Soera Josoea

Faza 1
Faza 2
Faza 3
No comments:

Soera Zangoehoekoe Faza 7

I. Tefofanõ zato, lõ arõoerõoe nitoetoejoe. II. Teʼabeʼeʼõ dõdõ Gideono ba wangifi. III. Teʼala Ndraono Midiano andrõ ibeʼe Gideono.

1I. Ba ihoelõ wongi wemaoso Jeroebi-Mbaʼali, jaʼia Gideono, iʼohe niha andrõ fefoe, si fao chõnia; ba ba zinga goemboe Harodi molombase ira. Ba no jõoenia golombasew̃a Ndraono Midiano, iʼotarai hili More, ba ndraso misa. 2Ba imane Jehowa chõ Gideono: Abõlõ ato niha andrõ, si fao chõoe, tebai oebeʼe ba dangara Ndraono Midiano andrõ, ma dania lasoeno ira chõgoe Iraono Gizeraëli, ma lamane: Tangama wangorifima! 3Ba ao, farongogõ ba zato, õmane: Ha niha zataʼoe ba satalõ tõdõ, ba jamoefoeli ia, jamoeheta ia ba hili Gileadi! Ba 22,000 zangawoeli niha, tobali hatṍ 10,000 zi tosai. (Moz. V. 20, 8). 4Ba imane Jehowa chõ Gideono: Tõra zoei na niha; ohe mitooe ira ba mbewe nidanõ, enaʼõ oefõfõʼõ ira ba daʼõ. Ba niw̃aʼõgoe chõoe dania: Daʼõ zi fao chõoe, ba fao, ba dozi niw̃aʼõgoe chõoe: Bõi fao daʼõ, ba lõ mõi. 5Ba iʼohe mitooe ira ba mbewe nidanõ. Ba imane Jehowa chõ Gideono: Dozi samelai idanõ lelara, nifamelai nasoe, ba oniagõ, ba si manõ gõi dozi samalõdoehini tanõ, ba weʼamadoegõ tanga. 6Ba faʼato zamelai idanõ, ba no 300; ba tánõ bõʼõ fefoe, ba no samalõdoehini tanõ, ba wamadoe idanõ. 7Ba imane Jehowa chõ Gideono: Si tõloe ngaotoe niha andrõ, samelai idanõ, oebeʼe sangorifi jaʼami, daʼõ oeʼogoenaʼõ ba wameʼe ba dangaoe Iraono Midiano andrõ; ba tánõ bõʼõ fefoe, ba ndra mofanõ, jamoefoeli ia chõra zamõsaná. 8Ba lahalõ mbalazo andrõ chõra, awõ dorofe chõra; ba Iraono Gizeraëli bõʼõ fefoe, ba ifõfanõ, hana na ifoeli ia chõra zamõsaná, ha si 300 isaigõ chõnia. Ba olombasew̃a Ndraono Midiano, ba no tooenia, ba Ndraso.
9II. Ba ba zi bongi andrõ, ba imane chõnia Jehowa: Faoso, misaw̃a golombasew̃a, tooe andrõ, noa sa oebeʼe ba dangaoe ia! 10Ba na ataʼoeʼõ mõi mitooe, ba ohe ngoningonioe andrõ, Foera andrõ, ba miʼae mitooe ba zinga golombasew̃a, 11ba fondrongondrongo, hadia niw̃aʼõw̃aʼõ ba daʼõ, ba abeʼe dõdõoe dania, ba wanaw̃a olombasew̃a. Ba iʼohe ngoningoninia Foera andrõ, mõi ira mitooe, lahatõʼõ sibai ira ba zanoewõ andrõ, ba golombasew̃a. 12No oroedoe ba daʼõ, ba ndraso, Ndraono Midiano andrõ ba Iraono Gamaleki ba si oroi danõ tánõ ba gatoemboecha loeo, faʼoja wali waʼatora, ba ondra chõra, ba lõ moetaha moeʼerai, faʼoja ngawoea nene ba mbewe nasi waʼoja. 13Ba me no ahatõ Gideono, ba hiza zanoenõ chõ nawõnia fangifinia, imane: No mangifi ndraʼo: Oeʼila roti gandroe, si tegaõlõ mitooe ba golombasew̃a Ndraono Midiano, iroegi nose zalaw̃a, gõna ba daʼõ, ba asoʼa nose, tobali arõ ibeʼe [roti andrõ], ba tooe ba danõ so nose. 14Ba itema linia si samõsa, imane: Tenga bõʼõ daʼõ, no siʼõli Ndraono Gizeraëli andrõ, siʼõli Gideono andrõ, ono Joʼasi. No ibeʼe ba dangania Ndraono Midiano, fabaja olombasew̃a maʼafefoe, Lowalangi.
15III. Ba me no irongo Gideono nitoenõ Ndraono Midiano andrõ, fangifi andrõ, ba eloeahania, ba mangaloeloe ia; ba ifoeli ia ba golombasew̃a Ndraono Gizeraëli, moeʼao ia, imane: Talaboe! noa saʼae ibeʼe ba dangami golombasew̃a Ndraono Midiano. 16Ba iʼotõloe zi 300 niha andrõ, tõloe bawá ibeʼe, ba idozigõ ira torofe, awõ migõ si lõ õsi, ba dangara; ba bacha ba migõ andrõ, ba soeloe. 17Ba imane chõra: Mifaigi ndraʼo ba miʼoʼõ chõgoe; na no oeroegi zinga golombasew̃a, ba milaoe nilaoegoe. 18Na oelaoe dorofe, awõ zi fao chõgoe fefoe, ba jaʼami gõi molaoe torofe ba zi fasoei olombasew̃a fefoe, ba moeʼao ami, mimane: Fõda chõ Jehowa, fõda Gideono! 19Ba iroegi zinga golombasew̃a Gideono awõnia zi otoe andrõ, si fao chõnia, me taloe mbongi, me awena sibai lafataro zanaro, ba lalaoe dorofe ba laboto migõ andrõ ba dangara, ba tõloe bawá manõ, 20ba molaoe torofe, laboto migõ, ba latoejoe tangara kabera zoeloe, ba ba gambõlõ, ba torofe, ba wolaoe, ba moeʼao ira, lamane: Fõda chõ Jehowa, fõda Gideono! 21Ba lõ iboelõʼõ ia ba nahania zamõsana, ba zi fasoei olombasew̃a. Ba moeʼawa manõ ba golombasew̃a maʼafefoe, ba moloi, moeʼiraʼira. 22Ba me lalaoe dorofe si tõloe ngaotoe andrõ, ba faoma laʼõʼõtõ nawõra [Iraono Midiano] ba golombasew̃a maʼafefoe, ibeʼe Jehowa, ba moloi zi so ba golombasew̃a, laroegi Mbeti Hasita, tánõ ba Zereda, iroegi mbewe nidanõ ba Habeli Mehola, ba zinga Dabata. (Sin. 83, 10). 23Ba tekaoni gõi Ndraono Gizeraëli, mado Nafetali ba mado Gaseri ba mado Manase maʼafefoe, ba lagohi Ndraono Midiano. 24Ba ifatenge gõi zinenge Gideono ba hili mado Geferaji maʼasamboea, ifaw̃aʼõgõ chõra [ba daʼõ]: Miʼae mitooe, mifaondragõ Ndraono Midiano andrõ ba mibaʼa chõra gõtõna ba nidanõ misa ba ba Joridano! Ba so mado Geferaji fefoe, labaʼa gõtõna ba nidanõ misa, iroegi Mbeti Bara ba õtõna ba Joridano. 25Ba laraʼoe zalaw̃a Ndraono Midiano andrõ, si daroea, Orebi ba Sebi, ba ba gowe Gorebi laboenoe Gorebi ba Sebi, ba ba wolazi Zebi. Ba lagohi Ndraono Midiano. Ba bõgõ ndra Orebi Sebi andrõ, ba laʼohe chõ Gideono, mijefo Joridano. (Jes. 10, 26).
No comments:
Labels:

Soera Zangoehoekoe Faza 6

I. Lafakao Ndraono Gizeraëli, Iraono Midiano. Ifangelama ira samaʼeleʼõ. II. Hoemede malaʼika Jehowa andrõ chõ Gideono. Ibeʼe zoemange. III. Idoedoegõ naha wameʼe soemange andrõ chõ Mbaʼali. IV. Tandra, ba wangabeʼe tõdõ Gideono.

1I. Ba me lalaoe zi lõ omasi Jehowa Iraono Gizeraëli, ba ibeʼe ira ba danga Ndraono Midiano Jehowa, mewitoe fache. 2Ba lafakao Ndraono Gizeraëli Iraono Midiano. Ba labaliʼõ nahara mbawõ andrõ ba hili Iraono Gizeraëli, ba tõgi narõ hili andrõ, awõ nahia saro ba hili, ba Ndraono Midiano andrõ. 3Ba na no manaroe Ndraono Gizeraëli, ba mõi mijaw̃a chõra Ndraono Midiano, awõ Ndraono Gamaleki, awõ zowanoea tánõ ba gatoemboecha loeo. 4Ba tebato ba daʼõ chõra, ba lafoefoe zinanõ ba danõ, iroegi tánõ ba Gasa; maʼifoe lõ lasaigõ gaoerifa ba Ndraono Gizeraëli, ba he biribiri ba he saw̃i ba he kalide. 5Laʼohe saʼae goerifõra ba osera, na mõi ira mijaw̃a, timba waʼoja wali, na so ira, ba he jaʼira, ba he ondra chõra, ba tebai niʼerai. 6Ba wamakiko mõi ira ba danõ. Ba tobali noemana sibai Ndraono Gizeraëli, bõrõ Ndraono Midiano andrõ. Ba laʼangarõfi li Jehowa Iraono Gizeraëli. 7Ba me mangarõngarõ chõ Jehowa Ndraono Gizeraëli, ba Ndraono Midiano andrõ, 8ba ifatenge ba Ndraono Gizeraëli zamaʼeleʼõ Jehowa, ba imane chõra daʼõ: Daʼõ niw̃aʼõ Jehowa, Lowalangi Ndraono Gizeraëli: No oeʼohe mijaw̃a ami, moroi ba danõ Miseraji, no oeheta ami ba nahia waʼasawoejoe; 9no oeʼefaʼõ ami ba danga Ndrawa Miseraji, ba ba danga zamakao jaʼami fefoe, ba no oetimba ira fõnami ba no oebeʼe chõmi danõra. 10Ba no oemane chõmi: Jehowa ndraʼo, Lowalangimi; bõi miʼataʼoefi Lowalangi Ndraono Gamori andrõ, si so ami ba danõ. Ba lõʼõ sa nifondrondrongomi ligoe.
11II. Ba so malaʼika Jehowa andrõ, moedadao ia ba mbõrõ manawa andrõ, ba Gofera, banoea Joʼasi andrõ, maʼoewoe Gabieseri. Ba samõbõrõ fache nono Joʼasi, Gideono, ba wolazi nagoe, ba wangoloiʼõ jaʼia, ba Ndraono Midiano andrõ. 12Ba iʼoromaʼõ ia chõnia malaʼika Jehowa andrõ, imane chõnia: Itoloʼõ Jehowa, jaʼoegõ sabõlõ! 13Ba imane chõnia Gideono: He Toeha, na itologa Jehowa, ba hana sa wa gõna ndraʼaga daʼõ fefoe? Ba heza so dandra andrõ chõnia fefoe, nidoenõdoenõ ndra toeama chõma, me lamane: Hadia, tenga no iʼohe mijaw̃a ndraʼaga Jehowa, moroi ba danõ Miseraji? Ba iadaʼe, ba no iʼerogõ ita Jehowa ba no ibeʼe ba danga Ndraono Midiano ita. 14Ba iʼotahõgõ ia Jehowa, imane: Aeʼe, ba waʼabõlõoe andrõ, ba efaʼõ Ndraono Gizeraëli ba danga Ndraono Midiano. Hadia, tenga jaʼo zamatenge jaʼoegõ? (Heb. 11, 32). 15Ba imane chõnia; He Toeha, hadia oebeʼe fangefaʼõ Ndraono Gizeraëli? Hiza, no fondrege zi noemana ba mado Manase watalifoesõta chõma, ba jaʼodo, ba no fondrege zideʼide ba zi samba omo ndra amagoe. (Moz. II. 3, 11). 16Ba imane chõnia Jehowa: Jaʼo zanolo jaʼoegõ, ba õʼalani Ndraono Midiano, hoelõ na ha samõsa niha. 17Ba imane chõnia: Na no atṍ faloechado waʼeboea dõdõoe wamaigioe, ba laoe chõgoe dandra, wa no jaʼoegõ zi fahoehoeo chõgoe. 18Bõi ofanõ aʼi, irege sodo, irege oeʼohe baero gameʼelagoe, ba wanooeʼõ tooe fõnaoe. Ba imane: Oeʼagõ daʼe, irege mangawoeliʼõ. 19Ba mõi mijomo Gideono, iʼasiwai nono nambi ba koee si lõ moeʼaisõni, õsi zi samba jõoe hamo. Õsi nono nambi andrõ, ba ibeʼe ba goede, ba dinonia, ba ilaoe ba mbowoa, ba iʼohe baero chõnia, ba mbõrõ manawa itooeʼõ tooe fõnania. 20Ba imane chõnia malaʼika Lowalangi andrõ: Halõ nambi andrõ, awõ koee andrõ, si lõ moeʼaisõni, ba tooeʼõ tooe ba dete gowe andre, ba dino andrõ, ba fadoewa. Ba iʼoʼõ daʼõ. 21Ba iʼoroʼõ mbalõ ziʼonia, si so ba dangania, malaʼika Jehowa andrõ, itoeko nambi andrõ ba koee andrõ, si lõ moeʼaisõni, ba aloea galitõ ba gowe andrõ ba iʼā nambi, awõ koee andrõ, si lõ moeʼaisõni. Ba taja malaʼika Johowa andrõ, lõʼõ saʼae oroma chõnia. 22Awena iʼila Gideono, wa no malaʼika Jehowa. Ba imane Gideono: Alai ndraʼo, Soʼaja, Jehowa, me no faʼila bawa ndraʼo ba malaʼika Jehowa! (Moz. I. 16, 13. Moz. II. 33, 20. F. 13, 22). 23Ba imane chõnia Jehowa: Jaʼohahaoe dõdõoe! bõi ataʼoefi, lõ mateʼõ! 24Ba ifaʼanõ naha wameʼe soemange ba daʼõ Gideono ba ibeʼe tõinia ”fangorifi Jehowa”. Ba iroegi maʼõchṍ, ba lõ teboelõ ba daʼõ, ba Gofera, banoea maʼoewoe Gabieseri.
25III. Ba ba zi bongi andrõ, ba imane chõnia Jehowa: Ohe niha, dafoeloe, sawoejoemõ, ba saw̃i si matoea, si mewitoe fache; ba doedoegõ naha wameʼe soemange chõ Mbaʼali chõ namaoe, ba Asera andrõ, ba ngainia, ba ew̃a. 26Ba chõ Lowalangioe, Jehowa faʼanõ naha wameʼe soemange ba zoezoe hati andre, ba asiwai. Ba halõ zaw̃i andrõ, si sageoe, ba beʼe soemange nitoenoe; eoe Gasera andrõ, niʼew̃amõ dania, beʼe fanoenoe. 27Ba dafoeloe, iʼohe niha Gideono, sawoejoenia, ba iʼoʼõ niw̃aʼõ Jehowa chõnia. Ba me ataʼoe ia ndra amania ba banoeara ilaoe ba zi maʼṍchõ, andrõ wa ba zi bongi ilaoe. 28Ba me maoso mbanoeara, si hoelõ wongi, ba hiza, ba no moedoedoegõ naha wameʼe soemange andrõ chõ Mbaʼali, ba Asera andrõ ba ngainia, ba no moeʼew̃a, ba saw̃i andrõ, si sageoe, ba no moebeʼe soemange ba naha wameʼe soemange andrõ, nifaʼanõ andrõ. 29Ba faoma lamane chõ nawõra: Ha niha zolaoe daʼõ? Ba laʼaloealoei ba lazofoezofoe ba lamane: Gideono, ono Joʼasi zolaoe daʼõ. 30Ba lamane banoeara chõ Joʼasi: Da chõma nonooe andrõ, ba wamoenoe jaʼia, me no idoedoegõ naha wameʼe soemange andrõ chõ Mbaʼali ba me no iʼew̃a Gasera andrõ, ba ngainia. 31Ba imane Joʼasi chõra fefoe, si so ba daʼõ chonia: Hadia, jaʼami zamatoenõ hoehoeo Mbaʼali andrõ; jaʼami zangorifi jaʼia? Ha niha zamatoenõ jaʼia, ba niboenoe irege mahemoloe mbanoea. Na Lowalangi ia, ba jamoefatoenõ hoehoeonia, me no ladoedoegõ naha wameʼe soemange andrõ chõnia. 32Ba me loeo daʼõ, ba labeʼe tõi Gideono Jeroebi-Mbaʼali, lamane: Jamoefatoenõ hoehoeonia chõnia Baʼali, me no idoedoegõ naha wameʼe soemange andrõ chõnia.
33IV. Ba laʼowoeloi ira dozi Iraono Midiano ba Iraono Gamaleki, awõ zowanoea ba gatoemboecha loeo, dozi manõ ira, ba laʼõtõ Joridano ba tebato ba ndraso andrõ, ba Jezereʼeli. 34Ba so Geheha Jehowa chõ Gideono, ba ilaoe dorofe fogaoni maʼoewoe Gabiëseri, ba wefao chõnia. 35Ba ifatenge zinenge ba mado Manase fefoe, ba tefakaoniʼõ ira gõi, ba wefao chõnia. Ba he ba mado Gaseri ba ba mado Zeboeloni ba ba mado Nafetali, ba ifatenge gõi. Ba mõi ira mijaw̃a, lafaondragõ. 36Ba imane Gideono chõ Lowalangi: Na omasiʼõ õʼefaʼõ Ndraono Gizeraëli tangagoe andre, si mane niw̃aʼõoe, 37— ba hiza, oebologõ ba golajama mbasitõ mboe mbiribiri nigoeti; ba na ha boe mbiribiri andrõ zonamo, ba na otoefo danõ maʼafefoe, ba aboto ba dõdõgoe, õʼorifi Ndraono Gizeraëli tangagoe andre, itõrõ niw̃aʼõoe. 38Ba itõrõ. Ba mahemoloe õ, ba ihoelõ wongi wemaoso, iferaʼõ mboe mbiribiri andrõ, namo andrõ, samba figa nidanõ. 39Ba imane Gideono chõ Lowalangi: Bõi ofõnoe chõgoe, ba hatṍ samoeza tõ moehededo. Hatṍ samoeza tõ oetandraigõ ba mboe mbiribiri andrõ. Jaʼotoefo mboe mbiribiri, ha jaʼia, ba jamonamo danõ maʼafefoe. 40Ba iʼoʼõ chõnia daʼõ Lowalangi, ba zi bongi andrõ, ha boe mbiribiri zotoefo, ba no monamo danõ fefoe.
No comments:
Labels:

Soera Zangoehoekoe Faza 5

Fanoenõ ndra Debora Baraki.

1 Ba manoenõ ndra Debora Baraki, ono Gabinoa, me loeo daʼõ, lamane: 2”Wa so zolohe Iraono Gizeraëli, wa no aoha gõlõ zato — misoeno Jehowa! 3Mifondrondrongo, jaʼami razo, mibeʼe mbõrõ dalingami, jaʼami salaw̃a! Edõnado oesoeno Jehowa, daʼoelaoe mbiola chõ Jehowa, Lowalangi Ndraono Gizeraëli! 4Me mangefa ndraʼoegõ ba Zeʼira, jaʼoegõ Jehowa, me mofanõʼõ, me õʼotarai zaloʼo andrõ ba Ndraono Gedomo, ba modoeroe danõ ba mowõi mbanoea si jaw̃a; mowõi idanõ lawoeo. (Sin. 68, 8). 5Mangiwa hili fõna Jehowa, Sinaʼi andrõ, fõna Jehowa, Lowalangi Ndraono Gizeraëli. 6Me loeo Zamigaro andrõ, ono Ganata, me loeo Jaʼela andrõ, ba lõ sanõrõ lala; ba sanõrõ lala enaʼõ, ba lala sakõi latõrõ. (F. 3, 31). 7Ahono zalaw̃a Ndraono Gizeraëli, ahono ira, irege maoso ndraʼoegõ, jaʼoegõ Debora, irege maosoʼõ ina Ndraono Gizeraëli! 8Latoetoejoe Lowalangi si bohooe; fasõndrata ba zinga mbawa gõli, me loeo daʼõ. Baloese, ba lõ moeʼila, ba he toho, ba zi 40,000 andrõ ba Ndraono Gizeraëli. 9Chõ zolohe Iraono Gizeraëli dõdõgoe; jaʼami si no aoha õlõ ba zato andrõ, misoeno Jehowa! 10Jaʼami, si fakoedo ba hoeloe galide si alawe sojoʼojo, ba jaʼami sidaodao ba doefo, ba jaʼami, sanõrõ lala, ba mihede! 11Ba zi no arõoe aefa ba wagoeagoeasa zi fafana andrõ, ba gotaloea hele andrõ, ba daʼõ ndra moedoenõdoenõ wangoehoekoe Jehowa andrõ, fangoehoekoe zalaw̃a andrõ chõnia ba Ndraono Gizeraëli! Me loeo daʼõ mõi mitooe ba mbawa gõli Ndraono Gizeraëli! 12Laboe, laboe Debora; laboe, laboe, anoenõ! Faoso Baraki, raʼoe zondraʼoe jaʼoegõ menaʼõ, jaʼoegõ, ono Gabinoa! 13Me loeo daʼõ mõi mitooe zi tosai salaw̃a, si tosai sabõlõ. Mõi mitooe awõgoe Jehowa, awõ zabõlõ andrõ. 14Mado Geferaji, sow̃aʼa ba danõ Ndraono Gamaleki; laʼoʼõ ndraʼoegõ, jaʼoegõ mado Mbenijami, fao ba zato andrõ chõoe; mõi mitooe maʼoewoe Machiro, sangoloiʼõ, ba maʼoewoe Zeboeloni, solohe siʼo zalaw̃a. (F. 12, 15). 15Ba salaw̃a mado Isasari mõi awõ Debora, ba no si mane Isasari Mbaraki andrõ; iʼoloiʼõ ia ba ndraso ahenia. Ba zinga mbombo andrõ ba mado Roebeno, ba abõlõ wangerangera. 16Hadia wa no doemaodao ndraʼoegõ ba gotaloea kandra mbiribiri, ba wamondrondrongo fambehesa ngawawá andrõ? Ba zinga mbombo andrõ ba mado Roebeno, ba no abõlõ wangerangera. 17Gileadi andrõ, ba no ahonohono jefo Joridano; ba mado Dano, ba hana wa laʼiagõ manõ nowo andrõ? Mado Gaseri, ba ahonohono manõ ba mbewe nasi, lõ teboelõ ira ba mbewe daloe andrõ chõra. 18Seboeloni andrõ, ba no soi si lõ ataʼoe mate, ba si manõ gõi Nafetali ba mbawõ andrõ. 19So razo andrõ, fasõndra; fasõndra razo Ndrawa Ganaʼana andrõ, me loeo daʼõ, ba Daʼanache, ba mbewe nidanõ andrõ ba Megido: ba lõ si faloecha ira ahoeloea firõ! 20Moroi ba mbanoea si jaw̃a fasõndra ndrõfi; moroi ba lalara andrõ fasõndra ira chõ Zisera andrõ. 21No ahani ira ba mbombo Kizono andrõ, ba ”mbombo wasõndrata” andrõ, mbombo Kizono. Faoso, jaʼoegõ tõdõgoe, abõlõʼõgõ! 22Me loeo daʼõ labõrõ danõ koedo, me mandroeo, me lafandroeo sabõlõ andrõ chõra. 23Miʼelifi Merosi andrõ! iw̃aʼõ malaʼika Jehowa andrõ, miʼelifi mbanoeara, me lõ si mõi ira manolo Jehowa, me lõ nitolora Jehowa, awõ zabõlõ andrõ! 24Nisoeno Jaʼela andrõ, fõna ndra alawe bõʼõ; foʼomo Heberi andrõ, maʼoewoe Geni, fõna ndra alawe [fefoe], baose ndramoesoeno ia! 25Idanõ iʼandrõ [Sisera] ba soesoe ibeʼe; ba mako si sõchi iʼoroʼõ chõnia wanicha zoesoe. 26Ba itoejoe gosõʼosõ andrõ ba ihalõ kambõlõnia warõcha, ibõbõzi Zisera, iboto hõgõnia, irasa dangidanginia, itõlaʼõ. 27Ba ikõrõboei ia fõnania, alaoe ia, adõlõ tooe; fõnania ikõrõboei ia, alaoe, ba ba nikõrõboeinia jaʼia adõlõ ia tooe, no mate. 28Ba ifaigi ba zandrela ina Zisera, moeʼao ba darali, imane: ’Hana wa ara mangawoeli goeretania? Hana wa ahooe gahe koedonia?’ 29Ba fondrege zatoeatoea woʼomo zalaw̃a andrõ chõra zanema linia, ba jaʼia gõi ifoeli iw̃aʼõ niw̃aʼõnia mege: 30’Lõ zi lõ lasõndra mege gahoeloea ba ma awena lafaosa, samboea, ba ma domboea nono alawe zamõsa, ba ahoeloea noecha soginigini chõ Zisera; ahoeloe noecha soginigini, nilaʼalaʼa ba wanoso, noecha soginigini, doea gõrõ zalendra ba mbagi woʼomo zalaw̃a.’ 31Si manõ zi nangea waʼatekiko zi faʼoedoe chõoe fefoe, jaʼoegõ Jehowa! Ba sangomasiʼõ jaʼia, ba no hoelõ waʼatoemboe loeo, ba lachõminia andrõ.” Ba lõʼõ saʼae hadia ia ba danõ, õfa woeloe fache waʼara.
No comments:
Labels:

Soera Zangoehoekoe Faza 4

I. Laʼerogõ zoei Jehowa Iraono Gizeraëli ba ibeʼe sangotoeʼõ jaʼira Jabino andrõ, razo Ndrawa Ganaʼana. II. Laʼorifi ira ira Debora Baraki. III. Iboenoe Zisera andrõ Jaʼela.

1I. Ba lafoeli zoei lalaoe zi lõ omasi Jehowa Iraono Gizeraëli — noa sa mate Gehoedi. (Sam. I. 12, 9. Jos. 11, 11). 2Ba iʼamawa ira Jehowa ba danga Jabino andrõ, razo Ndrawa Ganaʼana, ba Hasora. Ba koemandra seboea chõnia Zisera, banoea Haroseti niha baero. 3Ba laʼangarõfi li Jehowa Iraono Gizeraëli. Siw̃a ngaotoe sa chõ Zisera goereta siʼõli ba iforege wamakao Iraono Gizeraëli, doea woeloe fache waʼara.
4II. Ba me loeo daʼõ, ba sangoehoekoe Iraono Gizeraëli, ba Debora, foʼomo Lafidoti, samaʼeleʼõ ira alawe. 5Barõ nohi Debora andrõ so nomonia, ba gotaloeara Rama Mbetiëli, ba hili Geferaji, ba mõimõi chõnia Ndraono Gizeraëli, ba wamatoenõ hoehoeora. 6Ba ifatenge zinenge, ifakaoniʼõ Mbaraki andrõ, ono Gabinoa, banoea Gedesi ba Ndraono Nafetali, ba imane chõnia: Si ndroehoe! no iw̃aʼõ Jehowa, Lowalangi Ndraono Gizeraëli: Laboe, ae ba hili Dabora ba ohe awõoe zi 10,000 niha, mado Nafetali ba mado Zeboeloni; (Heb. 11, 32); 7ba oeʼohe Zisera andrõ, koemandra andrõ chõ Jabino, awõ goereta andrõ chõnia, awõ zato chõnia, ba wamaondragõ jaʼoegõ, ba zinga mbombo Kizono, ba oebeʼe ba dangaoe ira. 8Ba imane chõnia Baraki: Na mõi ndraʼoegõ awõgoe, ba mõido, ba na lõ mõiʼõ awõgoe, ba lõ mõido! 9Ba imane: Mõido sa awõoe, ba tenga chõoe dania waʼeboea doeria, ba weʼamõimõ andrõ, ba danga ndra alawe dania iʼamawa Zisera andrõ Jehowa. Ba maoso Debora, mõi ia awõ Mbaraki ba Gedesi. 10Ba ifakaoniʼõ ba Gedesi mado Zeboeloni, awõ mado Nafetali Baraki; 10,000 niha si fao chõnia misi jaw̃a ba fao gõi chõnia misi jawa Debora. 11Ba Heberi andrõ, Iraono Geni, ba no iheta ia chõ Gaʼino andrõ, maʼoewoe Hobabi, matoea Moze, ba saté idaroedaroeʼõ nosenia, iroegi manawa andrõ ba ngai Zaʼanaʼi, sahatõ ba Gedesi. (Moz. IV. 10, 29). 12Ba me laʼombachaʼõ chõ Zisera, no mõi misi jaw̃a ba hili Dabora Mbaraki andrõ, ono Gabinoa, 13ba iʼoroiʼõ goeretania andrõ fefoe Sisera, 900 goereta siʼõli, awõ zabõlõ andrõ fefoe, si faofao chõnia; laʼotarai Haroseti niha baero andrõ, lasaw̃a mbombo Kizono. 14Ba imane Debora chõ Mbaraki: Laboe! me no daʼe mbaw̃a andrõ, ba nibeʼe Jehowa ba dangaoe Sisera andrõ; noa sa Jehowa zi mõi, mowaõwaõ fõnaoe! Ba mõi mitooe Mbaraki moroi ba hili Dabora, ba 10,000 zoloʼõ jaʼia niha. 15Ba ikeani Zisera, awõ goeretania fefoe, awõ zabõlõ chõnia fefoe, Jehowa, fõna Mbaraki, me laʼabõlõgõ wolaoe chõra; ba mõi tooe Zisera, moroi ba goereta, moloi, itõrõ tanõ. (Sin. 83, 10). 16Ba igohi goereta andrõ ba sanoewõ andrõ Baraki, iroegi Haroseti niha baero, ba ahori mate ba mbawa ziʼõli zabõlõ andrõ chõ Zisera, samõsa lõ si tosai.
17III. Ba Sisera, ba no moloi, no itõrõ tanõ ba no isaw̃a nose Jaʼela andrõ, foʼomo Ndraono Geni andrõ, Heberi; lõʼõ sa si faʼoedoe ira Jabino, razo Hasora, zi samba omo andrõ Heberi, Iraono Geni. 18Ba mõi tooe Jaʼela, ifaondragõ Zisera, imane chõnia: Ae baose Toea, ae baose chõgoe; lõ hadia ia niʼataʼoefi! Ba mõi ia baose chõnia, ba ibaloegõ ia toefo. 19Ba imane chõnia: Hadia, lõ õbeʼe õgoe nidanõ maʼifoe? Owõchi dõdõgoe. Ba ibokai naha zoesoe zaw̃i, ibeʼe õnia; ba ifoeli ihawoei ambala. 20Ba imane chõnia: Iagõ mbawandroehõ nose, ba na so niha, na isofoe chõoe, na imane: Hadia, so ba daʼe niha? ba õmane: Lõʼõ! 21Ba ihalõ gosõʼosõ nose Jaʼela andrõ, foʼomo Heberi, ba itoejoe warõcha, lõ idaʼidaʼi weʼamõi ba ngainia ba ibõzi ba dangidanginia gosõʼosõ andrõ, irege tetaroe ba danõ, noa sa mõrõ ia. Ba ono matelõ ia ba mate. 22Ba ba daʼõ sibai so Mbaraki, solohi Sisera. Ba mõi tooe Jaʼela, iʼondrasi ia, imane chõnia: Ae ba daʼe, daʼoeromaʼõ chõoe niha andrõ, niʼaloeimõ! Ba me mõi ia baose chõnia, ba iʼila tooe Zisera, si no mate, ba lõ si teboelõ ba dangidanginia gosõʼosõ andrõ; 23Si manõ waʼateʼala Jabino andrõ, razo Ndrawa Ganaʼana, labeʼe Iraono Gizeraëli, me loeo daʼõ, itolo Lowalangi. 24Ba itoegoe lahõndrõhõndrõgõ Jabino andrõ, salaw̃a Ndrawa Ganaʼana, Iraono Gizeraëli, irege lafaloea wamakiko jaʼia.
No comments:
Labels:
Lokasi: Indonesia, Nias Gunungsitoli, Gunungsitoli City, North Sumatra, Indonesia

Soera Zangoehoekoe Faza 3

I. Si tosai niha baero. Barõ mbawara Ndraono Gizaraëli. II. Oteniëli, sangoehoekoe si fõfõna andrõ. III. Iboenoe razo Ndraono Moabi, Ehoedi, Samigaro.

1I. Ba da'õ soi andrõ, nisaigõ Jehowa, ba wameʼe fanandraigõ Ndraono Gizeraëli jaʼira, fanandraigõ fefoe zi lõ anehe mege fasõndrata andrõ ba wangochõgõ tanõ Ganaʼana, 2— bõrõ mado Gizeraëli andrõ, ba wamahaõ jaʼira ba wanoewõ, jaʼira si lõ anehe fasõndrata andrõ fõna: 3Razo Ndrawa Wilisiti andrõ, si lima, ba Dawa Ganaʼana fefoe, banoea Zidona ba Iraono Hewi, ba hili Libano, iʼotarai hili Mbaʼali Heremono, irege lala ba Hamata. 4Fanandraigõ Ndraono Gizeraëli ira, ba wamaigi, na laʼoʼõ goroisa Jehowa andrõ, nibeʼenia chõ ndra toeara, nifaʼema Mose. 5Ba tobali tefasoei Ndraono Gizeraëli Dawa Ganaʼana ba Iraono Cheti ba Iraono Gamori ba Iraono Weresi ba Iraono Hewi ba Iraono Jeboesi, 6lahalõ nonora alawe ba labeʼe ba nonora matoea nonorā, ba lafosoemange Lowalangira andrõ. (Moz. V. 7, 3). 7Ba si lõ omasi Jehowa lalaoe Iraono Gizeraëli; olifoe ira Lowalangira, Jehowa, ba lafosoemange Mbaʼali ba Asera andrõ. 8Ba mofõnoe Jehowa ba Ndraono Gizeraëli ba ibeʼe ira ba danga Goesa Risataʼi, razo Garamo Naharaʼi; mew̃aloe fache barõ mbawa Goesa Risataʼi Ndraono Gizeraëli.
9II. Awena laʼangarõfi li Jehowa Iraono Gizeraëli, enaʼõ itolo ira. Ba iʼasogõ ba Ndraono Gizeraëli zangorifi Jehowa, sangefaʼõ jaʼira: Oteniëli andrõ, ono Gena, achi Galebi. (F. 1, 13). 10Ba so chõnia Geheha Jehowa, ba ifaigi lala ba Ndraono Gizeraëli. Ba mõi ia fasoewõ, ba ibeʼe ba dangania Goesa Risataʼi, razo Garamo andrõ, Jehowa, ba ilaw̃a Goesa Risataʼi. 11Ba õfa woeloe fache, ba lõ hadia ia ba danõ. Ba mate Goteniëli, ono Gena.
12III. Ba lafoeli lalaoe zi lõ omasi Jehowa Iraono Gizeraëli. Ba ibeʼe ba danga Negelono, razo Ndraono Moabi, Ndraono Gizeraëli Jehowa, me no lalaoe zi lõ omasi Jehowa. 13Ba ihalõ awõnia Ndraono Gamoni ba Iraono Gamaleki daʼõ, mõi ia, isoewõ Ndraono Gizeraëli ba iʼochõgõ mbanoea chorema andrõ. 14Felew̃aloe fache Ndraono Gizeraëli barõ mbawa Negelono, razo Ndraono Moabi. 15Ba laʼangarõfi li Jehowa Iraono Gizeraëli, ba iʼasogõ chõra zangorifi Jehowa, Ehoedi andrõ, ono Gera, mado Mbenijami, niha si takera. Jaʼia zamaʼema beo Ndraono Gizeraëli chõ Negelono, razo Ndraono Moabi. 16Ba ifazõchi chõnia gõri Ehoedi, gõri si faoma bawa, ha lito waʼanaoe, ba ibeʼe ba lõwilõwinia, barõ mbaroenia, ba gambõlõnia. 17Iʼohe, me mõi ia molohe beo andrõ chõ Negelono, razo Ndraono Moabi. Ba Egelono andrõ, ba no niha sesolo sibai. 18Ba me no ifaʼema mbeo andrõ, Ehoedi, ba ifasao mangawoeli niha andrõ, sonoro beo andrõ mege; 19ba jaʼia, ba ifoeli ia, me no laroegi nadoe andrõ ba Giligala, ba imane chõ Negelono: So niw̃aʼõgoe chõoe razo, ba zi lõ niha! Ba imane: Bõʼoea! Ba mõi baero fefoe zi so ba ngainia. 20Ba me no mõi si bacha chõnia Ehoedi, me ha jaʼia zidadao ba mbateʼe jaw̃a, ba zokafoekafoe, ba imane Ehoedi: So chõgoe niw̃aʼõ Lowalangi chõoe! Ba maoso ia, moroi ba dadaomania. 21Ba isõbi ziʼõli ba gambõlonia Ehoedi tangania kabera, 22itaroeʼõ ba daloenia, irege ahõndrõ na bacha ndranga gõi, fabaja õsi, ba teʼoeʼoe ba dawõ nõsi, lõʼõ sa ifoeli idõni ziʼõli ba daloenia, no atõla dambai. 23Ba mõi baoeloe Gehoedi. Idoehõ mbawandroehõ mbateʼe jaw̃a, foerinia, ba ilazi. 24Ba ha siʼai mofanõ ia, ba so wazoeri Negolono. Ba me laʼila, no moelazi mbawandroehõ mbateʼe jaw̃a, ba lamane dõdõra: Te no mõi ia ba nidanõ ba mbateʼe ba zokafoekafoe andrõ. 25Ba labazebazeʼõ manõ. Ba me lõʼõ manõ na ibokai mbawandroehõ mbateʼe jaw̃a, ba lahalõ wogoë ba lakoë, ba hiza tooe ba zalo zochõ jaʼira, no mate. 26Ba barõ waʼarõrõra andrõ, ba no moloi Gehoedi, no iroegi nadoe andrõ, ba ichamõ Zeʼira. 27Ba me no iroegi jomo mbanoea, ba ilaoe dorofe ba hili Geferaji. Ba mõi mitooe Ndraono Gizeraëli, awõnia, moroi ba hili, ba jaʼia zangoloiʼõ. 28Ba iw̃aʼõ li chõra, imane: Mitaboe awõgoe, mitooe, noa sa ibeʼe ba dangami nemalimi andrõ, Iraono Moabi, Jehowa. Ba mõi ira mitooe, awõnia, labaʼa gõtõna ba Joridano, tánõ ba danõ Ndraono Moabi, samõsa lõ lafatõrõ. 29Ba teʼala Ndraono Moabi, labeʼe, me loeo daʼõ, mato 10,000 zi mate, oi sabõlõ, solohe baloese, samõsa lõ soloi labeʼe. 30Ba tobali mõi barõ mbawa Ndraono Gizeraëli Ndraono Moabi, me loeo daʼõ. Ba 80 fache waʼara, ba lõ hadia ia chõra ba danõ. Ba sangoehoekoe jaʼira Gehoedi, iroegi waʼamatenia. 31Ba aefa daʼõ, ba Samigaro, ono Ganata; sangalani Dawa Wilisiti daʼõ, 600 iboenoe bõzibõzi gõrõbao, ba sangorifi Iraono Gizeraëli ia gõi.
No comments:
Labels:
Lokasi: Indonesia, Nias Nias Island, Indonesia
No comments:
Subscribe to: Comments (Atom)