Soera Josoea Faza 9

I. Lafabõbõ ira razo Ndrawa Ganaʼana, ba wanimba Josoea. II. Faʼoneche mbanoea Gibeona andrõ; fawoeʼoesa li chõ Josoea. III. Teboka walimosa andrõ; labeʼe sawoejoe mbanoea Gibeona andrõ.

1I. Ba me larongo daʼõ razo fefoe, jefo Joridano, ba hili ba ba zaloʼo ba si hene asi seboea fefoe irege tánõ ba hili Libano, Dawa Cheti andrõ ba Iraono Gamori ba Dawa Ganaʼana ba Dawa Weresi ba Dawa Hewi ba Dawa Jeboesi, 2ba laʼoroedoegõ ira, ha sara dõdõ, ba wanimba Josoea ba Iraono Gizeraëli.

3II. Ba larongo banoea Gibeona andrõ hadia nilaoe Josoea ba Jericho ba ba Gaʼi. 4Ba laʼonecheʼõ gõi, maoso ira, lafatõʼõ gõra ba lala, siʼe satoea labeʼe ba hoeloe galidera, awõ naha nagoe satoea, si no asika, nibõbõ. 5Ba badagahe satoea, si no moebalo labeʼe ba gahera, laʼonoecha noecha satoea ba fefoe koee, nifatõʼõra, ba no okõli, kiwoʼõ saʼae. 6Ba mõi ira chõ Josoea ba golombasew̃a ba Giligala, ba lamane chõnia ba ba Ndraono Gizeraëli: Maʼotarai danõ sarõoe, ba datalaoe fawoeʼoe li. 7Ba lamane Iraono Gizeraëli ba Ndrawa Hewi andrõ: Ma dania ba daʼe chõda so mbanoeada chõmi, ba he mawisa fawoeʼoe li chõmi? 8Ba lamane chõ Josoea: Sawoejoemõ ndraʼaga. Ba imane Josoea: Ha niha ami ba heza miʼotarai? 9Ba lamane chõnia: Tanõ sarõoe sibai maʼotarai, jaʼaga sawoejoemõ, bõrõ doeria Lowalangimõ andrõ, Jehowa; noa sa marongo doeriania, he hadia ia fefoe nilaoenia ba danõ Miseraji andrõ, 10ba he zoei fefoe nilaoenia ba razo Ndraono Gamori andrõ si daroea, jefo Joridano, Sihona, razo Hesibona ba Ogi, razo Mbazana ba Gasaroti. (Moz. IV. 21, 24). 11Ba lamane chõma satoeama ba banoeama fefoe: Mifaigi gõmi ba lala ba mifaondragõ ira, ba mimane chõra: Sawoejoemi ndraʼaga, ba milaoe fawoeʼoe li chõma. 12Jāʼe koee andre chõma; aoechoe na, me mafaʼanõ ba chõma, õma ba lala, me mofanõga weʼamõi chõmi, ba hiza, no okõli ba kiwoʼõ. 13Ba jāʼe naha nagoe chõma: bohooe me mafoʼõsi, ba iadaʼe, ba no atika; ba jāʼe noechama ba badagahema: no ahachõ sibai, bõrõ waʼarama ba lala. 14Ba lahalõ gõra andrõ õsa Iraono Gizeraëli, ba lõ lasofoe mbawa Jehowa. 15Ba ilaoe fahoewoe chõra Josoea, fawoeʼoe li ira, ba wangorifi jaʼira. Ba mõi ba hõloe chõra zatoea mbanoea.

16III. Ba ha tõloe bongi aefa fawoeʼoe li ira, ba larongo wa sahatõ ira, wa ba daʼõ chõra so mbanoeara. 17Ba maoso Ndraono Gizeraëli, ba ha doea wongi, ba laroegi mbanoea chõra. Ba tõi mbanoeara andrõ, ba Gibeona ba Kafira ba Beʼeroti ba Kiriati Jeari. 18Ba laʼorifi ira Iraono Gizeraëli, me no mõi ba hõloe chõra zatoea mbanoea ba chõ Jehowa, Lowalangi Ndraono Gizeraëli. Ba moekõkõkõkõ zato fefoe ba zatoea andrõ. 19Ba lamane salaw̃a fefoe ba zato: No mõi ba hõloe ndraʼaga chõra ba chõ Jehowa, Lowalangi Ndraono Gizeraëli, andrõ wa lõ tola tababaja ira. 20Talaoe chõra zane ba taʼorifi ira, fa bõi gõna fõnoe [Lowalangi] ita, me no mõi ita ba hõloe chõra. 21Ba lamane chõra salaw̃a: Niʼorifi ira. Ba tobali sangai eoe ba sanaʼoe idanõ ira ba mbanoea fefoe, si mane niw̃aʼõ zalaw̃a andrõ chõra. 22Ba ifahedeʼõ chõra Josoea, ba imane chõra: Hana wa milimo ndraʼaga, wangoemaʼõ: Banoea sarõoe ndraʼaga, ba no ba daʼe chõda mbanoeami? 23Andrõ ja niʼelifi ami ba bõi jamalõmalõ wa sawoejoe ami, sangai eoe ba sanaʼoe idanõ ba nomo Lowalangigoe! 24Ba latema li Josoea, lamane: No teʼombachaʼõ chõma, jaʼaga sawoejoemõ, hadia niw̃aʼõ Lowalangioe Jehowa ba genoninia Moze andrõ, wa edõna ibeʼe chõmi danõ maʼafefoe, awõ wa edõna ihori fõnami fefoe niha ba danõ. Ba ataʼoe sibai ndraʼaga miboenoega; andrõ wa mamanõ. 25Ba ijaʼe, ba ba dangaoe so ndraʼaga; satoelõ dõdõoe ba somasiʼõ, ba fatõrõ chõma. 26Ba ilaoe chõra zi manõ, iʼefaʼõ ira ba danga Ndraono Gizeraëli, fa bõi laboenoe. 27Ba ibaliʼõ sangai eoe ba sanaʼoe idanõ ba mbanoea fefoe ba ba naha wameʼe soemange chõ Jehowa ira Josoea, me loeo daʼõ, iroegi maʼõchṍ andre, ba nahia nitoejoe Jehowa dania.