Soera Josoea Faza 10

I. Dalima razo Ndrawa Ganaʼana, sangoroedoegõ jaʼira ba wanoewõ Gibeona andrõ. II. Iʼalani razo si dalima andrõ Josoea, ba zinga Gibeona. III. Lafakiko razo andrõ, si dalima. IV. Lahalõ chõra danõ Ganaʼana tánõ raja.

1I. Ba me irongo Adonisede, razo Jeroezalema, wa no atoeʼa ira ba Gaʼi ibeʼe Josoea, awõ wa no ifakiko ira, wa no ilaoe ba Gaʼi ba chõ razora nilaoenia ba Jericho ba chõ razora, awõ wa no fawoeʼoe li ira mbanoea Gibeona Ndraono Gizeraëli, wa no lasaigõ ira ba ngaira, ba ataʼoe sibai ira, 2me no banoea seboea Gibeona andrõ, fondrege zeboea ba danõ; eboea moroi ba Gaʼi, ba oi sabõlõ sibai mbanoeara. 3Ba ifatenge Adonisede andrõ, razo Jeroezalema, zinenge chõ Hohama, razo Heberona ba chõ Wireamo, razo Jaramoeti ba chõ Jafia, razo Lachisi ba chõ Debiri, razo Negelona, imane chõra: 4Miʼae chõgoe ba mitolodo, ba wanoewõ banoea Gibeona andrõ, me no atoelõ ira chõ Josoea ba ba Ndraono Gizeraëli. 5Ba laʼoroedoegõ ira razo Ndraono Gamori andrõ, si dalima, ba so moroi sa: razo Jeroezalema ba razo Heberona ba razo Jaramoeti ba razo Lachasi, ba razo Negelona, awõ zabõlõ chõra fefoe; ba lafasoei Gibeona, labõrõtaigõ lasoewõ.

6II. Ba lafatenge chõ Josoea ba golombasew̃a ba Giligala banoea Gibeona, lamane chõnia: Bõi loeloe zawoejoemõ; taʼitaʼi mijaw̃a chõma, orifiga, tologa; noa sa laʼoroedoegõ ira oedoema dozi razo Ndraono Gamori andrõ, si so ba hili. 7Ba mõi mijaw̃a Josoea, moroi ba Giligala, awõ zi mõi fasoewõ fefoe, dozi sabõlõ. 8Ba imane Jehowa chõ Josoea: Bõi ataʼoefi ira, oebeʼe sa ba dangaoe ira; samõsa lõ ba chõra sabõlõ moroi chõoe! 9Ba iroegi ira Josoea, lõ moedõnadõna, me no sara wongi mowaõwaõ ndra Josoea, laʼoroi Giligala. 10Ba hoemoefa ira ibeʼe Jehowa, fõna Ndraono Gizeraëli, ba laʼalani sibai ira, ba zinga Gibeona ba lagohi ira ba lala ba zanõsõ andrõ ba Mbeti Horona, moloi labeʼe, iroegi ba Gaseka ba iroegi Makeda. 11Ba me no laroegi zanoee andrõ ba Mbeti Horona, woloi fõna Ndraono Gizeraëli, ba ihawoei ira kara segeboea Jehowa, moroi ba mbanoea si jaw̃a, iroegi ba Gaseka, ba mate ira, ba ato zi mate ba deoe kara andrõ, moroi ba niboenoe Ndraono Gizeraëli siʼõli. 12Me loeo daʼõ hoemede Josoea chõ Jehowa, me ibeʼe ba danga Ndraono Gizeraëli Ndraono Gamori andrõ Jehowa; imane ba zanehe Ndraono Gizeraëli: ”Badoegõʼõ, jaʼoegõ loeo, ba Gibeona, ba jaʼoegõ baw̃a, ba ndraso ba Najalona!” 13Ba ibadoegõ ia loeo ba tebato wofanõ mbaw̃a, irege no lalaoe mbalõra Iraono Gizeraëli ba nemalira. Hadia, lõ moesoera daʼõ ba ”zoera zatoelõ” andrõ? Ba tebato loeo ba daloe lalania ba mbanoea ba lõ aõsõ ia aechoe, aracha maʼõmaʼõchõ. (Jes. 28, 21. Sam. II. 1, 18). 14Ba sara lõ loeo si mane daʼõ, he fõna õ ba he foeri õ, wa iʼoʼõ li niha Jehowa; Jehowa sa atṍ zi fasoewõ, salahi Ndraono Gizeraëli. 15Ba mangawoeli ba golombasew̃a ba Giligala Josoea, awõ Ndraono Gizeraëli fefoe.

16III. Ba moloi razo andrõ, si dalima, ba labiniʼõ ira ba dõgi narõ hili, ba zinga Makeda. 17Ba teʼombachaʼõ chõ Josoea: No labiniʼõ ira ba dõgi narõ hili, ba zinga Makeda, razo andrõ, si dalima. 18Ba imane Josoea: Mifagaõlõ gara seboea ba mbawa dõgi andrõ, ba mifataro niha, ba ngai, ba wanaro. 19Ba jaʼami, ba bõi mibato, migohi nemalimi, miboeboenoe moroi foeri, bõi mifaʼamõi mijomo ba mbanoeara; noa sa atṍ ibeʼe ba dangami ira Lowalangimi, Jehowa! 20Ba me no aloea latimba ira Josoea ba Iraono Gizeraëli, me no teʼala sibai labeʼe, irege arachá ahori — si tosai na, ba no lachamõ mbanoea saró, — 21ba mangawoeli niha fefoe chõ Josoea, ba golombasew̃a, ba Makeda, lõ hadia ia, si gõna ira; ba lõʼõ saʼae si lõ ataʼoe molaw̃a Iraono Gizeraëli. 22Ba imane Josoea: Mibokai mbawa dõgi andrõ ba mihalõ chõgoe razo andrõ, si dalima, bacha ba dõgi. 23Ba laʼoʼõ daʼõ; laʼohe razo andrõ, si dalima, ba dõgi andrõ: razo Jeroezalema ba razo Heberona ba razo Jaramoeti ba razo Lachisi ba razo Negelona. 24Ba me no laʼohe chõ Josoea razo andrõ, ba ifakaoniʼõ ndra matoea Ndraono Gizeraëli fefoe; ba imane ba zangoloiʼõ sanoewõ, si fao chõnia mege: Miʼae ba daʼe ba mihoendragõ mbagi razo andre! Ba laʼondrasi, lahoendragõ mbagi. 25Ba imane chõra Josoea: Bõi miʼataʼoefi ba bõi atalõ dõdõmi! Miʼabeʼeʼõ dõdõ ba jaʼabõlõ ami; si manõ sa nifatõrõ Jehowa ba nemalimi fefoe, nitimbami! 26Aefa daʼõ, ba ifaboenoeʼõ ira Josoea ba me no laboenoe, ba ifataw̃iʼõ, lima ngaʼeoe dõla geoe; ba manaw̃anaw̃a ira ba dõla geoe andrõ, irege tánõ owi. 27Ba me aechoeʼaechoe loeo, ba ifahetaʼõ ba dõla geoe andrõ Josoea; ba latiboʼõ ba dõgi narõ hili andrõ, ba nibiniʼõra jaʼira mege; ba lafagaõlõ gara segeboea ba mbawa dõgi andrõ; iroegi maʼõchṍ andre. (Moz. V. 21, 23).

28IV. Ba me loeo daʼõ, ba atoeʼa gõi ira ba Makeda ibeʼe Josoea, lalaw̃a bawa ziʼõli, ba ilachaʼõ razora Josoea, awõ mbanoea, awõ niha fefoe, si so ba mbanoea bacha, samõsa lõ ibeʼe moloi; ba chõ razo Makeda ba ilaoe nilaoenia chõ razo Jericho. 29Aefa daʼõ, ba iheta ia ba Makeda Josoea, awõ Ndraono Gizeraëli fefoe, lasaw̃a Libena ba lasoewõ mbanoea Libena. 30Ba ibeʼe ba danga Ndraono Gizeraëli mbanoea daʼõ gõi Jehowa, fabaja razora, lalaw̃a bawa ziʼõli, ahori laboenoe niha si so ba mbanoea bacha, samõsa lõ labeʼe moloi; ba chõ razora, ba lalaoe nilaoera chõ razo Jericho. 31Aefa daʼõ, ba irõi Libena Josoea, awõ Ndraono Gizeraëli fefoe, lasaw̃a Lachisi, lafasoei ba lasoewõ. 32Ba ibeʼe ba danga Ndraono Gizeraëli Lachisi andrõ Jehowa; mahemoloe õ, ba atoeʼa ira, lalaw̃a bawa ziʼõli, ahori laboenoe niha ba mbanoea, lafatõrõ siʼaikõ nifatõrõra ba Libena. 33Ba moi mijaw̃a Horamo, razo Geseri, ba wanolo banoea Lachisi. Ba iʼalani ia, fabaja sabõlõ andrõ chõnia Josoea, irege samõsa lõ faloecha moloi, jaʼira andrõ. 34Aefa daʼõ, ba irõi Lachisi Josoea, awõ Ndraono Gizeraëli fefoe, lasaw̃a Negelona andrõ; lafasoei ba lasoew̃o. 35Ba atoeʼa ira, me loeo daʼõ, lalaw̃a bawa ziʼõli, laboenoe fefoe niha ba mbanoea, me loeo daʼõ; ifatõrõ siʼaikõ Josoea nifatõrõnia ba Lachisi. 36Aefa daʼõ, ba irõi Negelona Josoea, awõ Ndraono Gizeraëli fefoe, lasaw̃a Heberona ba lasoewõ. 37Atoeʼa ira ba lalaw̃a bawa ziʼõli, laboenoe razo, fabaja banoea si fasoei fefoe, fefoe niha, si so ba mbanoea bacha, tobali samõsa lõ faloecha moloi; ifatõrõ siʼaikõ Josoea nifatõrõnia ba Negelona: ilachaʼõ mbanoea, fabaja niha fefoe, si so ba mbanoea bacha. 38Ba isaw̃a Debira Josoea, awõ Ndraono Gizeraëli fefoe, ba lasoew̃o. 39Teʼala labeʼe, fabaja razo, ba banoea si fasoei, ba lalaw̃a bawa ziʼõli, lalachaʼõ fefoe niha ba mbanoea, tobali samõsa lõ faloecha moloi; nifatõrõ Josoea ba Heberona, ba ifatõrõ siʼaikõ ba Debira ba chõ razora ba si mane nifatõrõnia ba Libena ba chõ razora. 40Si manõ wangai Josoea chõnia tanõ maʼasagõrõ, hili ba tánõ raja ba saloʼo ba sanaere hili; ba razora fefoe iʼalani, tobali samõsa lõ faloecha moloi, ba ilachaʼõ fefoe zaoeri, si mane niw̃aʼõ Jehowa, Lowalangi Ndraono Gizeraëli. 41Ba teʼala ibeʼe Josoea, iʼotarai Gadesi Mbarenea, noemalõ ba Gasa ba tanõ Gosena andrõ maʼasagõrõ, iroegi Gibeona. 42Iʼosamoezaigõ wolaw̃a razo andrõ fefoe Josoea ba fangai chõnia tanõra; Jehowa, Lowalangi Ndraono Gizeraëli saʼae zanoewõ, salahi Ndraono Gizeraëli. 43Aefa daʼõ, ba ifoeli ia ba golombasew̃a ba Giligala Josoea, awõ Ndraono Gizeraëli fefoe.