Soera Josoea Faza 8

I. Faʼoneche Josoea ba mbanoea Gaʼi andrõ. II. Atoeʼa ira ba Gaʼi. Ladoedoegõ mbanoea Iraono Gizeraëli. III. Naha wameʼe soemange ba hili Gebala, famahowoeʼõ ba fangelifi.

1I. Ba imane Jehowa chõ Josoea: Bõi ataʼoe ndraʼoegõ ba bõi atalõ dõdõoe. Ohe zabõlõ fefoe ba laboe, ae misi jaw̃a ba Gaʼi. Hiza, no oebeʼe ba dangaoe razo Gaʼi andrõ, awõ mbanoeania, awõ danõnia. (Moz. I. 15, 1 b. t.). 2Ba õlaoe ba mbanoea Gaʼi ba chõ razora nilaoemõ ba Jericho ba chõ razora; ba hadia nisõndrami chõra ba oerifõra, ba hana na mihalõ chõmi. Ba õfatenge õsa, niha, saminiʼõ jaʼira ba gero mbanoea. (Moz. V. 20, 14). 3Ba maoso Josoea, awõ zabõlõ fefoe, ba weʼamõi misi jaw̃a ba Gaʼi. Ba itoetoejoe zi tõloe ngafoeloe sabolõ Josoea ba ifatenge, ba zi bongi. 4Ba ibeʼe li chõra, imane: Si tobini dania ami ba gero mbanoea; bõi arõoe ami ba ngai mbanoea ba si teʼanõ manõ ami fefoe. 5Ba jaʼodo, awõ fefoe zi fao chõgoe, ba mahatõʼõ ndraʼaga ba mbanoea; ba na mõi ira baero, si mane no, ba wangondrasi jaʼaga, ba moloi ndraʼaga. 6Ba lagohi dania ndraʼaga, irege no aefa ira ba mbanoea mabeʼe; lamane sa dania dõdõra: moloi ira, si mane ba zi fõfõna mege. 7Ba moloi manõ ndraʼaga. Ba so dania ami, moroi ba mbinimbini andrõ, ba atoeʼa ami ba mbanoea mibeʼe; Jehowa, Lowalangimi, zameʼe ba dangami. 8Ba na no atoeʼa ami mibeʼe, ba migoeleʼõ galitõ ba mbanoea andrõ. Miʼoʼõ niw̃aʼõ Jehowa. Hiza, no oebeʼe li chõmi! 9Ba iʼefaʼõ ira Josoea, ba lasaw̃a mbinimbini andrõ, laʼiagõ gotaloeara Mbetiëli Gaʼi, tánõ ba gaechoela loeo iʼotarai Gaʼi. Ba lõ aefa Josoea ba zi mõi manoewõ, ba zi bongi andrõ. 10Ba ihoelõ wongi Josoea wamõfõʼõ sanoewõ, ba isaw̃a misi jaw̃a Gaʼi, awõ zatoea Ndraono Gizeraëli, laʼiagõ fõna zanoewõ. 11Ba dozi sabõlõ, awõnia, ba fao misi jaw̃a, lahatõʼõ ira, laroegi gamaoedoe mbanoea, ba molombase ira tánõ jõoe, iʼotarai Gaʼi, daso ba gotaloeara Gaʼi. 12Awena ifõfõʼõ niha, mato lima ngahõnõ, ba ifatenge ba mbinimbini andrõ, ba gotaloeara Mbetiëli Gaʼi, tánõ ba gaechoela loeo, iʼotarai mbanoea. 13Ba dozi sanoewõ, sabõlõ fefoe, jõoe mbanoea, awõ zi so moroi foeri, ba fafaʼese tánõ ba gaechoela, iʼotarai mbanoea. Ba Josoea, ba isaw̃a daloe ndraso, ba zi bongi andrõ.

14II. Ba me iʼila daʼõ razo Gaʼi, ba laʼaliogõ banoea Gaʼi, lahoelõ wongi, wangondrasi Iraono Gizeraëli, ba wasõndrata enaʼõ, razo awõ zabõlõ chõnia fefoe ba naha nihonogõi, fõnafõna zaloʼo. Ba lõ iʼila, wa no so zi tobini tánõ ba gaechoela, iʼotarai mbanoea. 15Ba labeʼe niʼalani ira Josoea ba Iraono Gizeraëli fefoe, moloi ira, lasaw̃a danõ si mate. 16Ba laʼoroiʼõ fefoe zi so jomo ba mbanoea na, ba wolohi jaʼira, ba lagohi Josoea, ba arõoe aefa ira ba mbanoea. 17Ba samõsa lõ si tosai ba Gaʼi ba ba Mbetiëli, si lõ mõi ba wolohi Iraono Gizeraëli, ba lõʼõ sa moekoesi mbawa gõli mbanoea foerira, ba lagohi Ndraono Gizeraʼeli. 18Ba imane Jehowa chõ Josoea: Oroʼõ doho, si so ba dangaoe, ba Gaʼi andrõ; oebeʼe saʼae ba dangaoe! Ba iʼoroʼõ Josoea doho andrõ si so ba dangania, ifaoedoegõ Gaʼi. 19Ba laʼaliogõ ira si tobini andrõ, larõi nahara, foelõi ira, me iʼoroʼõ danga Josoea, lasaw̃a mijomo, atoeʼa ira; ba ladaʼidaʼi wogoeleʼõ alitõ. 20Ba me labaliʼõ ira foeri banoea Gaʼi no mege, ba laʼila mijaw̃a zimbo mbanoea andrõ, ba atata dõlara, tebai moloi ira, heza gõi lasaw̃a enaʼõ. Ba si no moloi andrõ, sanaw̃a tanõ si mate ba labaliʼõ ira foeri ba zolohi andrõ. 21Ba laʼila ira Josoea ba Iraono Gizeraëli fefoe wa no atoeʼa ba mbanoea zi tobini andrõ, awõ zimbo mbanoea mijaw̃a, ba lafoeli ira, ba fasõndra ba mbanoea Gaʼi andrõ. 22Ba lafaondragõ ira si so jomo ba mbanoea, tobali tolazi ira ba gotaloea Ndraono Gizeraëli, so moroi fõna ba so moroi foeri. Ba laʼõʼõtõ tooe, irege samõsa lõ si tosai, soloi enaʼõ ba saoeri. 23Ba razo Gaʼi andrõ ba laraʼoe aoeri ba laʼohe chõ Josoea. 24Ba me no ahori laboenoe Iraono Gizeraëli mbanoea Gaʼi andrõ, solohi jaʼira mege, baero ba mbenoea, ba danõ si mate, me no ahori mate ba mbawa ziʼõli, irege samõsa lõ si tosai, ba mangawoeli ba Gaʼi Ndraono Gizeraëli fefoe ba laboenoe zi so jomo ba mbanoea. 25Ba tobali felendroea ngahõnõ zi mate, me loeo daʼõ ira matoea ba ira alawe, banoea Gaʼi andrõ fefoe. 26Ba lõ ibõda dangania Josoea wangoroʼõ toho no mege, irege no ahori tefakiko mbanoea Gaʼi andrõ. 27Ha oerifõra ba hadia ia nisõndrara ba mbanoea, ba lahalõ chõra Iraono Gizeraëli, dali niw̃aʼõ Jehowa, oroisania chõ Josoea. 28Ba ifatoenoeʼõ Gaʼi Josoea, labaliʼõ adoedoela si lõ mamalõmalõ, tanõ si mate, iroegi maʼõchṍ, andre. 29Ba ifataw̃iʼõ ba dõla geoe razo Gaʼi, iroegi tánõ owi. Ba me aechoe loeo, ba iw̃aʼõ Josoea, laheta ba dõla geoe mbotonia, ba latiboʼõ baero mbanoea ba lahõna gara baloebaloenia; iroegi maʼõchṍ andre. (Moz. V. 21, 23).

30III. Ba ifazõchi naha wameʼe soemange Josoea chõ Jehowa, Lowalangi Ndraono Gizeraëli, ba hili Gebala, 31iʼoʼõ niw̃aʼõ genoni Jehowa andrõ, Moze ba Ndraono Gizeraëli, nitanõ ba zoera goroisa andrõ chõ Moze: naha wameʼe soemange kara si lõ moetoto, si lõ moefatõrõ fakake siʼõli, ba labeʼe zoemange nitoenoe chõ Jehowa, ba detenia ba lataba zoemange fangorifi. (Moz. II. 20, 25. Moz. V. 27, 4). 32Ba isoera ba daʼõ ba dete gara goroisa Moze andrõ, nisoerania ba Ndraono Gizeraëli. 33Ba dozi Iraono Gizeraëli ba satoeara ba koemandroe ba sangoehoekoe, ba no lafatambai daw̃ola gamaboeʼoela li, no fangai ba gere ono Lewi andrõ, samabea tawõla gamaboeʼoela li chõ Jehowa, he niha bõʼõ, ba he madora, matonga tánõ ba hili Garisi ba matonga tánõ ba hili Gebala, laʼoʼõ niw̃aʼõ genoni Lowalangi andrõ, Moze, fõna, ba wamahowoeʼõ mado Gizeraëli. (Moz. V. 27, 12). 34Ba noa daʼõ, ba ibaso [Josoea] fefoe daroma li oroisa andrõ, famahowoeʼõ ba fangelifi, dali sibai zi so ba zoera goroisa andrõ. 35Samboea li lõʼõ, niw̃aʼõ Moze, si lõ ibaso Josoea ba Ndraono Gizeraëli fefoe, soroedoe, ba he ba ndra alawe ba he ba ndraono ba he ba niha bõʼõ, si no fao chõra.