ba Eseromo, toea ngaʼõtõ Geseromo andrõ, ba Hamoeli, toea ngaʼõtõ Hamoeli andrõ. 22Daʼõ ngaʼõtõ Joeda andrõ, ha waʼato ira, niʼofaja no 76,500. 23Ba ba ngaʼõtõ Isasari andrõ, ba Tola, toea ngaʼõtõ Dola andrõ, ba Foewa, toea ngaʼõtõ Woewa andrõ, 24ba Jasoebi, toea ngaʼõtõ Jasoebi andrõ, ba Simeroni, toea ngaʼõtõ Zimeroni andrõ. 25Daʼõ ngaʼõtõ Isasari andrõ, ha waʼato ira, niʼofaja, no 64,300. 26Ba ba ngaʼõtõ Zeboeloni, ba Seredi, toea ngaʼõtõ Zeredi andrõ, ba Elono, toea ngaʼõtõ Gelono andrõ, ba Jaleëli, toea ngaʼõtõ Jaleëli andrõ. 27Daʼṍ ngaʼõtõ Zeboeloni andrõ, ha waʼato ira, niʼofaja, no 60,500. 28Ba ngaʼõtõ Josefo, ba ononia andrõ, Manase ba Eferaji. 29Ba ba ndraono Manase, ba Machiro, toea ngaʼõtõ Machiro andrõ. Ono Machiro, ba Gileadi, toea ngaʼõtõ Gileadi andrõ. 30Ono Gileadi andrõ, ba Jezeri, toea ngaʼõtõ Jezeri andrõ, ba Heleki, toea ngaʼõtõ Heleki andrõ, 31ba Aseriëli, toea ngaʼõtõ Gaseriëli andrõ, ba Sichema, toea ngaʼõtõ Zichema andrõ, 32ba Semida, toea ngaʼõtõ Zemida andrõ, ba Heferi, toea ngaʼõtõ Heferi andrõ. 33Ba Selofadi andrõ, ono Heferi, ba si lõ ono matoea, ha ono alawe; ba tõi nononia alawe andrõ, ba Mala ba Noa ba Hogela ba Milika ba Tirisa. 34Daʼõ ngaʼõtõ Manase, ha waʼato ira niʼofaja, no 52,700. 35Ba daʼe ngaʼõtõ ndraono Geferaji andrõ: Soetela, toea ngaʼõtõ Zoetela andrõ, ba Becheri, toea ngaʼõtõ Mbecheri andrõ, ba Tahana, toea ngaʼõtõ Dahana andrõ. 36Ba daʼe Ndraono Zoetela andrõ: Erano, toea ngaʼõtõ Gerano andrõ. 37Daʼõ ngaʼõtõ ndraono Geferaji, ha waʼato ira, niʼofaja, no 32,500. Daʼõ ngaʼõtõ ndraono Josefo andrõ. 38Ba ba ngaʼõtõ ndraono Mbenijami, ba Bela, toea ngaʼõtõ Mbela andrõ ba Asibeli, toea ngaʼõtõ Gasibeli andrõ, ba Ahiramo, toea ngaʼõtõ Gahiramo andrõ, 39ba Soefama, toea ngaʼõtõ Zoefama andrõ, ba Hoefama, toea ngaʼõtõ Hoefama andrõ. 40Ba ono Mbela andrõ, ba Aradi ba Naʼama; Aradi, ba toea ngaʼõtõ Garadi andrõ, ba Naʼama, ba toea ngaʼõtõ Naʼama andrõ. 41Daʼõ ngaʼõtõ ndraono Mbenijami andrõ, ha waʼato ira, niʼofaja, no 45,600. 42Ba daʼe ngaʼõtõ ndraono Dano andrõ: Soeha, toea ngaʼõtõ Zoeha andrõ; daʼõ ngaʼõtõ Dano, ba watalifoesõta andrõ chõra. 43Fefoe ngaʼõtõ Zoeha andrõ, ha waʼato ira, niʼofaja, ba no 64,400. 44Ba ba ngaʼõtõ ndraono Gaseri, ba Jimena, toea ngaʼõtõ Jimena andrõ, ba Jisiwi, toea ngaʼõtõ Jisiwi andrõ, ba Beria, toea ngaʼõtõ Mberia andrõ. 45Ba iraono Mberia, ba Heberi, toea ngaʼõtõ Heberi andrõ, ba Malekiëli, toea ngaʼõtõ Malekiëli andrõ. 46Ba ono Gaseri alawe, ba Sera dõi. 47Daʼõ ngaʼõtõ ndraono Gaseri, ha waʼato ira, niʼofaja, no 53,400. 48Ba ba ngaʼõtõ ndraono Nafatali, ba Jaseëli, toea ngaʼõtõ Jaseëli andrõ, ba Goeni, toea ngaʼṍtõ Goeni andrõ, 49ba Jeseri, toea ngaʼõtõ Jeseri andrõ, ba Silemi, toea ngaʼõtõ Zilemi andrõ. 50Daʼõ ngaʼõtõ Nafetali ba wafalitoesõta andrõ chõra, ba faʼato niʼofaja, jaʼirá, ba no 45,400. 51Daʼõ niʼofaja, Iraono Gizeraëli, no 601,730.
52II. Ba hoemede Jehowa chõ Moze, imane: 53Chõra andrõ lafaosa danõ, nitoetoe tanõ, balazi ha waʼato ira. 54Sato niha, ba ebolo danõ labeʼe tána chõra, ba ba zi õnaʼõna faʼato, ba laʼõnaigõ wogoi tána chõra; balazi ha waʼato niʼofaja, jaʼira, ba wogoi tána chõra. (F. 33, 54. Jos. 14, 2). 55Ba nilaoe dahõdahõ ba wamaosa tanõ, samboesamboea mado zanema, balazi dõi doeara. 56Dali dahõdahõ, ba wamaosa chõra, tána chõra, ba zato niha ba ba zambõ faʼato. 57Ba daʼõ niʼofaja ono Lewi, samboesamboea watalifoesõta: Gereso andrõ, toea ngaʼõtõ Gereso, ba Kahati, toea ngaʼõtõ Gahati andrõ, ba Merari, toea ngaʼõtõ Merari andrõ. (Moz. II. 6, 16). 58Daʼõ ngaʼõtõ Lewi andrõ: ngaʼõtõ Libeni andrõ, ba ngaʼõtõ Heberona, ba ngaʼõtõ Maheli, ba ngaʼõtõ Hoesi, ba ngaʼõtõ Gora. Ba ono Gahati, ba Ameramo andrõ; 59ba foʼomo Gameramo, ba Jochebe, ono Lewi alawe, ononia ba danõ Miseraji; ba ono daʼõ chõ Gameramo, ba Aʼaroni ba Moze ba talifoesõra alawe andrõ, Mirija. (Moz. II. 6, 20). 60Ba ono Gaʼaroni, ba Nadabi ba Abihoe ba Eleazari ba Itamari. 61Ba Nadabi andrõ ba Abihoe, ba mate, me laʼohe fõna Jehowa galitõ si tenga. (Moz. III. 10, 2). 62Ba faʼato niʼofaja, jaʼirá, ba no 23,000, dozi motõi matoea, si sara waw̃a faʼeboea ba si aʼa moroi andrõ. Lõʼõ sa moefao ira ba wangofaja Iraono Gizeraëli bõʼõ mege, me lõ sinemara tána chõra tanõ, ba ngai Ndraono Gizeraëli bõʼõ. 63Daʼõ niʼofaja ndra Moze Eleazari ere andrõ, sangofaja Iraono Gizeraëli ba zaloʼo tanõ Ndraono Moabi, ba mbewe Joridano, ba gamaoedoe Jericho. 64Ba samõsa lõʼõ saʼae ba daʼõ niʼofaja ndra Moze Aʼaroni ere no, me laʼofaja Ndraono Gizeraëli ba danõ si mate ba gahe hili Zinaʼi. 65Noa sa iw̃aʼõ chõra Jehowa, si mate ba danõ si mate ira; ba no tobali samõsa lõ si tosai, jaʼirá andrõ, baero Galebi, ono Jefoene, ba Josoea, ono Noeni. (F. 14, 23).