Soera Josoea Faza 11

I. Fanoewõ Josoea Jabino andrõ ba si fao chõnia. II. Atoeʼa ira ba Hasora, ba lahalõ chõra danõ andrõ maʼafefoe. III. Fangohori Iraono Genaki andrõ.

1I. Ba me irongo daʼõ Jabino, razo Hasora, ba ifatenge chõ Jobabi, razo Madona ba chõ razo Zimerono ba chõ razo Nachisafi, 2ba ba razo jõoe, ba zohili ba ba zaloʼo, raja Gineroti, ba ndraso ba ba hili ba Dora ba mbewe nasi. 3Dawa Ganaʼana ba gatoemboecha ba ba gaechoela, Iraono Gamori ba Dawa Cheti ba Dawa Weresi ba Dawa Jeboesi ba hili ba Dawa Hewi, ba gahe hili Heremono ba danõ Misefa. 4Daʼõ zi so moroi si jaw̃a, awõ zabõlõ chõra fefoe, ato sibai, timba ngawoea nene ba mbewe nasi, ba oja gõi koedo ba koereta. 5Ba mamagõlõ razo andrõ fefoe, so ira ba molombase ira ba zinga mbombo Meromo, ba wolaoe ba Ndraono Gizeraëli. 6Ba imane Jehowa chõ Josoea: Bõi ataʼoefi ira; na mané waʼalaw̃a loeo mahemoloe, ba no tooe ba dánõ so ira fefoe, niboenoe Ndraono Gizeraëli, oebeʼe; niʼew̃a gõloeʼõloe koedo chõra ba nitoenoe goeretara. 7Ba ichamõ ira Josoea, awõ zabõlõ chõnia fefoe, lõ moedõnadõna, ba zinga mbombo Meromo andrõ, ba lahawoei ira. 8Ba ibeʼe ira ba danga Ndraono Gizeraëli Jehowa ba teʼala labeʼe, ba lagohi iroegi Zidona, banoea seboea andrõ, ba iroegi Misirefo Maji ba irege ba ndraso ba Misefe, tánõ ba gatoemboecha, ba laboenoe tooe, irege samõsa lõ tosai, soloi. 9Ba ifatõrõ chõra Josoea, niw̃aʼõ Jehowa chõnia: ifaʼew̃aʼõ gõloeʼõloe koedo chõra ba ifatoenoeʼõ goeretara.

10II. Ba mangawoeli Josoea, me loeo daʼõ ba atoeʼa ira ba Hasora, ba ifaboenoeʼõ razora. Hõgõ mbanoea ba nõri andrõ fefoe fõna Hasora andrõ. 11Ba laboenoea niha fefoe, si so ba mbanoea bacha, lalachaʼõ, lõ lasaigõ zonoso; ba ifatoenoeʼõ Hasora andrõ Josoea. 12Ba mõi ba danga Josoea mbanoea razo andrõ fefoe, fabaja razora fefoe, ba ifaboenoeʼõ, ilachaʼõ, iʼoʼõ niw̃aʼõ genoni Lowalangi andrõ, Moze. (Moz. V. 20, 13). 13Ba fefoe mbanoea nitaroeʼõ ba zoezoe hilihili ba lõ latoenoe Iraono Gizeraëli, ha siʼaikõ Hasora andrõ ifatoenoeʼõ Josoea. 14Ba hadia ia fefoe nisõndrara ba mbanoea andrõ ba oerifõra, ba lahalõ chõra Iraono Gizeraëli; ba niha fefoe, ba laboenoe, lahori, samõsa lõ laʼorifi. 15Si mane niw̃aʼõ Jehowa chõ genoninia Moze, si manõ mege niw̃aʼõ Moze chõ Josoea; daʼõ ifatõrõ Josoea; maʼifoe lõʼõ si lõ iʼoʼõ niw̃aʼõ Jehowa chõ Moze. 16Ba ihalõ chõnia danõ andrõ, maʼafefoe, sohili andrõ ba tánõ raja, maʼafefoe, ba tanõ Gosena, maʼasagõrõ, ba daso andrõ ba saloʼõ ba hili Ndraono Gizeraëli andrõ ba daso si fabõbõ ba daʼõ, 17iʼotarai hili andrõ si lõ eoeeoe, sanõsõ, mafi ba Zeʼira, iroegi Mbaʼali Gado ba ndraso ba gahe hili Libano, ba gahe hili Heremono; ba dozi razora, ba mõi ba dangania, ba teʼala ibeʼe, iboenoe. 18Ba ara iʼanoewõʼõ razo andrõ fefoe Josoea. 19Ba samboea lõ banoea sangaloeloe ba Ndraono Gizeraëli, ha Dawa Hewi andrõ, banoea Gibeona; oi ba wanoewõ mõi chõra. 20Moroi chõ Jehowa sa, wa abeʼe dõdõra, ba wasõndrata ba Ndraono Gizeraëli, enaʼõ tola lafakiko ira, lõ faʼahachõ dõdõ, enaʼõ tola lahori, si mane niw̃aʼõ Jehowa chõ Moze.

21III. Ba me loeo daʼõ, ba maoso Josoea, ba wangohori Iraono Genaki andrõ ba hili, ba Heberona ba ba Debira ba ba Ganaba, ba hili Ndraono Joeda andrõ ba ba hili Ndraono Gizeraëli, maʼafefoe; ba ifakiko ira, fabaja banoea chõra. (Moz. IV. 13, 23). 22Lõ nisaigõ Iraono Genaki, ba danõ Ndraono Gizeraëli, ha ba Gasa ba ba Gata ba ba Gasoto so zi tosai. (Sam. I. 17, 4). 23Ba ihalõ chõnia danõ maʼafefoe Josoea, itõrõ sibai niw̃aʼõ Jehowa chõ Moze, ba ibeʼe tána chõ ba Ndraono Gizeraëli, dali wabaliw̃ara ba madora. Ba lõʼõ saʼae fanoewõ ba danõ, ahono.