Soera Josoea Faz 7

I. Fanagõ Nachano andrõ. II. Loealoeania wa tebai lalaw̃a mbanoea Gaʼi andrõ. III. Fangandrõ Josoea ba fanema Lowalangi li. IV. Teboka wanagõ andrõ ba tehoekoe Nachano.

1I. Ba noemalõ danga Ndraono Gizeraëli ba zalacha andrõ, ihalõ zalacha Achano, ono Charimi ono Zabadi ono Zera, mado Joeda. Ba mofõnoe Jehowa ba Ndraono Gizeraëli. (F. 22, 20).

2II. Ba ifatenge niha Josoea, moroi ba Jericho, ifatenge ba Gaʼi, ba ngai Mbeti Avena, tánõ ba gatoemboecha loeo iʼotarai Mbetiëli, imane chõra: Miʼae misi jaw̃a ba mifaoezeï danõ. Ba mõi misi jaw̃a niha andrõ, ba wamaoeze tanõ. 3Ba lafoeli ira chõ Josoea, lamane chõnia: Alacha lõ ahori mõi misi jaw̃a niha! Na mato doea ngahõnõ, irege tõloe ngahõnõ, zi mõi misi jaw̃a, ba wanoewõ Aʼi andrõ. Bõi fakao zato fefoe; lõʼõ sa atotó ira. 4Ba mõi misi jaw̃a ira, mato tõloe ngahõnõ niha, ba teʼala ira labeʼe banoea Gaʼi andrõ. 5Ba mato tõloe ngafoeloe a õnõ laboenoe chõra banoea Gaʼi ba lagohi ira baero mbanoea, iroegi Zabari ba lalaoe chõra ba zanaere hili. Ba amaedola zangoeloe dõdõ zato, timba zi tobali idanõ.

6III. Ba isika noechania Josoea, ifalõgoe tooe ia ba danõ, fõna daw̃ola gamaboeʼoela li chõ Jehowa, iroegi bongi, jaʼia ba satoea ndraono Gizeraëli, lalaoe gawoegawoe ba hõgõra. 7Ba imane Josoea: He Soʼaja, Jehowa, hadia wa no õfaʼõtõ ba Joridano niha andre, ba wameʼe ba danga Ndraono Gamori jaʼaga, ba wamakiko jaʼaga? Enaʼõ na ahono dõdõma mege ba na maʼiagõ manõ jefo Joridano! 8Fondrondrongo, Soʼaja! Hadia niw̃aʼõgoe, me no labaliʼõ ira foeri Iraono Gizeraëli, fõna nemalira? 9Ba larongo dania Dawa Ganaʼana, dozi soi ba danõ andre ba lafaʼoeʼoe ndraʼaga ba lahori ba danõ motõi jaʼaga, ba he õwisa ba dõimõ andrõ, seboea andrõ? 10Ba imane Jehowa chõ Josoea: Faoso, hana wa no õfalõgoe tooe ndraʼoegõ? 11No mamazõchi horõ Ndraono Gizeraëli, no lasawõ gamachoita andrõ chõgoe, nifachoigoe chõra; noa sa lahalõ zalacha andrõ õsa; noa sa managõ ba no labiniʼõ na; noa naʼi labiniʼõ barõ gamagamara. 12Ba tebai lalaw̃a nemalira Iraono Gizeraëli; labaliʼõ ira foeri fõna nemalira, me no tobali salacha ira. Lõʼõ saʼae oetolo ami, na lõ miheta ba chõmi zalacha andrõ. 13Faoso, famoni ira fefoe, õmane: Miʼamoni, irege mahemoloe! Imane sa Jehowa, Lowalangi Ndraono Gizeraëli: No so ba chõmi zalacha, jaʼami Iraono Gizeraëli; tebai milaw̃a nemalimi, irege no miheta ba chõmi zalacha andrõ. (Moz. II. 19, 10). 14Ba miʼondrasi, si hoelõ wongi, samboesamboea mado; ba mado andrõ, si gõna chõ Jehowa, ba ndramoeʼondrasi, sarasara daha; ba si sara daha andrõ, si gõna chõ Jehowa, ba laʼondrasi, sambasamba omo; ba si samba omo andrõ, si gõna chõ Jehowa, ba laʼondrasi samõsamõsa. 15Ba si gõna dania ba zalacha andrõ, ba nitoenoe ba galitõ, jaʼia ba si so chõnia fefoe, bõrõ me no isawõ nifachoi Jehowa ba me no ifazõchi horõ ba Ndraono Gizeraëli.

16IV. Ba ihoelõ wongi wemaoso Josoea, iw̃aʼõ laʼondrasi Iraono Gizeraëli, samboesamboea mado, ba gõna mado Joeda. 17Ba iw̃aʼõ laʼondrasi daha mado Joeda, ba gõna maʼoewoe Zera. Ba iw̃aʼõ laʼondrasi maʼoewoe Zera samõsamõsa, ba gõna Zabadi. 18Ba iw̃aʼõ laʼondrasi si samba omo jaʼira, samõsamõsa, ba gõna Nachano, ono Charimi ono Zabadi ono Zera, mado Joeda. 19Ba imane Josoea chõ Nachano: He onogoe, fosoemange Jehowa, Lowalangi Ndraono Gizeraëli, ba soeno ia ba ombachaʼõ chõgoe nilaoemõ, bõi biniʼõ chõgoe. 20Ba itema li Josoea Achano, imane: Si ndroehoe, no oefazõchi horõ chõ Jehowa, Lowalangi Ndraono Gizeraëli, daʼoeʼombachaʼõ zilalõ dangagoe: 21No oeʼila ba nihalõda andrõ mbaroe seboea, baroe Zineara, si sõchi, ba firõ, doea ngaotoe ba roefia ba samboea wamachai mbaroe, anaʼa, lima woeloe roefia fanimba, ba terooe dõdõgoe, ba oehalõ, ba hiza, no moebiniʼõ barõ danõ, ba daloe nose chõgoe, fabaja firõ andrõ. 22Ba ifatenge zinenge Josoea, ba fagohi daʼõ, lasaw̃a nose, ba hiza, no moebiniʼõ ba nose chõnia, fabaja firõ andrõ. 23Ba lahalõ ba daʼõ baose ba laʼohe chõ Josoea ba ba Ndraono Gizeraëli fefoe, latooeʼõ tooe fõna Jehowa. 24Ba ihalõ Josoea Nachano andrõ, maʼoewoe Zera, awõ wirõ andrõ, awõ mbaroe, awõ wamachai mbaroe andrõ, ba ononia matoea ba ononia alawe, fabaja saw̃inia ba kalidenia, ba biribirinia, ba osenia, awõ fefoe hadia ia zi so chõnia; ba fao Ndraono Gizeraëli fefoe; laʼohe mijaw̃a ba ndraso Nachori. 25Ba imane Josoea: Ha lõ atekiko ndraʼaga õbeʼe! Jamoefakiko ndraʼoegõ Jehowa, maʼõchṍ! Ba lateboe kara ia Iraono Gizeraëli fefoe ba latoenoe ira ba lahawoei kara. 26Ba oja laʼowoeloi kara, baloebaloenia, iroegi maʼõchṍ andre. Awena alõ wõnoe Jehowa, sabõlõbõlõ. Andrõ labeʼe tõi naha andrõ ndraso Nachori, iroegi maʼõchṍ andre. (Hos. 2, 15).